ISAIAH 10 - BUKUIT NE TILIL

¹ Bwa eng’ ichek che ng’atei ng’atutik che ma bo iman, ak eng’ ichek che sirei kamaaset:

² kobeet ne nyalili eng’ kiruoget, ak korebe imanit kibananokab bikyuk, si kobiit koek mosogik barunenikwak, ak si kobiit koluul che matinyei kwanda!

³ Ak oyae nee eng’ betut ne ityinok bireng’wong’, ak eng’ ng’emisiet ne bunu ole loo? Omwechini ng’o kotoretok? Ak ondoi ano torornateng’wong’?

⁴ Ing’urukyin ichek kimonjororinik, ak kobutyi ole kigibarji bik. Nganda u noto, ko ma istogei neregekyik, ago ta ko chuulat eunnyi kora.

Menotetab Asuria ak birennyi

⁵ Bwa Asuriaindet, kiroktab neregekyuk, siaritab inendet ne mi neregekyuk eunnyi!

⁶ Ayoktoi kobargei ak bororiet ne ya, ak agochini kobargei ak bik che anerekyini, si koluul ak koib barunenik, ak ketiech ichek, ko u ye kitiechi ng’atatek eng’ oret.

⁷ Ago maibwati ko u noto, ama mi muguleldanyi ko u noto; ago machei muguleldanyi kong’emis, ak kowong’ bororiosiek che chang’.

⁸ Amu kimwa kole, Tos, ma laitorinik bounikyuk tugul?

⁹ Tos, ma u Kalno Karkemis? Tos, ma u Hamat Arpad? Tos, ma u Samaria Damasko?

¹⁰ Ko u ye kagonyor eunnyu bounatosiekab kanamonik, che siirei itonwekwak che kigiwai, che bo Jerusalem ak che bo Samaria;

¹¹ tos mayachini Jerusalem ak kanamonikyik ko u ye kiayachi Samaria ak kanamonikyik?

¹² Noto anyun ye tun kagoyai Kiptaiyat boisiennyi komugul eng’ tulwetab Sion ak eng’ Jerusalem, abir anyun logoekab menotetab muguleldo ne bo laitoriatab Asuria, ak torornatetab kachaunennyi bo ge.

¹³ Amu kigomwa kole, Kiayai nito eng’ kimnatetab eunnyu, ak eng’ ng’omnatennyu; amu a ng’om; ak kiaiste kiwotosiekab bororiosiek, ak kiarebe konoraikwak, ak kiaming’in ichek che tebe ng’echerokab laitornatet, ko u chito ne nyigan:

¹⁴ ak kigonyor eunnyu magornatosiekab bororiosiek ko u keswetab taritiet; ak ko u ye iyumi chito koik che kigelakta, che bo ngogaik, kiayum ko u noto ng’ony komugul: ak ma biit ne kibirabirto kebepchet, anan ne kitwek, anan ne kiite.

¹⁵ Tos ichaugei aiywet eng’ inendet ne ebisie? Tos ieetegei musumenet eng’ inendet ne tilisie? Ko u nda itumdumi kirokto ne namei, anan nda namjin barak siarit inendet ne ma ketit.

¹⁶ Igochin anyun Kiptaiyat, Kiptaiyat ne bo lugosiek, bikyik che neriotin kosagityo; ak tun biitu liblibenet ne u ne bo mat ne lalei, ne kigeere torornatennyi.

¹⁷ Ak koek mat lapkeiyetab Israel, ak koek nenyi Ne Tilil liblibenetab mat, ak kobeel kwong’ katokyik ak katablelinikyik betunak.

¹⁸ Ak kobeel inendet torornatetab osnennyi, ak ne bo mbarennyi ne rurei, koboto sobondo ak borto: ak koek ko u ye tanui inendet ne iboti songoliet.

¹⁹ Ak kong’ering’itu ketik che ng’etu che bo osnennyi, kot komuch lakwa koiit.

²⁰ Ak eng’ betunoto ko ma kotiiegei kogeny che king’et eng’ Israel, ak ichek che kichililyo eng’ gotab Jakobo, inendet ne kibirei ichek; ago tiiegei Jehovah iman, Inendet ne Tilil ne bo Israel.

²¹ Weekyingei Kamuktaindet ne bo kamuktaet, ichek che king’et, agot ichek che king’et che bo Jakobo.

²² Agot nganda u biguk che bo Israel ng’aniek che bo nyanjet, koweeksei bik che ng’etu kityo eng’ ichek: kigeng’at kagesunet eng’ ichek, ne ng’elyektoi eng’ imanda.

²³ Amu yaei Kiptaiyat, Jehovah ne bo lugosiek, kagesunet ne kigeng’at, eng’ kwenutab ng’ony tugul.

²⁴ Mwaei anyun Kiptaiyat, Jehovah ne bo lugosiek, kole, Ee bikyuk che menyei Sion, amoiywei Asuria: nganda birin eng’ kirokto, ak konamjin barak agobo inye, ko u biteetab Misri.

²⁵ Amu ta komi kitigin mising’, si kosulda neregek, neregekyuk eng’ ng’emisienywa.

²⁶ Ak kong’eetyi Jehovah ne bo lugosiek inendet biret, ko u barisietab Midianik eng’ ruandetab Oreb: ak tun bou kiroktanyi nyanjet, ak konamji barak ko u biteetab Misri.

²⁷ Ak eng’ betunoto, koistoegei tigikyieng’ung’ lautiennyi, ak koistoegei kaating’ung’ choginnyi, ak keng’em chogit amu kaiilet.

²⁸ Kagoit Aiat, kagosiir Migron; kagonore tugukyik Mikmas:

²⁹ kagoba kosiir ole kibunei; kagoru Geba: botani Rama; kamwei Gibea ne bo Saul.

³⁰ Waach mising’, ee cheptab Galim! Eb it, ee Laisha! Ee inye kibananiat Anatot!

³¹ Kamwei Madmena; iyumigei bik che menyei Gebim si komwei.

³² Tonone Nob eng’ betuni bo rani: ing’wereri tulwetab cheptab Sion, tulwetab Jerusalem.

³³ Ogeero, tun ebei Kiptaiyat, Jehovah ne bo lugosiek, temenik eng’ kamuiset: ak kiluulei che koen, ak kinyeroti che ieetegei.

³⁴ Ak koluule inendet karik osnet ne o, ak koluul Lebanon inendet ne kim.