JEREMIA 24 - BUKUIT NE TILIL

Kitongok aeng’ che bo logoekab magoonik

¹ Kiiborua Jehovah kitongok aeng’ che bo logoekab mogoonik che kiginde taitab hekalutab Jehovah; kingo kagoluul Nebukadresar laitoriatab Babulon, Jekonia weritab Jeoiakim, laitoriatab Juda, koboto bounikab Juda, koboto musogik ak kitang’ik, kobunu Jerusalem, koba Babulon.

² Kimi kitonget age logoekab mogoonik che kororon mising’, ko u tongoanikab mogoonik: ak kimi kitonget age logoek che yaachen mising’ che bo mogoonik, che kima kimuchi keam, ki yaachen mising’.

³ Yeityo kolenja Jehovah, Igeere nee, Jeremia? Ak kiale, Logoekab mogoonik; logoek che miachen, che kororon mising’, ak che yaachen, ko yaachen mising’, che magimuchi keam, yaachen kot.

⁴ Ak kinyonja ng’olyotab Jehovah kolenja,

⁵ Kamwa Jehovah Kamuktaindetab Israel, ko u ni kole: Aiti anyun bik che kigiluul che bo Juda, kogergeit ak logoechu kororon bo mogoonik, che kiayokte koba eng’ olito agoi emetab Kaldeik, si konyor mieindo.

⁶ Amu ageere ichek si koteb eng’ mieindo, ak amutu kogeny kobwa emoni: ak ateech ichek, ak ma abute; amine, ama atutu.

⁷ Ak agochi ichek muguleldo ne naena, kole, a Jehovah: ak koek bikyuk, ak aegu Kamuktaindenywa: amu weekyinagei eng’ mugulelwekwak tugul.

⁸ Ak ko u kit ne u logoechu yaachen bo mogoonik, che magimuchi keam, amu yaachen mising’; mwaei Jehovah iman kole, Ko u noto agoitoi Sedekia laitoriatab Juda, ak bounikyik, ak che ng’etu che bo Jerusalem, che ng’etu eng’ emoni, ak ichek che menyei emetab Misri:

⁹ agoitoi ichek koek che kiwirjin komosi ak komosi eng’ bounatosiek tugul che bo ng’ony si konyor taitiet; koek tewernatet, ak kalewenet, chotisiet ak sasisiet, eng’ komoswek tugul ole aonjini ichek.

¹⁰ Ak ayokyi ichek rotwetab chok, rubet, ak koroito, agoi kogesgei eng’ emet ne kiagochi ichek ak kwanisiekwak.