ESTA 5 - BUKUIT NE TILIL

Sometab Esta ne kisom laitoriat

¹ Ak eng’ betut ne bo somok, kolaach Esta ngoroikyik che bo laitornatet, ak kotonon eng’ seremut ne bo orit ne bo gotab laitoriat, ne tokyingei gotab laitoriat: ak kitebe laitoriat ng’echerennyi ne bo laitornatet eng’ gotab laitornatet, kotokyigei ole kibunei kebendi go.

² Ak kingogeer laitoriat osotiondennyi Esta kotononi eng’ seremut, konyor chamet eng’ tainnyi: ak kiiyogochi laitoriat Esta siarit ne bo tahabu ne kiting’e eunnyi. Korikta anyun Esta, ak kotwa walitab siarinato.

³ Kolenji anyun laitoriat inendet, Imache nee Esta, osotiondoni bo laitoriat? Ak nee kit ne isome? Kigonin agot ngo kebebertab bounatet.

⁴ Ak kile Esta, Ngot kogeer laitoriat kole mie, ingonyo laitoriat ak Haman rani igorta ne o ne kaachopchi inendet.

⁵ Yeityo komwa laitoriat kole, Omwachi Haman kochok, si kobiit koyaak ko u ye kagomwa Esta. Kinyo anyun laitoriat koboto Haman igorato kagochob Esta.

⁶ Ak kilenji laitoriat Esta komi igortab divaik, Nee someng’ung’? Si kegonin. Ak nee kit ne isome? Agot ngo kebebertab bounatet, keyaei.

⁷ Kiwolji anyun Esta kolenji, Somennyu ak kit ne asome ko:

⁸ Ngot ko kaanyoru chamet eng’ taitab laitoriat, ak ngot koboiboi laitoriat somennyu, koyaiywa anyun kit ne asome, ko ingobwa laitoriat ak Haman igorta ne o ne achopchini ichek, ak ayai mutai ko u ye kagomwa laitoriat.

⁹ Kwo anyun Haman eng’ betunoto kobaibai ak kogasegei eng’ muguleldo: ago ye kingogeer Haman Mordekai eng’ ormarichetab laitoriat, kole ma tonon anan koistochigei inendet, konerekyi Mordekai mising’.

¹⁰ Ago kimuita Haman, kwo ga; ak kiiyokto keguur choronokyik ak Seres osotiondennyi.

¹¹ Ak kimwachi Haman ichek torornatetab magornatosiekyik, ak chang’indab lagokyik, ak tuguk tugul che kiieete laitoriat inendet kosiir bounik ak otwogik che bo laitoriat.

¹² Kile Haman kogeny, Ma chamji Esta osotiotab laitoriat chi age tugul koba ak laitoriat igorta ne o, ne kiga kochob, kobatena; ak kaguura kogeny inendet kebe ak laitoriat mutai.

¹³ Ago maiiti chuto tugul, kota ageere Mordekai Yahudiot kotebyei eng’ ormarichetab laitoriat.

¹⁴ Kolenji anyun Seres osotiondennyi ak choronokyik tugul, Ingelumda ketit ne kigetisie ne bo kakwautik konom che bo eut ne tonon, ak imwachi laitoriat mutai ilenji kigartate kioto Mordekai: yeityo iwe inye igorta eng’ kagasetab ge koboto laitoriat. Ak kiibaibai kioto Haman; ak king’at keyai ketoto kigetisie.