ESTA 7 - BUKUIT NE TILIL

Komwaitoi Esta ng’alekab Haman, che yaach, ak kigartoti

¹ Kibwa anyun laitoriat ak Haman koam igorta koboto Esta osotiotab laitoriat.

² Ak kimwachi kogeny laitoriat Esta eng’ betut ne bo aeng’ ne bo igortab divaik kolenji, Nee someng’ung’-o, Esta, osotiotab laitoriat? Si kegonin. Ak nee ne isome? Kigonin agot ngo kebebertab bounatet.

³ Kowolji anyun Esta osotiotab laitoriat kole, Ngot ko kaanyoru chamet eng’ taing’ung’, ee laitoriat, ak ngot kobaibai laitoriat, ko ingegona sobondanyu amu somennyu, ak bikyuk amu kioto kasom:

⁴ amu kigealdech, ane ak bikyuk, si kobiit keng’emech, kebarech, ak kelusye. Ago nda kiga kialdech keegu otwogik che murenik ak che kwonyik, ko kota asise, ago ko ma kota imuchi bunyot koyaakyi laitoriat bichu ko ta betos.

⁵ Yeityo komwachi anyun laitoriat Aasuerus Esta osotiondennyi kolenji, Ng’o noto, ak komi ano inendet, ne kogany koyai ko u ni eng’ muguleldanyi?

⁶ Ak kile Esta, Kanyalilindoni ak ko bunyot, sogoranani Haman. Kiarogen anyun Haman eng’ taitab laitoriat ak osotiotab laitoriat.

⁷ King’eet laitoriat eng’ neregek kwo eng’ igorato bo divaik, kwo mbaretab gotab laitoriat: ak kotonon Haman kole kosom Esta osotiotab laitoriat kesor sobondanyi; amu kigeer kole kagobegechi laitoriat koyachi inendet yaitiet.

⁸ Kiweek anyun laitoriat eng’ mbaretab gotab laitoriat, kwo ole kimi igorta ne bo divaik, ak kiga kobutyi Haman kit ne kilyeldoe Esta. Kole anyun laitoriat, Machei kosuub osotiondennyu eng’ tainnyu eng’ go? Ye kita kong’alali ak laitoriat, ketuch togetab Haman.

⁹ Yeityo komwa Harbona, ne ki agenge eng’ ribik che kimi taitab laitoriat kole, Keero, mitei ketit ne kigartate bik, ne bo kakwautik konom che bo eut tonon, ne kiga kochopchi Haman Mordekai, ne kimwa ne mie agobo laitoriat, lumdaat ketoto eng’ gotab Haman. Ak kile laitoriat, Ogartate inendet ketoto.

¹⁰ Kiigartat anyun bichoto Haman eng’ ketit ne kiga kochopchi inendet Mordekai. Kosisyo anyun neregekab laitoriat.