ESTA 9 - BUKUIT NE TILIL

Kobarei Yahudik bunikwak

¹ Ki eng’ arawetab taman ak aeng’, noto ko arawetab Adar, eng’ betutab taman ak somok ne bo arawanato, ye kingorik koyaak ng’olyotab laitoriat ak ng’atutiennyi, eng’ betut ne kiimang’u bunikab Yahudik kole bou ichek: ko kiwalak anyun ng’olyondonoto, si koboi Yahudik bik che kiwechei ichek;

² koyumgei Yahudik eng’ nganasokwak eng’ emotinwek tugul che bo laitoriat Aasuerus, si konam icheget che kicheng’ei konyalil ichek: ama biit chi ne kiimuch kogirinda ichek; amu kiga koityi bororiosiek tugul kaiyweisiet ne kiiywei Yahudik.

³ Ak kitoret Yahudik kiptainik tugul che bo emotinwek, ak kandoik, ak bounik, ak ichek che kiyaei boisietab laitoriat; amu kiga koityi ichek kaiyweisiet ne kiiywei Mordekai.

⁴ Amu ki o Mordekai eng’ gotab laitoriat, ak kiyom etunatennyi emotinwek tugul: amu kieet Mordekai kotesak ak kotesak.

⁵ Ak kibar Yahudik bunikwak tugul eng’ rotwetab chok, ak eng’ baret, ak eng’ ng’emisiet, ak koyachi bichoto kiwechei ichek, ko u ye kimachei.

⁶ Ak kibar Yahudik murenik bogol mut eng’ Susan, nganaset ne o, ak kong’em.

⁷ Ak kibar Parsandata, Dalpon, ak Aspata,

⁸ ak Porata, Adalia, ak Aritata,

⁹ ak Parmasta, Arisai, Aritai, ak Baisata,

¹⁰ werichoto taman ki bo Haman weritab Hamedata, bunyotab Yahudik; ago ma twa tugukwak.

¹¹ Kigiib kobwa taitab laitoriat eng’ betunoto, koitetab bik che kigibar eng’ Susan, nganaset ne o.

¹² Ak kilenji laitoriat Esta osotiondennyi, Kogobar Yahudik ak kong’em murenik bogol mut eng’ Susan, nganaset ne o, koboto werichoto taman bo Haman; kogoyai anyun ne tai eng’ emotinwek tugul che bo laitoriat! Nee someng’ung’ anyun? Si kegonin. Nee kit ne ta isome? Si keyai.

¹³ Kole anyun Esta, Ngot koboiboi laitoriat, ingigochi Yahudik che mitei Susan koyai mutai agine ng’atutiet ne ka bo rani, ak ingigartat werichoto taman bo Haman eng’ ketit ne kigartate bik.

¹⁴ Ak king’at laitoriat koyaak ko u noto: ak kigigon ng’atutiet eng’ Susan; ak kigigartat werichoto taman bo Haman.

¹⁵ Ak kiiyumgei Yahudik che kimi Susan eng’ betutab taman ak ang’wan eng’ arawanato bo Adar kogeny, ak kobar murenik bogol somok eng’ Susan; ago ma twa tugukwak.

¹⁶ Ak kiiyumgei Yahudik alage che kimi emotinwekab laitoriat, ak kosorgei, ak konyor kamuung’et, amata kobargei ak bunikwak, ak kobar bik che kiwechei ichek, elfusiek tamanwogik tisab ak mut; ago ma twa tugukwak.

¹⁷ Kiyaak ng’olyondonoto eng’ betutab taman ak somok eng’ arawetab Adar; ak kiimuuny eng’ betutab taman ak ang’wan ne bo arawanato, ak kiyai koek betutab igorta ak kagasetab ge.

¹⁸ Ago kiiyumgei Yahudik che kimi Susan eng’ betutab taman ak somok eng’ arawanato, ak eng’ betutab taman ak ang’wan agine; kiimuuny eng’ betutab taman ak mut ne bo arawanato, ak kiyai koek betutab igorta ak kagasetab ge.

¹⁹ Amu noto anyun, yaei Yahudik che bo nganasok che mengechen, che menyei nganasok che ma king’ot, betutab taman ak ang’wan ne bo arawetab Adar koek betutab kagasetab ge ak igorta, ak koek betut ne mie, ak betut ne kiyoktochingei kebeberwek.

Ketau keyaei igortab Purim

²⁰ Ak kisir Mordekai tuguchoto, ak koyoktochi baronok Yahudik tugul che kimi emotinwek tugul che bo laitoriat Aasuerus, che negit ak che looen,

²¹ kong’at ichek kole, korib betutab taman ak ang’wan ne bo arawetab Adar, ak betutab taman ak mut eng’ arawanato, eng’ kenyit age tugul.

²² Koek betusiek che imuunyi Yahudik, che mabaregei ak bunikwak, ak koek arawet ne kigiwale arogenet koek kagasetab ge, ak rirek koek betut ne mie: kole koyachigei koek betusiekab igorta ak kagasetab ge, ak koek ne kiyoktochingei kebeberwek, ak kiyokyi kibananok kagochinoik.

²³ Ak kiiyan Yahudik koyai ko u ye kiga kotoi, ak ko u ye kiga kosirji Mordekai ichek;

²⁴ amu kiga kobwat Haman weritab Hamedata, Agagindet, bunyotab Yahudik tugul, kole kong’em Yahudik, ak koser Pur, noto ko barbarek, kole kobar ichek koges, ak kong’em;

²⁵ ago ye kingoit ng’olyondonoto taitab laitoriat, kong’at eng’ baronok kole koweekyigei metinnyi sogornatennyi ne kiga kochob agobo Yahudik; ak kole kigartati inendet ak werikyik eng’ ketit ne kigartate bik.

²⁶ Kiguure anyun ichek betusiechoto Purim, keguurtoe kainetab Pur. Eng’ noto anyun, amu ng’alek tugul che bo baruanito, ak tuguk che kiga kogeer agobo ng’olyondonito, ak tuguk che kiga kobwanji ichek,

²⁷ kong’at Yahudik kole korib ichek koboto iyotenywa, ak tugul che kinamgei ak icheget, betusiechoto aeng’ ko u ng’olyondenywa, ne kigisir, ak ko u betusiek che kiging’at, eng’ kenyit age tugul, si ma kibagakta;

²⁸ ak kele kibwat ak kerib betusiechoto eng’ ibinda age tugul, ak eng’ gab chi age tugul, eng’ emet age tugul, ak eng’ nganaset age tugul; si mabetyo betusiekab Purim eng’ Yahudik, anan kobet kabwatenywa eng’ iyotenywa.

²⁹ Kisir anyun Esta osotiotab laitoriat, cheptab Abiail, ak Mordekai Yahudiot, eng’ kimnatet tugul ne bo bounatet kogimit baruanito bo aeng’ bo Purim.

³⁰ Ak kiiyokyi baronok Yahudik tugul, che kimi emotinwek bogol ak tiptem ak tisab che bo bounatetab Aasuerus, koboto ng’alekab kalyet ak che bo iman,

³¹ si kogimit betusiechuto bo Purim eng’ betusiekwak che kiging’at, ko u ye kiga ng’at ichek Mordekai Yahudiot, ak Esta osotiotab laitoriat, ak ko u ye kiga kong’atyigei ak iyotenywa, eng’ ng’olyotab karugutetab ge ak rirekwak,

³² ak kiigimit ng’atutietab Esta ng’alechu bo Purim; ak kigisirji bukuit.