EPESOEK 2 - BUKUIT NE TILIL

Biitune sorunet mieindab Jehovah

¹ Ak kigosobok okwek, ye kio begunotin eng’ yaitwogikwok ak tengekwogikwok,

² che kiobendote ye kinye ko u biteetab ng’onyuni, osubi ne o ne bo kimnatet ne bo soet, ne bo tamirmiriet ne boisiei nguno eng’ werikab ngelelnatet;

³ che kigimenye agot achek tugul kwenunywa eng’ magutik che yaach che bo borto, keyae magutik che bo borto ak che bo kabwatutik, ak kigi lagokab nereknatet, eng’ siget, ko u alak:

⁴ ago Jehovah, ne magoriot eng’ rirenetab ge, eng’ chamnyennyi ne o ne kichamenech,

⁵ agot ye kigi begunotin eng’ yaitwogikyok, ko kiisoobech koboto Kristo (kigesoruok eng’ mieindo),

⁶ ak kiing’eetech koboto inendet, ak kigonech ketebi koboto inendet eng’ komoswekab kipsengwet, eng’ Kristo Jesu:

⁷ si kobiit kobarta eng’ kenyisiek che bwanei magornatosiek che siirtoot che bo mieindanyi eng’ talasiet ne tokyineigei eng’ Kristo Jesu:

⁸ amu kigesoruok eng’ mieindo eng’ kayanet; ago mabunwok nito: konunetab Jehovah;

⁹ ama bo boisionik, si mailosgei chi.

¹⁰ Amu ki boisiennyi achek, ne kigiyaech eng’ Kristo Jesu agobo boisionik che miachen, che kisib kochob Jehovah si kebendate ichek.

Kituitos eng’ kaniset Bororiosiek ak Yahudik

¹¹ Noto anyun obwat, ole okwek, che kio Bororiosiek eng’ borto atkinye, che kiguurenok che Ma Kimuratan eng’ ichek che kiguure Kamuratanet, eng’ borto, ne kigiyae eunek;

¹² ole kiomi taban eng’ Kristo eng’ betusiechoto, che kio kipsagarek eng’ bororietab Israel, ak ki o toek eng’ kayomisutik che bo arorutiet, kima otinye kamang’unet ak kima otinye Jehovah eng’ ng’onyuni.

¹³ Ago nguno eng’ Kristo Jesu okwek che kio looen eng’ betusiek alak, ko kagegonok origu eng’ korotikab Kristo.

¹⁴ Amu inendet ko kalyennyo, ne kiyai tuwai koek agenge, ne kibut totetab kwen ne bo kaoiyet,

¹⁵ ko kagowong’ eng’ bortanyi bunyondit, ng’atutietab ng’atutik ne mitei eng’ kayomisutik; si kobiit kotoi koyai eng’ inendet choto aeng’ koek chito agenge ne leel koyai kalyet;

¹⁶ ak kotuiyo ichek tuwai eng’ borto agenge ak Jehovah eng’ kimurtoiyot, ko kagobar bunyondit eng’ noto.

¹⁷ Ak kinyo koamwok kalyet okwek che kio looen, ak kalyet eng’ ichek che ki negiten:

¹⁸ amu kinyoru achek tuwai eng’ inendet orennyo eng’ Tamirmiriet agenge, ne kiite ole mi Kwanda.

¹⁹ Noto anyun ma ko o toek ak bunotik ago o bikab nganaset agenge ak che tililen, ak che bo gotab Jehovah.

²⁰ Kigeteechak eng’ lumdaetab che kiyoktoi ak maotik, Kristo Jesu inendet ko koita ne o ne bo luita;

²¹ ne kituiyechin teekset age tugul ne kiginamnyo koek agenge, koeet koek hekalut ne tilil eng’ Kiptaiyat;

²² kigiteechak ak okwek oegu agenge eng’ inendet, ole menyei Jehovah eng’ Tamirmiriet.