ESTA 6 - BUKUIT NE TILIL

Kebirjin Haman kagochi teegisto Mordekai eng’ taitab bik

¹ Ma imuch laitoriat konuuch kemounoto; ak king’at keib bukuitab sirutik che bo ateptab betusiek, ak kigisoman eng’ taitab laitoriat.

² Ak kiginyor ko sirat kele, Kimwaita Mordekai Bigtana ak Teres, che ki ribik aeng’ che bo laitoriat, che bo icheget che kiribei kurget, che kiga cheng’ kobar laitoriat Aasuerus.

³ Ak kile laitoriat, Nee teegisto ak etunatet ne kigeyachi Mordekai agobo kioto? Kole anyun otwogikab laitoriat che kiboisiechin inendet, Mami kiy ne kigeyachi inendet.

⁴ Ak kile laitoriat, Ng’o ne mi serem? Kiga konyo Haman seremut ne bo sang’ ne bo gotab laitoriat, konyo kong’alalji laitoriat si kigartat Mordekai eng’ ketit ne kiga kochopchi inendet.

⁵ Ak kimwa otwogikab laitoriat, komwachi laitoriat, kolenji, Keero, tononi Haman eng’ serem. Ak kile laitoriat, Ingonyo go.

⁶ Konyo go anyun Haman. Ak kilenji laitoriat inendet, Kiyachin nee chito ne chamei mising’ laitoriat kotoror? Komwa anyun Haman eng’ muguleldanyi kole, Ng’o age ne chamei mising’ laitoriat kotoror kisiira?

⁷ Ak kilenji Haman laitoriat, Chito ne kacham mising’ laitoriat kotoror,

⁸ ko ingeipchi ngoroik che bo laitornatet, che cham kolaachi laitoriat, ak keget mbartanyit ne lanyei laitoriat, ne kiginde metinnyi nariet ne bo laitornatet:

⁹ ak ingigochi ngoroichoto ak mbartanyit chito age eng’ bounik che toogunotin mising’ che bo laitoriat, si kolaakyi chito ne chamei mising’ laitoriat kotoror, ak kogochi kolany mbartanyit kobun oretab nganaset, ak komwaita eng’ tainnyi, kole, Kiyachin ko u noto chito ne chamei mising’ laitoriat kotoror.

¹⁰ Komwachi anyun laitoriat Haman, kolenji, Chakte, ib ngoroik ak ikweri mbartanyit, ko u ye kaimwa, ak iyachi ko u noto Mordekai, ne tebyei eng’ ormarichetab laitoriat: amat kebagakta kiy eng’ choto tugul kaimwa.

¹¹ Kiib anyun Haman ngoroik ak kokweri mbartanyit, kwo kolaakyi Mordekai, ak kogochi kolany mbartanyit kobun oretab nganaset, ak komwaita eng’ tainnyi kole, Kiyachin ko u ni chito ne kacham mising’ laitoriat kotoror.

¹² Ak kinyo kogeny Mordekai ormarichetab laitoriat. Ago kichakta Haman kwo gonnyi, koarogenoti kotugot metinnyi.

¹³ Ak kimwachi Haman Seres osotiondennyi ak choronokyik tugul kit age tugul ne kagoityi inendet. Komwachi anyun bikyik che ng’omen ak osotiondennyi Seres, Haman, kolenji, Ngot ko bo Mordekai oretab Yahudik, inendet ne kaitau ibutyi tainnyi, ko meterteri inendet, ago ibutyini tainnyi.

¹⁴ Ye kita kong’alali ak inendet, kobwa ribikab laitoriat, komut Haman kochogune konyo igorta ne o ne kiga kochob Esta.