ISAIAH 62 - BUKUIT NE TILIL

Egu Sion lapkeiyetab ng’ony komugul

¹ Masise agobo Sion, amamuunyi agobo Jerusalem, agoi komanda imandanyi ko u kaluunet, ak komanda yetunennyi ko u tait ne lalei.

² Ak kogeer bororiosiek imandang’ung’, ak kogeer laitorinik tugul torornateng’ung’: ak keguurenen kainet ne leel, ne tun kuurenen Jehovah.

³ Iegu kogeny narietab kororonindo eng’ eutab Jehovah, ak iegu narietab laitornatet eng’ eutab Kamuktaindeng’ung’.

⁴ Ma keguurenen kogeny Ne Kigimeto; ama keguure emeng’ung’ kogeny Karaita: ago kiguurenen Hepsi-ba, ak keguure emeng’ung’ Beula: amu baibaitunenen Jehovah, ak kitun emeng’ung’.

⁵ Amu ko u ye ituni mureno bergeiyat, u noto tun itunin weriguk: ak ko u ye baibaitu sandet eng’ mureret, ko u noto, tun boiboitu Kamuktaindeng’ung’ eng’ inye.

⁶ Kande ribik irimoiguk, ee Jerusalem; magoi sisyo bet anan kemoi; amomuunyi okwek bik che obwatyini Jehovah,

⁷ amogochini inendet komuuny, agoi kogimit Jerusalem ak koyai koek kalosunet eng’ ng’ony.

⁸ Kigoyosio Jehovah eng’ eunnyi ne bo tai, ak eng’ eutab kimnatennyi, kole, Iman, ma agoitoi beguk koek amitwogikab buniguk; ama koee toek divaiguk, che kiiyai:

⁹ ago amei ichek che kigonori, ak kolos Jehovah; ak koee ichek che kiyumi, eng’ seremusiekab oldanyu ne tilil.

¹⁰ Omande, omandae ormarichok; ochob oretab bik; ochob, ochob oret ne o; oiste koik; onamji barak songoliet agobo bik.

¹¹ Ogeero, kagomwaita Jehovah agoi tabandab ng’ony, kole, Olenji cheptab Sion, Keero, nyonei yetuneng’ung’; keero, mi melektanyi koboto inendet, ak mi yaaktaennyi tainnyi.

¹² Ak koguure ichek, Bik che tililen, Che kigotiach Jehovah: ak keguurenen, Ne Kigicheng’, Nganaset ne ma kimeto.