ISAIAH 40 - BUKUIT NE TILIL

Kimwau kagaigaet ne bo sorunet ne kigimutune eng’ ole kiga kiluulji

¹ Ogaigai, ogaigai bikyuk, mwaei Kamuktaindeng’wong’.

² Ong’alalji Jerusalem eng’ kagaigaet, ak omwachi eng’ kutit ne o olenji, kagogesgei boriennyi, kagenyochi kaat tengektanyi; kagotaach eng’ eutab Jehovah biret konyil aeng’ agobo tengekwogikyik tugul.

³ Kutitab ne ititeni, kolen, Ochob okwek oretab Jehovah eng’ surkwen, olitit oret ne o eng’ ong’atet agobo Kamuktaindennyo.

⁴ Tun kilong’u atebwet age tugul, ak tun kiripribi tulwet age tugul ne o ak ne ming’in: ak tun kilititi che kunuren, ak kichaboi komoswek che sing’ortot:

⁵ Ak keng’any torornatetab Jehovah, ak tun keerei bik tugul: amu kamwa Jehovah nito.

⁶ Kutitab chi ne mwaei kole, Waach. Ak kole age, Awaakyi nee? Suswek borwek tugul, ak u taptok che bo kewet kororonindanywa tugul:

⁷ Restos suswek, ak kobetos taptok; amu usyin kabusetab Jehovah: suswek bik iman.

⁸ Restos suswek, ak kobetos taptok: ago tononi koigeny ng’olyotab Kamuktaindennyo.

⁹ Togoste tulwet ne koi inye ne imwachini logoiywek che miach Sion; waach mising’ eng’ kimnatet inye ne imwachini Jerusalem logoiywek che miach; waach, ameiywei; mwachi nganasokab Juda ilenji, Ogeer, Kamuktaindeng’wong’!

¹⁰ Ogeero, nyonei Kiptaiyat Jehovah ko u inendet ne kim, ak kobounisiei eunnyi agobo inendet: ogeero, mi melektanyi koboto inendet, ak mi yaaktaennyi tainnyi.

¹¹ Baei kechirekyik ko u mestowot, iyumi eunnyi arekab kechir, ak komute tegennyi, ak kondochi mutyo che aboen.

Torornatetab telunatetab Jehovah

¹² Ng’o ne kiger beek kogeer ole te, eng’ rubeitanyi, ak kokwa kipsengwet eng’ morikyik, ak konai ole te temburiekab ng’ony eng’ karogendoet, ak korogendo tulonok eng’ ratilisiek, koboto tulonok che mengechen eng’ kit ne kirogendoisie?

¹³ Ng’o ne kiindochi tamirmirietab Jehovah, anan ng’o konetindennyi ne kiinet inendet?

¹⁴ King’alal ak ng’o, ak kiine ng’o inendet, ak konet inendet eng’ oretab kiruoget, ak konet naet, ak koborji inendet oretab kaguiyet?

¹⁵ Ogeero, u bororiosiek beek che kasaita konyil agenge eng’ teret, ak kiiti ko u temburiek che tutigin che mi kit ne kirogendoisie: ogeero, inemu ngegusiek ko u kit ne ming’in mising’.

¹⁶ Ak mayamei kwenikab Lebanon kilaal, ama yamei tiong’ikab oloto koek kagochinet ne kibeelei.

¹⁷ U buch bororiosiek tugul eng’ tainnyi; kiiti ichek kele u buch eng’ inendet, ak tangoita.

¹⁸ Orogendoi ng’o anyun Kamuktaindet? Anan nee kergeindo ne orogendoi inendet?

¹⁹ Ichooti musogindet tuguk si kobiit kowai kanamwet, ak koliige kitang’indetab tahabu kanamwonoto tahabu, ak kotang’ji sirimwekab feda.

²⁰ Chito ne banan mising’ agobo kagochinet ne u noto, ne kinamjin barak, koleweni ketit ne manunei; cheng’jingei musogindet ne ng’om si kolumda kanamwet ne kiwaei, ne maging’ei.

²¹ Tos tom onai? Tos tom ogas? Tos tom kemwawok koboch taunet? Tos tom oguiye koboch ngab kelumda lumeiywekab ng’ony?

²² Inendet ko ne tebe ole boch yiemutietab ng’ony, ak u che menyei oloto, talamik; ne iitoi kipsengwetisiek ko u anget, ak koiito kipsengwetisiechoto ko u emait ne kimenyei:

²³ inendet ne yaei bounik koek buch, ne yaei kiruogikab ng’ony koek tangoita.

²⁴ Ee, kima komin ichek, ee, kima kigol ichek; ee, kima nam ng’ony tigitikwak: si koguut inendet ichek, ak koresyo, ak koib kipchurjuriet ichek ko u mobek.

²⁵ Orogendoa ng’o anyun, kot kegergeitu ak inendet? Mwaei Inendet ne Tilil.

²⁶ Onyal barak, ogeer ole ng’o ne kitoi koyai chuto, ne imutu lugenywa kobee koitet: kuurei tugul eng’ kainaikwak, eng’ oindab kamugennyi, ak kim inendet eng’ kamuktaet, ma bet agot agenge.

²⁷ Amu nee si ile inye Jakobo, ak ing’alali, ee Israel, ile, Ung’at orennyu eng’ Jehovah, kigosiirto kiruogennyu ama mage kiy Kamuktaindennyu?

²⁸ Tos tom inai? Tos tom igas? Manyaluli, ama ng’etei Kamuktaindet ne bo koigeny, inendet Jehovah, Yaindetab ng’ony komugul; maisiagaksei naennyi.

²⁹ Igochin kimnatet ne nyaluli; ak tesyin kimnatet inendet ne matinyei kamuget.

³⁰ Nyaluldos ak kong’etos agot neranik, ak kobutyo murenik:

³¹ ago nyoru kimnatet ne leel icheget che igeni Jehovah; togostoi kotirirendos ko u kipsichinik; ruaei, ama ng’etos; bendoti, ama nyaluldos.