ISAIAH 25 - BUKUIT NE TILIL

Tiendo ne kitien kibwate sorunetab Sion

¹ Ee, Jehovah, i Kamuktaindennyu; atororin, alosu kaineng’ung’; amu kiiyai tuguk che kikwong’e, kiruogutik che bo keny, eng’ imanda ak eng’ imanit.

² Amu kiiyai nganaset koek karurugutiet; kiiyai nganaset ne ng’otat koek karatia: kiiyai gotab laitoriat ne bo toek koek ole mami nganaset; magoi ta keteech kogeny.

³ Konyitin anyun bik che kimen, iywein nganaset ne bo bororiosiek che imuisei.

⁴ Amu kiiegu irimetab kibananiat, irimetab ne matinyei kiy eng’ bichiindanyi, i ole kimwechin eng’ usonet ole kiuure eng’ kiptoret, ye igei usonetab che imuisei, usonet ne o ne rusei inat.

⁵ Iming’ini bolatetab toek ko u kiptoret eng’ ole yaamat; kinyeroti tiendab che imuisei ko u kiptoret eng’ tulugenet.

⁶ Ak tun yachin Jehovah ne bo lugosiek bororiosiek tugul, eng’ tulwoni igorta ne bo tuguk che akwaen, igortab divaik che kigotebi keny, ne bo tuguk che akwaen, che nyiitotin mwanik, ne bo divaik che kororon che kigotebi keny.

⁷ Ak tun ng’emei eng’ tulwoni kit ne kituge bik tugul, ak anget ne kigituge bororiosiek tugul.

⁸ Kigolugui inendet meet koigeny; ak tun ibuchi Kiptaiyat Jehovah beekab kong’ eng’ togochik tugul; ak koisto tewernatetab bikyik eng’ ng’ony komugul: amu kagomwa Jehovah nito.

⁹ Ak tun kimwaei eng’ betunoto kele, Ogeero, nito ko Kamuktaindennyo; kigigen inendet, ak soruech inendet: nito ko Jehovah; kigigen inendet, kigasige ak keboiboitu eng’ yetunennyi.

¹⁰ Amu imuunyi eutab Jehovah eng’ tulwoni, ak ketiekyi ng’ony Moab eng’ oldanyi, ko u ye kitiekyin ng’ony mobek eng’ beekab kapng’atat.

¹¹ Ak koiitochi eunekyik kwenunywa, ko u ye iitoi eunekyik inendet ne birei beek: ak konyerat menotennyi koboto ng’alsetab eunekyik.

¹² Ak kagobut ole ng’otat ne bo teekset ne koi, ne bo irimoiguk, kagoluul, kagowirtagei kwo ng’ony, ole mitei temburiek.