ESTA 8 - BUKUIT NE TILIL

Kong’atei laitoriat kosorgei Yahudik

¹ Kiigochi anyun eng’ betunoto laitoriat Aasuerus Esta osotiondennyi, gotab Haman bunyotab Yahudik. Ak kinyo Mordekai taitab laitoriat; amu kiga komwa Esta kit ne kiguuregei ak inendet.

² Ak kiinem laitoriat peteinnyi, ne kiga rebe Haman, ak kogochi Mordekai. Ak kiinde Esta Mordekai koboi gotab Haman.

³ Ak king’alal Esta kogeny eng’ taitab laitoriat, ak kobutyi kelyekyik, kogaigai eng’ beekab kong’ kole koisto yaitietab Haman Agagindet, ak ng’alekyik che yaachen che kimachei koyachi Yahudik.

⁴ Kiiyogochi anyun laitoriat Esta siaritab tahabu. Kong’eet anyun Esta, ak kotonon eng’ taitab laitoriat.

⁵ Ak kole, Ngot koboiboi nito laitoriat, ak ngot ko kaanyoru chamet eng’ tainnyi, ak ngot kogeer laitoriat kole mie ng’olyondonoto, ak aboiboi inendet, ko ingesir kewal baronok che kichobei Haman weritab Hamedata Agagindet, che kisir kole keng’em Yahudik che mi emotinwek tugul che bo laitoriat.

⁶ Amu amuktoi ano amuita ak ageere yaitiet ne nyonjin bikyuk? Anan amuktoi ano amuita ak ageere ng’emisietab tilionutikyuk?

⁷ Kilenji anyun laitoriat Aasuerus Esta osotiondennyi ak Mordekai Yahudiot, Ogeero, kaagochi Esta gotab Haman, ak kogigartat inendet eng’ ketit amu kimachei kobar Yahudik.

⁸ Osirji ak okwek Yahudik, ko u ye omache, eng’ kainetab laitoriat, ak ong’och eng’ peteitab laitoriat: amu maimuchi kowal chi baruet ne kisirei eng’ kainetab laitoriat, ak keng’och eng’ peteitab laitoriat.

⁹ Kigiguur anyun sirikab laitoriat betunoto, eng’ arawetab somok, noto ko arawetab Siban, eng’ betutab tiptem ak somok ne bo arawanato; kigisir ko u tuguk tugul che kiga ng’atyi Mordekai Yahudik, ak kandoik, ak bounik, ak kiptainikab emotinwek, che kimi kong’eete India agoi Etiopia, emotinwek bogol ak tiptem ak tisab, ak kigisirji emet age tugul eng’ sirutikyik, ak bororiet age tugul eng’ kutinywa, ak kigisirji Yahudik ko u sirutikwak, ak eng’ kutinywa.

¹⁰ Ak kisir Mordekai eng’ kainetab laitoriat Aasuerus, ak kong’och eng’ peteitab laitoriat, ak koyoktae baronochoto bik che kibunei mbartanyisiek, che kilanyei mbartanyisiek che chepcheben che kiboisiei eng’ boisietab laitoriat, che kigiichin biusiekab gab laitoriat:

¹¹ kimwa baronochoto kole kogochi laitoriat Yahudik che mi nganaset age tugul koyumgei kosorgei, ak kong’em, ak kobar, ak kolus, kimnatet tugul ne bo bik ak ne bo emet, ne kita inyalili ichek, lagok ak kwonyik, ak koluul tugukab bichoto koek barunenik,

¹² keyai eng’ betut agenge eng’ emotinwek tugul che bo laitoriat Aasuerus, eng’ betutab taman ak somok ne bo arawetab taman ak aeng’, noto ko Adar.

¹³ Kigimwachi bororiosiek tugul ng’alekab sirutichoto che kimwa kole kemwaita ng’atutiet eng’ emet age tugul, ak kele kochopgei Yahudik eng’ betunoto koyaaktochigei mugetut eng’ bunikwak.

¹⁴ Kiba anyun bik che kiga kiyokto kobun mbartanyisiek che chepcheb che kiboisiei eng’ boisietab laitoriat, che kigichirjir, ak kigigiil eng’ ng’atutietab laitoriat; ak kigimwaita ng’atutiet eng’ Susan, nganaset ne o.

¹⁵ Ak kiwa Mordekai eng’ ole mi laitoriat kolaagoti ngoroikab laitornatet che tuuen ne nyalil ak che leelach, kotinyei nariet ne o ne bo tahabu, ak ngoriet ne bo katanit ne kararan ne arus ne birir: ak kiwaach nganasetab Susan kogasgei.

¹⁶ Kitinyei Yahudik lapkeiyet ak kagasetab ge, ak boiboiyet ak teegisto.

¹⁷ Ak kitinyei kagasetab ge ak boiboiyet, igorta ak betut ne o, eng’ emet age tugul ak eng’ nganaset age tugul, oldo tugul ole kiga it ng’olyotab laitoriat ak ng’atutiennyi. Ak kiwalgei bik che chang’ che bo emet koek Yahudik; amu kiga koityi ichek kaiyweisiet ne kiiywei Yahudik.