ISAIAH 41 - BUKUIT NE TILIL

Koboisie Jehovah Kirus

¹ Osisye eng’ tainnyu, ee ngegusiek; ingonyor bororiosiek kimnatenywa ne leel: ingorik; yeityo kong’alalso: ongerigu tugul oldab kiruoget.

² Ng’o ne kiing’eet inendet ne bunu kong’asis, ne kuurei eng’ imanda konyo kelyekyik? Igoitoi bororiosiek eng’ tainnyi, ak kogochi inendet koboi laitorinik; igochin ichek koigei temburiek eng’ rotwennyi bo chok, ko u metetek che arureni, eng’ taitab kwangennyi.

³ Onei, ak kosiirto eng’ kalyet; agot eng’ oret ne kitom kobunei.

⁴ Ng’o ne kigobois ak koges, ne kuurei ibinwek koboch taunet? Ane Jehovah ne bo tai, ak ne bo let, a inendet.

⁵ Kigeer ngegusiek, ak koiywei; kibotanso komoswek tugul che bo ng’ony: kirik, kobwa.

⁶ Kitoret age tugul chitab kokwennyi, ak kolenji tugul ng’etab kamet, Nyiganitu.

⁷ Kogiil anyun musogindetab baoinik kitang’indetab tahabu, ak inendet ne ichabaisie kiriswet kogiili inendet ne birei karnet ne o, komwachin agobo ole kituiye ngosielait, kolenjin, Mie: yeityo kogiige kipchumarisiek, si maging’ei.

⁸ Ago inye Israel, otwogindennyu, Jakobo ne kialewen, iyotetab choruennyu Abraham;

⁹ inye ne kianamin koboch tabanwekab ng’ony, ak aguurin imong’une luukwekyik, ak alenjin, I otwogindennyu, kialewenin ama atimdoin;

¹⁰ ameiyweisie, amu ami koboten; amearogen, amu a Kamuktaindeng’ung’: agimitin; ee, atoretin; ee, anamin eng’ eunnyu ne bo tai ne bo imandanyu.

¹¹ Keero, ililandos tugul che nerekyinin ak kotoptobenso: egu buch ak kobetyo.

¹² Icheng’e ichek, amenyoru, agot ichek che obarege: egu buch che borienen, ak kogergeit ak kiy buch.

¹³ Amu aname eung’ung’ ne bo tai, ane Jehovah Kamuktaindeng’ung’, alenjinin, Ameiyweisie; atoretin.

¹⁴ Ameiyweisie, inye Jakobo, ne i kutiet, ak okwek bikab Israel; atoretin, mwaei Jehovah, ak katiagindeng’ung’ ko Inendet ne Tilil ne bo Israel.

¹⁵ Keero, ayain iegu kit ne leel ne ng’atib ne kiborse, ne tinyei kelek: ibore tulonok, ak itui komengegitu, ak iyai tulonok che mengech kogergeit ak metetek.

¹⁶ Iruri, si koib usonet, ak koyesta kipchurjuriet: ak ibaibaitu eng’ Jehovah, ilosunegei Inendet ne Tilil ne bo Israel.

¹⁷ Cheng’ei beek bik che bonon ak che matinyei kiy, ago mami, ak koyaamei ng’elyepta amu melelda; awoljini, ane Jehovah, mametoi ane Kamuktaindetab Israel.

¹⁸ Ayate ainosiek eng’ komoswek che tororen ole churat, ak ayat kondametusiekab beek eng’ kwenutab atebwosiek: ayae ong’atet koek tamboiyot, ak emet ne yaamat kobiitune kong’ikab beek.

¹⁹ Amine eng’ ong’atet taragonik, ketikab shita, ak che kiguure myrtle, ak che bo mwanik; ak ande surkwen biribirinik, taragonik che sabulen, ak taragonik che ter kobityo tugul.

²⁰ Si komuch kogeer, ak konai, ak kobwat, ak koguiyo kibagenge, kole kiyai eutab Jehovah nito, ak kitoi koyai nito Inendet ne Tilil ne bo Israel.

Kiboru ole terjindoi Jehovah Kamuktaindet ak kanamonikab bororiosiek

²¹ Kale Jehovah, Omwa ng’alekwok; kale Laitoriatab Jakobo, Oibu ng’alekwok che kimen.

²² Ingoib ichek, ak komwawech kit ne biitu: omwa tuguk che bo tai, kit ne u, si kobiit kibwat, ak kenai kagesunenywa, anan oboruech tuguk che tun bwanei.

²³ Omwa tuguk che ta kobiitu, si kobiit kenai kele o cheptalelisiek: ee, oyai ne mie, anan oyai ne ya, si kobiit ketoptobense, ak kegeer achek tugul.

²⁴ Ogeero, o bo buch, ak boisieng’wong’ ko bo buch: kiwechei inendet ne lewenok.

²⁵ Koang’eet age ne bunu murot ne bo katam, ak kagoit; bunu inendet ne kuure kainennyu ole chorunei asista: ak nyonjin bounik ko u ye nyonjin menet, ak ko u cheptereniot ne tiechei menet.

²⁶ Ng’o ne kigomwa ng’olyondoni koboch taunet, si kobiit kenai? Ak ne kisib komwa, si kobiit kemwa kele, Bo inendet imanda? Ee, mami agot agenge ne mwaei, ee, mami agot agenge ne iboru, ee, mami agot agenge ne kasei ng’alekwok.

²⁷ Amwachini korok Sion, alenjini, Keero, keer ichek-o; ak agochini Jerusalem inendet ne ibu logoiywek che miach.

²⁸ Ak ye ageer, ko mami chi; mami kiruogindet agot eng’ kwenunya, ne ye ateebe ichek, komuchi kowol ng’olyo.

²⁹ Ogeer tugul-o, tangoita boisionikwak ak ko buch: usonet ak toiyet kanamonikwak che kitanyi.