ISAIAH 65 - BUKUIT NE TILIL

Biret ne kibirei Israel amu kibagakta Jehovah, ak melektab che iyani

¹ Teeba bik che kima koteeba; kigonyorua ichek che kima cheng’a: kialenji bororiet ne kima kemwaitae kainennyu, Ogeera, ogeera.

² Kiaiitochi eunekyuk bet komugul bik che ingeleldos, che bendote oret ne ma kararan, che bendote kabwatutikwak;

³ bik che tacha kimni kotugul, koeng’sei eng’ mbarenik, ak kobeelei nyamdutik eng’ matabaruk barak;

⁴ che teebote kererisiek, ak komenyei komoswek che bo ung’ot; che amei banyekab torok, ak mi terenikwak sutekab tuguk che kiwechei.

⁵ Che mwaei kole, Tonon inyege, amerikya, amu a tilil asiirin: chuto ko iyeto eng’ serunnyu, mat ne lalei betut komugul.

⁶ Ogeero, sirat eng’ tainnyu: masise, ago ayaaktoi, ee ayaakyini andochini tegetikwak,

⁷ tengekwogikwok, koboto tengekwogikab kwanisiekwok, mwaei Jehovah, che kigobeel nyamdutik eng’ tulonok, ak kochuba eng’ tulonok che mengechen: ageerjini anyun boisionikwak che bo tai, andochini tegetikwak.

⁸ Mwaei Jehovah ko u ni kole, Ko u ye kinyorjin divaik che leelach logoek che irurugotin eng’ temet, ak kole age, Ameng’em, amu mi kaberuret tuguchoto: ayae anyun ko u noto agobo otwogikyuk, si mang’em ichek tugul.

⁹ Ak amutu ne kigii eng’ Jakobo, ak amutu eng’ Juda nyabanindetab tulonokyuk, ak kobunji yoto chechuk che kigilewen, ak komenyei yoto otwogikyuk.

¹⁰ Ak koek Saron biutab akwotisiekab kechirek, ak koek atebwetab Akor ole ruiye akwotisiek, amu bikyuk che kigocheng’a.

¹¹ Ago okwek che ometoi Jehovah, che outie tulwennyu ne tilil, che ochobe meset agobo Kelunet, ak che onyiityini Kagesunet divaik che kigiburuch:

¹² aityinok anyun rotwetab chok, ak ong’urukyini tugul barisiet: amu kingaguurse, ko ma kowolu; kingang’alal, ko ma ogas; ago kioyai yaitiet eng’ tainnyu, ak kiolewen ne mabaibaitune.

¹³ Mwaei anyun Kiptaiyat Jehovah ko u ni kole, Ogeero, tun amisiei otwogikyuk, ago amok rubet: ogeero, tun eeisei otwogikyuk, ago amok melel: ogeero, tun baibaitu otwogikyuk, ago olilandosi:

¹⁴ ogeero, tiendos otwogikyuk amu boiboiyetab mugulelwekwak, ago orirtosi eng’ arogenetab muguleldo, oteitosi amu ng’wanindab muguleldo.

¹⁵ Ak obagakte kaineng’wong’ koek chubisiet eng’ chechuk che kialewen, ak kobarin Kiptaiyat Jehovah; ak koguur otwogikyik eng’ kainet age:

¹⁶ si koek ne iberuregei eng’ ng’ony ne iberuregei eng’ Kamuktaindet ne bo iman, ak koek ne iyostos eng’ ng’ony ne iyostos eng’ Kamuktaindet ne bo iman; amu kigeutie nyalilwogik che bo tai, amu kigeuny si ma ageere.

¹⁷ Ogeero, atau ayae kipsengwetisiek che leelach ak ng’onyut ne leel: ama kibwati tuguk che bo tai, ama kochutei metit.

¹⁸ Ago ogasge ak oboiboitu agoi agobo kit ne atau ayae: amu atau ayae Jerusalem koek ne kiboiboitune, ak koek bikyik boiboiyet.

¹⁹ Ak abaibaitune Jerusalem, abaibaitune bikyuk: ama kegasei ne rirei eng’ nganasanato, anan tuget ne bo rirek.

²⁰ Ma biitu eng’ oloto kogeny lakwet ne bo betusiek che ng’ering’ anan boiyot ne ma ilil: amu meei lakwet ko bo kenyisiek bogol, ak kechubei kiptengekyot ne bo kenyisiek bogol.

²¹ Ak koteech gorik, ak komeny; ak komin sabibuk eng’ mbarenik, ak koam logoekwak.

²² Mateeksei ichek, si konyo komeny age; ama minsei ichek, si konyo koam age: amu igeitu betusiekab ketit betusiekab bikyuk, ak koboiboitune chechuk che kialewen, boisionikab eunekwak.

²³ Maboisiei buch, ama ichin nyalil, amu icheget ko iyotetab che iberurotin che bo Jehovah, koboto lagokwak.

²⁴ Ak ye tom koguurso, awolu; ak ye ta kong’alali, agas.

²⁵ Ageti suiyot ak aruetab kechir, ak koam ng’etundo suswek ko u teta: ak koek ng’ung’unyek amitwogikab erenet. Ma itoi kiy chi anan kong’emis eng’ tulwennyu tugul ne tilil, mwaei Jehovah.