ATEPTAP LAWIK 7 - BUKUIT NE TILIL

¹ Ni ng’atutietab kagochinetab chalwokto: tilil nito mising’.

² Kieng’e kagochinetab chalwokto ole kieng’e kagochinet ne kibeelei: ak koise korotikyik kaptisisiet komoswek tugul.

³ Ak igoitoi inendet eng’ banyechato mwanikyik tugul; saruriet, ak mwanik che kiilaach moet,

⁴ ak soromok tuwai, ak mwanik che kiilaach soromochoto, che mi ole negite kipkitit, ak kwambeleliet ne mitei koet, koboto soromok, ingonem choto:

⁵ ak kobeel tisiindet choto eng’ kaptisisiet koek kagochinet ne kigochin Jehovah kobunei mat: nito kagochinetab chalwokto.

⁶ Amei mureno age tugul eng’ tisiik banyechato: kiamei eng’ komosta ne tilil: tilil nito mising’.

⁷ Ko u ole teptoi kagochinetab tengekto, ko u noto agine kagochinetab chalwokto: agenge ng’atutienywa: bunjin choto tisiindet ne yaei kagaigaet agobo tuguchoto.

⁸ Tisiindet ne igoitoi kagochinet ne kibeelei ne bo chi age tugul, kobunjin inendet magatet anan ko muitab kagochinonoto kibeelei, noto kagogoito.

⁹ Bunjin tisiindet ne igoitoi kagochinet, kagochinet age tugul ne bo busiek che kibeelei eng’ ma, ak che kigelei eng’ tabetab karnet, ak che kigelei eng’ karnet ne lebel.

¹⁰ Ak kagochinet age tugul ne bo busiek, ne kiburuktoi mwaita, anan ko ne yaamat, bunjin choto tugul werikab Aron, pcheei koaechin.

¹¹ Ni ng’atutietab tiseiywotab kagochinoik che bo kalyet, ne igochin chi Jehovah.

¹² Ngogoitoi agobo kongoi, kogoitoi anyun koboto tiseiywotab kongoi, makatinik che mengechen che ma kinde mermerek che kikwang’doi mwaita, ak makatinik che terteren che ma kinde mermerek che kiile mwaita, ak makatinikab busiek che tambulul che kikwang’doi mwaita, che kagotangusitu.

¹³ Igoitoi kagochinennyi koboto makatinik che mengechen che kaginde mermerek, koboto tiseiywotab kagochinoikyik che bo kalyet koek che bo kongoi.

¹⁴ Ak igoitoi agenge eng’ choto ne bunu kagochinet age tugul, koek kagochinet ne kinamjin barak, kigochin Jehovah; bunjin tisiindet ne isisie korotikab kagochinoikab kalyet.

¹⁵ Kiamei banyekab tiseiywot ne bo kagochinoikyik che bo kalyet, che bo kongoi, eng’ betunoto bo kagochinennyi, maituuchi agot kitigin kot koeekyi.

¹⁶ Ago ngo kayosiet tiseiywotab kagochinennyi, anan kagochinet ne igoitoi ko u ye kacham, keamei eng’ betunoto igoitoi tiseiywondennyi: ak keamei eng’ betutab aeng’ che kong’et eng’ choto:

¹⁷ ago che kong’etune banyekab tiseiywot kot koit betutab somok, kebeelei eng’ ma.

¹⁸ Ak ngeam banyekab tiseiywot ne bo kagochinoikyik che bo kalyet eng’ betutab somok, ko magitaachei, ak magiityin inendet ne igoitoi: kiiti kele kagong’wanit, ak ibei tengektanyi chito ne amei choto.

¹⁹ Ak magiamei banyek che katwa kiy age tugul ne ng’wan; kibeelei eng’ ma. Ak amei banyechato age tugul ne tilil.

²⁰ Ago chito ne amei banyekab tiseiywotab kagochinoik che bo kalyet, che bo Jehovah, kotinyei muruonindanyi, king’etoi chichoto eng’ bikyik.

²¹ Ak ye katwa chi age tugul kiy ne ng’wan, muruonindab chi, anan tiony ne ng’wan, anan kiy age tugul ne kiwechei ne ng’wan, yeityo koam banyekab tiseiywot ne bo kagochinoikab kalyet, che bo Jehovah, king’etoi chichoto eng’ bikyik.

²² Ak king’alalji Jehovah Musa kolenji,

²³ Mwachi lagokab Israel, ilenji, Amat oam mwanik alak tugul, che bo kiruk, anan kechir, anan ko ng’oror.

²⁴ Ak kimuchi keboisie eng’ boision alak, mwaitab ne kameei inegei, ak mwaitab ne katon tiong’ik: ago amat oam.

²⁵ Amu age tugul ne amei mwaitab tany, ne igoitoi bik koek kagochinet ne kigochin Jehovah kobunei mat, king’etoi eng’ bikyik chichoto amei.

²⁶ Amat oam korotik alak tugul, agot che bo tarit anan che bo tiony, eng’ meng’otosiekwok alak tugul.

²⁷ King’etoi eng’ bikyik chi age tugul ne eei korotik alak tugul.

²⁸ Ak king’alalji Jehovah Musa kolenji,

²⁹ Mwachi lagokab Israel, ilenji, Inendet ne igoitoi tiseiywotab kagochinoikyik che bo kalyet, kogochin Jehovah, koipchin kagochinennyi Jehovah eng’ tiseiywotab kagochinoikyik che bo kalyet:

³⁰ ibu inendet eng’ eunekyik kagochinoikab Jehovah che bunei mat; ibu mwanik koboto tagatet, si keongoi tagatet koek kagochinet ne kiongoi eng’ taitab Jehovah.

³¹ Yeityo kobeel tisiindet mwanik eng’ kaptisisiet: ago bunjin Aron ak werikyik tagatet.

³² Ak ogochi tisiindet chatit ne bo komostab tai koek kagochinet ne kinamji barak, ne bunu tiseiywekab kagochinoikwok che bo kalyet.

³³ Ibei inendet eng’ werikab Aron ne igoitoi korotikab kagochinoikab kalyet, ak mwanik, ak chatit ne bo komostab tai, koek kebebertanyi.

³⁴ Amu kaataach eng’ lagokab Israel kagochinetab tagatet ne kiongoi, ak kagochinetab chatit ne kinamjin barak, kobunu tiseiywek che bo kagochinoikwak che bo kalyet; ak kaagochi Aron tisiindet ak werikyik tuguchoto, kobunu lagokab Israel, koek ng’atutiet ne wendi agoi koigeny.

³⁵ Nito kebebertab kaiilset ne bo Aron, ak kebebertab kaiilset ne bo werikyik, che bunu kagochinoik che kigochin Jehovah, kobunei mat, eng’ betut ne kiindoi inendet ichek koboisiechi Jehovah eng’ boisietab tiseinatet;

³⁶ che king’at Jehovah lagokab Israel kole kigochi, eng’ betut ne kiili inendet ichek. Ng’atutiet nito agoi koigeny eng’ ibinwekwak tugul.

³⁷ Nito ng’atutietab kagochinet ne kibeelei, ak ne bo kagochjinetab busiek, ak ne bo kagochinetab tengekto, ak ne bo kagochinetab chalwokto, ak ne bo katabanet, ak ne bo tiseiywotab kagochinoik che bo kalyet;

³⁸ che king’at Jehovah Musa eng’ tulwetab Sinai, eng’ betut ne king’at inendet lagokab Israel, kogochi Jehovah kagochinoikwak, eng’ ong’atetab Sinai.