JAKOBO 2 - BUKUIT NE TILIL

Tuguk che kiyachin magorek ak kibananok

¹ Tupchosiekyuk, amonam kayanetab Kiptaiyandennyo Jesu Kristo, Kiptaiyatab torornatet, eng’ tiytietab bik.

² Ngot konyo chi ole otuiyechini ne tinyei peteit ne bo tahabu, ak ngoroik che kororon, ak konyo agine kibananiat ne tinyei ngoroik che yaachen;

³ ak ogonyit inendet ne ilaachi ngoroik che kororon, olenji, Tebe yu mie; ak olenji kibananiat, Tonon eng’ yo, anan itebe ng’ony yu bo kelyekyuk;

⁴ ko ma obesiege okwege, ak oegu che iruochi che tinyei kabwatutik che yaachen?

⁵ Ogaso, tupchosiekyuk ak ko chamanikyuk; tos kima lewen Jehovah che bonondos eng’ ng’ony koek magorek eng’ kayanet, ak koek che nyoru bounatet ne kigoarorji ichek che chamei inendet?

⁶ Ago kaosas kibananiat. Tos mainyalilok magorek, ak kochuutok obe kapkiruogutik?

⁷ Machubei ichek kainet ne bo teegisto ne kimwaitaenok?

⁸ Ago ngot osulde Ng’atutietab kaplaitoriat, ko u ye mwaei sirutik kole, Cham chitab kokweng’ung’ ko u ye ichamdoige, oyae ne mie;

⁹ ago ngot otiytii bik, ko kaoyai tengekto, koruokwok Ng’atutiet kole o bistoik.

¹⁰ Amu chito age tugul ne ribei Ng’atutiet komugul, ak kobut eng’ ng’olyot agenge, konamei kiruoget eng’ tugul.

¹¹ Amu inendet ne kimwa kole, Amoipge, ko kimwa agine kole, Amerumisie. Noto anyun, ngot ko meyai ibetab ge, ak irumisiei, ko kaiegu bistoindetab Ng’atutiet.

¹² Omwa ak oyai ko u bik che tun kiruokyin eng’ ng’atutietab katiaknatet.

¹³ Amu matinyei kiruoget rirenetab ge eng’ inendet ne ma ibor rirenetab ge: itororegei rirenetab ge kogirindoi kiruoget.

Agobo kayanet ak boisionik

¹⁴ Kelu nee, tupchosiekyuk, ngot kole chi tinyei kayanet, ama tinyei boisionik? Komuchi kayanonato kosor inendet?

¹⁵ Ngot komi ach ngor ng’etab komet, anan ko chepto ne otupche, ama tinyei amitwogik betut age tugul,

¹⁶ ak kolenji ichek age eng’ okwek, Oba eng’ kalyet, ocheng’ lalang’indo ak biyendo, ama ogochi ichek tuguk che machei borto; kotoreti nee?

¹⁷ Ko kit ne u agine kayanet, ngot ko matinyei boisionik, ko meat inegei.

¹⁸ Ago imuchi komwa chito kole, Itinye inye kayanet, atinye ane boisionik: iborua kayaneng’ung’ ne matinyei boisionik, si aborun boisionikyuk eng’ kayanet.

¹⁹ Iyani ile agenge Jehovah; iyae ne mie: iyani agichek oik, ak kobotandos.

²⁰ Ago imache inai, ee, inye chito ne ma i kiy, ile, kayanet ne matinyei boisionik ko son?

²¹ Kima kiityi imanda kwandanyo Abraham eng’ boisionik, ye kingogoito werinnyi Isak eng’ kaptisisiet?

²² Igeere ile kibois kayanet koboto boisionikyik, ak kiek kayanet ne igesunotgei eng’ boisionik,

²³ ak kiisulda sirutiet ne mwaei kolen, Kiiyan Abraham Jehovah, ak kigiityi inendet noto koek imanda; ak kigiguure inendet choruetab Jehovah.

²⁴ Ogeere ole kiityin chi imanda eng’ boisionik, magiityin eng’ kayanet inegei.

²⁵ Ak ko u noto, tos kima kiityi Rahab chepkugoniot imanda agine eng’ boisionik, amu kitaach che kiga kiyokto, ak koweekta ichek kobun oret age?

²⁶ Amu ko u ye meat borto ne matinyei tamirmiriet, ko u noto kayanet ne matinyei boisionik, meat agine.