ESTA 3 - BUKUIT NE TILIL

Kogoigoi Haman laitoriat kong’at kebar Yahudik

¹ Kingobata tuguchuto koeet laitoriat Aasuerus Haman weritab Hamedata Agagindet, ak kotoror inendet ak kogochi kotebe ng’echeret ne toror kosiir bounik tugul che kimi koboto inendet.

² Ak kiing’urukso otwogik tugul che bo laitoriat che kimi ormarichetab laitoriat, ak kogonyit Haman: amu kiga kong’at laitoriat ko u noto agobo inendet. Ago kima ing’uruk Mordekai, anan kogonyit inendet.

³ Komwachi anyun otwogikab laitoriat che kimi ormarichetab laitoriat, Mordekai, kolenji, Amu nee si ibistoe ng’atutietab laitoriat?

⁴ Kingong’alaljin anyun inendet eng’ betut age tugul, ak kima kas ichek, komwachi Haman kogeer ngo mie kotebi ng’alekab Mordekai ko u noto: amu kiga komwachi ichek kolenji, a Yahudiot.

⁵ Ak kingogeer Haman kole ma ing’uruk Mordekai, anan kogonyit inendet, konerech mising’.

⁶ Ago kigeer kole matilei kiy kobar Mordekai inegei; amu kiga koborji ichek inendet ole salu bikab Mordekai: kocheng’ anyun Haman kobar Yahudik tugul che kimi bounatet tugul ne bo Aasuerus, choto ko bikab Mordekai.

⁷ Eng’ arawet ne bo tai, noto ko arawetab Nisan, eng’ kenyitab taman ak aeng’ ne bo laitoriat Aasuerus, koser Pur, noto ko barbarek, eng’ taitab Haman, koboch betut agoi betut, ak koboch arawet agoi arawet, agoi arawetab taman ak aeng’, noto ko arawetab Adar.

⁸ Ak kilenji Haman laitoriat Aasuerus, Mi bik alak che kiyom emet ak koiyestaat eng’ kwenutab bik eng’ emotinwek tugul che bo bounateng’ung’, ak terjin ng’atutikwak ak che bo bik alak tugul; ama ribei ichek ng’atutikab laitoriat: matoreti kiy anyun eng’ laitoriat kobagakta ichek.

⁹ Ngot kochamei laitoriat, ingesir kele kebar ichek: ak agochi bik che tononjin boisionoto, talentaisiek elfusiek taman che bo feda, koib kobwa ole kigonore tugukab laitoriat.

¹⁰ Kiinem anyun laitoriat peteit eng’ eunnyi, ak kogochi Haman weritab Hamedata Agagindet, ne ki bunyotab Yahudik.

¹¹ Ak kilenji laitoriat Haman, Kagigonin feda, ak bik agichek, si kobiit iyachi ko u ye igeere ile mie.

¹² Kigiguur anyun sirikab laitoriat kobwa eng’ arawet ne bo tai eng’ betutab taman ak somok, ak kigisir ko u tugul che king’at Haman, kong’atyi kiptainikab laitoriat, ak bounik che kibou emet age tugul, ak bounikab bororiet age tugul; kigisirji emet age tugul ko u sirennyi, ak bororiet age tugul ko u kutinywa; kigisir eng’ kainetab laitoriat Aasuerus, ak kiging’och eng’ peteitab laitoriat.

¹³ Ak kigiyokto baronok, kiyoktae bik koba emotinwek tugul che bo laitoriat, kelenji, keng’em, kebar, kilus, Yahudik tugul, neranik ak che osen, lagok che mengechen ak kwonyik, eng’ betut agenge, eng’ betutab taman ak somok eng’ arawetab taman ak aeng’, noto ko arawetab Adar, ak konam tugukwak koek barunenik.

¹⁴ Ak kigimwachi bororiosiek tugul ng’alekab sirutichoto, si kobiit kigoito ng’atutiet eng’ emet age tugul, si kochobogis agobo betunoto.

¹⁵ Kiba anyun bik che kiga kiyokto kochakta eng’ ng’atutietab laitoriat, ak kigigon ng’atutionoto eng’ Susan, nganaset ne o: ak kiteb ng’ony laitoriat ak Haman koeeiso; ago kiimgei nganasetab Susan.