ISAIAH 38 - BUKUIT NE TILIL

Miandab Hesekia ak kisoobi

¹ Kimian Hesekia eng’ betusiechoto kot ko negit kome. Ak kinyo ole mi inendet Isaia maotiot weritab Amos, ak kolenji inendet, Mwaei Jehovah ko u ni kole, Rarji ket bikab gong’ung’; amu imee, mesobe.

² Kowelel anyun Hesekia togennyi kogeer inat, ak kosa Jehovah,

³ kole, Ee Jehovah, asain ale, ibwat ole kiatepte eng’ imanda eng’ taing’ung’ ak eng’ muguleldo ne igesunotgei, ak kiayai ne mie eng’ taing’ung’. Ak kirir Hesekia eng’ ng’wanindo.

⁴ Konyonji anyun ng’olyotab Jehovah Isaia kolenji,

⁵ Ui mwachi Hesekia ilenji, Mwaei Jehovah Kamuktaindetab Daudi kwandang’ung’ ko u ni kole, Kaagas saeng’ung’, kaageer beeguk bo kong’: keero, atesyini betusieguk kenyisiek taman ak mut.

⁶ Ak asorun koboto nganasani eng’ eunekab laitoriatab Asuria: ak aribe nganasani.

⁷ Ak egu ni kaborunet eng’ inye ne bunu Jehovah, kele yaei Jehovah kii kagomwa:

⁸ Keero, aweechi uruet ne bo tilutik ne kagorekta koboto asista eng’ kit ne kirogendoe saisiek, ne bo Ahas, koweek kwo let tilutik taman. Kotogos anyun asista tilutik taman eng’ kioto kirogendoisie ne kaga korektae.

Kongoi ne bo Hesekia amu kigisoob eng’ miandanyi

⁹ Chu ng’alek che kisir Hesekia laitoriatab Juda, ye kiga komian, kot kosob eng’ miandanyi.

¹⁰ Kiamwa ale, Achute kurgetab kererit, eng’ kwenutab betusiekyuk; Kagirebena betusiekyuk che ng’etunotin.

¹¹ Kiamwa ale, Ma ageere Jehovah, inendet Jehovah eng’ emetab bik che soptos: Ma ageere chito kogeny koboto che menyei ng’ony.

¹² Kageisto meng’otennyu, kageibena ko u emait ne bo mestowot: Kiamaman sobondanyu ko u ye mamanisiei chito ne nabisiei; istoa eng’ ketit ne kinabisie: Igeswa koboch bet agoi kemoi.

¹³ Kiasis kot koeech; irie kowekyuk tugul ko u ng’etundo: Igeswa koboch bet agoi kemoi.

¹⁴ Kiatwegu anyun ko u kibiswet anan cheptalamiat: Kiarir ko u cheptuget: kianyal barak kot koimenitu konyekyuk; Ee Jehovah, kinyalila, egu ne tononwa.

¹⁵ Amwae nee anyun? King’alalwa, ak kigoyai inendet kosulda: Awendi mutyo kenyisiekyuk tugul amu ng’wanindab sobondanyu.

¹⁶ Ee Kiptaiyat, soptos bik eng’ tuguchuto, Ak mitei sobondab tamirmiriennyu tuguchoto tugul: Inyaa anyun, ak igona asob.

¹⁷ Keero, kianyoru ng’wanindo ne o agobo kalyennyu: Ago kiisoru sobondanyu komong’une keringetab ng’emisiet amu ichame: Amu kiiwirte tengekwogikyuk koba let.

¹⁸ Amu maimuchi kererit kolosun, maimuchi meet kobwatin: Maimuchi komang’ imandang’ung icheget che chorjingei keringet.

¹⁹ Ilosun che soptos, ee che soptos, ko u ye alosun ra: Iborjin kwanda lagok imandang’ung’.

²⁰ Chobot Jehovah kosorua; Kitieni anyun tienwogikyuk eng’ kibugandinikab inoik Eng’ betusiek tugul che bo sobennyo eng’ gotab Jehovah.

²¹ Kiga komwa Isaia kole, Ingoib logoekab mogoonik che inurotin, ak konuge ole mi burasta, si kosob.

²² Kiga mwa Hesekia kole, Nee kaborunet ne iborua kole atogostoi gotab Jehovah?