Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

ATEPTAP LAWIK 9 - BUKUIT NE TILIL


Kindoi Aron ak werikyik boisietab tiseinatet

1 Ak eng’ betutab sisiit, koguur Musa Aron ak werikyik koboto boisiekab Israel;

2 ak kolenji Aron, Kweri kirgit ne ming’in koek kagochinetab tengekto, ak mengit koek kagochinet ne kibeelei, che libwoben, igoite eng’ taitab Jehovah.

3 Ak ng’alalji lagokab Israel, ilenji, Okweri kwesta koek kagochinet ne bo tengekto; ak moita ak aruetab kechir, ne masiirei kenyit agenge tuwai, che libwoben kobunji kagochinet ne kibeelei:

4 ak kirgit ak mengit kobunji kagochinoikab kalyet, che kienyei eng’ taitab Jehovah; ak kagochinetab busiek che kagiburukto mwaita: amu mong’jinok Jehovah rani.

5 Ak kiget choto king’at Musa kobwa taitab emait ne kituiyechin: ak kibwa tuiyet komugul korik, nyo kotononso eng’ taitab Jehovah.

6 Ak kimwa Musa kole, Ni kit ne king’at Jehovah kole oyai: ak komong’jok lilindab Jehovah.

7 Ak kilenji Musa Aron, Rikyi kaptisisiet, igoite kagochineng’ung’ ne bo tengekto, ak kagochineng’ung’ ne kibeelei, ak iyachigei kagaigaet ak iyachi bik: ak igoite kagochinet ne bo bik: ak iyai kagaigaet agobo ichek; ko u ye king’at Jehovah.

8 Ak kirikyi anyun Aron kaptisisiet, ak koeny moita ne bo kagochinetab tengekto, ne kibunji inendet.

9 Yeityo kogochi werikyik Aron, korotik; ak kiirookta mornennyi korotik, ak koiilate kuinoikab kaptisisiet, ak kotumji korotik kaptisisiet kel:

10 ago kibeel mwanik, koboto soromok, ak kwambeleliet ne mi koet ne bo kagochinetab tengekto, eng’ kaptisisiet; ko u ye king’at Jehovah Musa.

11 Ak kibeel eng’ ma banyek ak muito eng’ sang’utab nganaset.

12 Ak kieny kagochinet ne kibeelei; ak kiib werikyik korotik koba ole mi Aron, ak kiisote kaptisiet komoswek tugul.

13 Ak kiipchi inendet kagochinet ne kibeelei, kiigoito kobun kebeberwek, ak metit: ak kibeel eng’ kaptisisiet.

14 Ak kiun tugukab ke ak kelyek, ak kobeel eng’ baragutab kagochinet ne kibeelei eng’ kaptisisiet.

15 Ak kiigoito inendet kagochinetab bik, ak kokweri kwesta ne bo kagochinetab tengekto ne bo bik, ak koeny, ak kogoito agobo tengekto ko u ni ka bo tai.

16 Yeityo kogoito kagochinet ne kibeelei, ak kogoito ko u ng’atutiet.

17 Ak kiigoito kagochinetab busiek, ak kimugut konyi eut, ak kobeel eng’ kaptisisionoto, koboto kagochinet ne kibeelei karon agine.

18 Ak kieny kirgit koboto mengit, tiseiywotab kagochinoikab kalyet, che ki bo bik: ak kiib werikab Aron korotik kogochi inendet, ak kiise kaptisisiet komoswek tugul,

19 ak mwanikab kirgit, ak che bo mengit, ak saruriennyi, ak che kiilaach moet, ak soromok, ak kwambeleliet ne bo koet:

20 ak kiigonoor mwanichoto tagatok, ak kobeel mwanichoto eng’ kaptisisiet:

21 ak kiongoi Aron tagatok ak chatit ne bo komostab tai koek kagochinet ne kiongoi eng’ taitab Jehovah; ko u ye king’at Musa.

22 Ak kiito Aron eunekyik kotokyi ole mi bik, ak koberur ichek; yeityo kochorgei ko kagogoito kagochinetab tengekto, ak kagochinet ne kibeelei, ak kagochinoikab kalyet.

23 Ak kiba Musa ak Aron emait ne kituiyechin, yeityo komong’, ak koberur bik: ak komong’ji lilindab Jehovah bik tugul.

24 Ak kimong’ mat kobunu taitab Jehovah, ak kobeel kagochinet ne kibeelei ak mwanik eng’ kaptisisiet: ak ye kingogeer bik tugul, kowaach, ak kobutyo kot kotiiny togochikwak ng’ony.

God's word open for all

©Bible Society of Kenya, 2020

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ