ISAIAH 19 - BUKUIT NE TILIL

Kiruoget ne kiruokyine Misri

¹ Lautietab Misri. Ogeero, lanyei Jehovah boldet ne chepcheb, ak nyonei agoi Misri: ak kiistoi kanamonikab Misri eng’ tainnyi, ak kochoot muguleldab Misri eng’ kwenunnyi.

² Ak ang’eet Misrik kobargei ak Misrik: ak kobargei chi tugul ak tupchennyi, ak kobargei chi tugul ak chitab kokwennyi; baregei nganaset age ak age, ak kobargei bounatet age ak age.

³ Ak tun kiyaei koek buch tamirmirietab Misri eng’ kwenunnyi; ak ang’em kiruogennyi: ak koba kocheng’ kanamonik, ak bik che abusisiei, ak che boisie oik, ak bonik.

⁴ Ak agochi Misrik kiptaiyat ne korom koboi ichek; ak koboi ichek laitoriat ne korom, mwaei Kiptaiyat, Jehovah ne bo lugosiek.

⁵ Ak kotenyo beek eng’ nyanjet, ak koteny ainet ak koyaam.

⁶ Ak kobulyo ainosiek; ak kotenyo ainosiekab Misri ak koyaamnyo: Ak koresyo saosanik ak cherungusiek.

⁷ Ak koyaamnyo morong’inik che mi ainetab Nael, che mi ngegutab ainetab Nael, koboto tugul che kigimin eng’ ole negite ainetab Nael, ak keib ak kobetyo ama kobiitu.

⁸ Ak koririo kogeny ramik che bo njirenik, ak koteiyo ichek tugul che namei njirenik eng’ ainetab Nael, ak kobetyi kimnatet ichek che wirjin beek regereiywek che kiname njirenik.

⁹ Kogeny, kolilandos ichek che laei katanit ne kararan, ak che taei ngoroik che leelach.

¹⁰ Ak koilyo tolochikyik kotonogis, ak koarogenso eng’ sobonwekwak ichek tugul che kigisir koyai boisiet.

¹¹ Berberen mising’ bounikab Soan; kaabusak kiruogetab kiruogik che ng’omen mising’ che bo Parao: omwachindoi ano Parao, olenji, A weritab che ng’omen, weritab laitorinik che bo keny?

¹² Mi ano anyun biguk che ng’omen? Ak ingomwaun nguno, ingonai ichek kit ne kogochob Jehovah ne bo lugosiek agobo Misri.

¹³ Kagoek che berber bounikab Soan, kigiberber bounikab Nop; kogogochi Misri komasta, choto ko koitab luita ne bo bororiosiekyik.

¹⁴ Kigoburuch Jehovah tamirmirietab kamaaset eng’ kwenunnyi: ak kogogochi ichek Misri komasta eng’ boisiennyi age tugul, ko u ye terterioti kibogitiot kong’ung’u.

¹⁵ Ama komi boisiet age tugul agobo Misri, ne imuchi koyai metit anan katutiet, temetab sosiot anan cherungut.

¹⁶ Eng’ betunoto, ko kergeitu Misri ak kwonyik: botani ak koiyweisiei amu twaitwaetab eutab Jehovah ne bo lugosiek, ne twaitwai eng’ baragunnyi.

¹⁷ Ak koek emetab Juda kamuiset eng’ Misri, ak iyweisiei age tugul ne kemwachin agobo noto amu chobetab Jehovah ne bo lugosiek, ne kichob kogirinda emonoto.

¹⁸ Tun biitu eng’ betunoto nganasok mutu eng’ emetab Misri che ng’alali kutitab Kananik, ak koyosiechi Jehovah ne bo lugosiek: kiguure age Nganasetab ng’emisiet.

¹⁹ Tun biitu eng’ betunoto kaptisisietab Jehovah eng’ kwenutab emetab Misri, ak toloita ne bo Jehovah ne mi kiwotennyi.

²⁰ Ak koek noto kaborunet ak baornatet ne bo Jehovah ne bo lugosiek eng’ emetab Misri: amu tun rirjin Jehovah amu usik, ak koyokyi ichek yetindet, toretindet, ak kosor ichek.

²¹ Ak konaak Jehovah eng’ Misri, ak konai Misrik Jehovah eng’ betunoto; ee, ilosune ichek korosek ak kagochinoik, ak koarorji Jehovah kaarorunet, ak koyai kosulda.

²² Ak tun birei Jehovah Misri, birisiet ak kasoobet; ak koweekyigei Jehovah, ak kogasyi ichek somutikwak ak kosoob.

²³ Tun biitu oret ne o eng’ betunoto ne ng’ete Misri agoi Asuria, ak kobwa Asuriek Misri, ak koba Misrik Asuria: ak kosa Misrik koboto Asuriek.

²⁴ Tun egu ne bo somok Israel eng’ betunoto, koboto Misri ak koboto Asuria, koek kaberuret eng’ ng’ony:

²⁵ amu kogoberur Jehovah ne bo lugosiek ichek, kolen, Iberurotin bikyuk Misri ak Asuria boisietab eunekyuk, ak Israel bortannyu.