ISAIAH 56 - BUKUIT NE TILIL

Tuguk che kanyol kosub bik che machei kole kesor

¹ Mwaei Jehovah ko u ni kole, Osub kiruoget, ak oyai imanda: amu negit konyo yetunennyu, ak negit keng’any imandanyu.

² Iberurot ne yaei chuto, ak weritab chi ne namei chuto mising’ ne ribei sabato ama imuruoni, ne ribei eunnyi si mayai yaitiet age tugul.

³ Amechamji toondet ne kigonamgei ak Jehovah, kong’alal kole, Itabanena Jehovah bikyik: amechamji sirorto komwa kole, Keero, a ketit ne yamat.

⁴ Amu mwaei Jehovah ko u ni agobo sirorinik che ribei sabatosiekyuk, ak che leweni tuguk che iboiboa, ak che namei mising’ kayomisennyu:

⁵ kole, Agochini ichek kabwatet ak kainet eng’ gonnyu ak eng’ irimoikyuk, kosiir werik ak tibik; agochini kainet ne bo koigeny, ne magiistoi.

⁶ Amutu kogeny toek che namegei ak Jehovah, si koboisiechi inendet, ak kocham kainetab Jehovah, koek otwogikyik, age tugul ne ribei sabato ne maimuruoni, ak konamei mising’ arorutiennyu;

⁷ amutu ichek kobwa tulwennyu ne tilil, ak agochi koboiboitu eng’ gonnyu ne bo saet; kitaachei kagochinoikwak che kibeelei ak tiseiywekwak, eng’ kaptisisiennyu: amu kiguure gonnyu gotab saet ne bo bororiosiek tugul.

⁸ Mwaei Kiptaiyat Jehovah ne iyumi che kigetimda che bo Israel, kole, Ta ayumjini alak inendet, che siirei chechik che kigiyum.

Ng’alekab bwa agobo bounik che yaachen, ak saetab kanamonik

⁹ Obwa, oamisie, okwek tiong’ik tugul che bo timin, ee, okwek tiong’ik tugul che bo osnet.

¹⁰ Koriotin ribikyik, matinyei tugul naet; icheget tugul ko sesenik che namotin kut, maimuchi ichek kokwer; irotitoi, ruitos, chamei konuukso.

¹¹ Ee, kipkein sesenik, mabiyong’dos agoi; ak chuto ko mestowek che maiguitos kiy: kigomasta tugul kosub orenywa, kigosub chi tugul keljinennyi, eng’ komosta age tugul.

¹² Mwaei kole, Obwa, si aib divaik, si kee maiyek konyiiech; ak kergeitu betuni ak mutai; betut ne o, ne siirtoot.