ATEPTAP LAWIK 4 - BUKUIT NE TILIL

Kagochinetab tengekto

¹ King’alalji Jehovah Musa kolenji,

² Mwachi lagokab Israel, ilenji, Ngo yai chi age tugul tengek, ama eng’ kwetyinet, eng’ kiy age tugul ne king’at Jehovah kole, amat oyai, ak ngo yai age tugul eng’ choto;

³ ak ngo yai tengekto tisiindet ne kigiil kot koipchi bik ng’ogisto: ingogoito anyun kirgit ne neran ne libwob kogochi Jehovah, amu tengektanyi ne kogoyai, koek kagochinetab tengekto.

⁴ Ak ingoget kirgoto konyo kurgetab emait ne kituiyechin eng’ taitab Jehovah, ak kogonoor eunnyi metitab kirgoto, yeityo koeny kirgoto eng’ taitab Jehovah.

⁵ Ak kotaach tisiindet ne kigiil korotikab kirgoto, ak koib kobwa emait ne kituiyechin:

⁶ yeityo korooch mornennyi korotik, ak koisisie korotichoto konyil tisab eng’ taitab Jehovah, eng’ taitab anget ne ioitos got, ne bo ole tilil.

⁷ Ye ibata konde tisiindet alak eng’ korotichoto kuinoikab kapkorosut ne bo nyamdutik che ng’uu ne anyin, che kibeelei eng’ taitab Jehovah, noto mi emait ne kituiyechin; ak ingotumji inendet korotik tugul che bo kirgoto kaptisisiet kel ne kibeele kagochinoik, ne mitei kurgetab emait ne kituiyechin.

⁸ Ak kobut mwanik tugul che bo kirgoto bo kagochinetab tengekto; mwanik che kiilaach moet, ak sunetik tugul che bo mo;

⁹ koboto soromok tuwai, ak mwanik che kiilaach moet, che mi ole negite sugulumdo, ak kwambeleliet ne mitei koet, koboto soromok, ingonem choto,

¹⁰ ko u ye kibutei che bo kirgit ne tiseiywotab kagochinoikab kalyet: yeityo kobeel tisiindet choto eng’ kaptisisiet ne kibeele kagochinoik.

¹¹ Ak muitab kirgoto, ak banyekyik tugul, koboto metinnyi, ak kelyekyik, ak tugukyik bo ke, ak eiyandennyi,

¹² ingoib kirgoto komugul kwo komosta ne tilil eng’ sang’utab nganaset, ole kitumjin orek, ak kobeel eng’ kwenik barak che mi ma: kibeele ole kitumjin orek.

¹³ Ak ngo lel tuiyet komugul ne bo Israel, ak ngo ung’ak lelutionoto eng’ taitab tuiyet, ak ngo kiyai ichek kiy age tugul ne king’at Jehovah kole amat oyai, ak konam ichek tengekto;

¹⁴ ak ye kagonaak lelutionoto kayai, kogoitoi anyun tuiyet kirgit ne neran koek kagochinet ne bo tengekto, yeityo koget konyo taitab emait ne kituiyechin.

¹⁵ Ak ingogonoor boisiekab tuiyet eunekwak metitab kirgoto eng’ taitab Jehovah; yeityo kebar kirgoto eng’ taitab Jehovah.

¹⁶ Ye ibata koib tisiindet ne kigiil korotikab kirgoto kobwa emait ne kituiyechin:

¹⁷ ak korooch tisiindet mornennyi korotik, ak koisisie eng’ taitab Jehovah konyil tisab, eng’ taitab anganato kigioiye got.

¹⁸ Yeityo konde korotichoto alak kuinoikab kapkorosut ne mitei taitab Jehovah, ne mi emait ne kituiyechin, ak korong’ji korotik tugul kelutab kaptisisiet ne kibeele kagochinoik, ne mitei kurgetab emait ne kituiyechin.

¹⁹ Ak kobut mwanikyik tugul, ak kobeel eng’ kaptisisiet.

²⁰ Ingoyachi ko u noto kirgoto; ko u ye kiyachi kirgit ne bo kagochinetab tengekto, yachin nito agine ko u noto: ak koyai tisiindet kagaigaet agobo ichek, ak kenyochi kaat.

²¹ Ak ingola inendet kirgit kwo sang’utab nganaset, ak kobeel ko u ye kiga beel kirgit ne bo tai: nito ko kagochinetab tengekto ne bo tuiyet.

²² Ak ye kalel bounindet, koyai ama nai, kiy age tugul ne king’at Jehovah Kamuktaindennyi kole, amat oyai, ak konam inendet tengekto;

²³ ak ngiborji inendet tengektanyi ne kiyai, koget ng’ororiet kobunji kagochinennyi, kwesta ne libwob;

²⁴ ak kogonoor eunnyi metitab ng’ororianato, ak koeny eng’ ole kieng’e kagochinoik che kibeelei eng’ taitab Jehovah: nito kagochinetab tengekto.

²⁵ Ak konam tisiindet korotichoto bo kagochinetab tengekto, eng’ mornennyi, ak koiilate kuinoikab kaptisisiet ne bo kagochinoik che kibeelei, ak korong’ji korotikyik kelutab kaptisisiet, ne kibeele kagochinoik.

²⁶ Ak kobeel mwanikyik tugul eng’ kaptisisiet, ko u ye kiyachin mwanikab tiseiywot ne bo kagochinoikab kalyet: ak koyai kagaigaet tisiindet agobo inendet amu tengektanyi, ak kenyochi kaat.

²⁷ Ngo lel chi age tugul ne bo tuiyet, kong’em kiy age tugul ne king’at Jehovah kole amat oyai, ak konam tengekto;

²⁸ ak ngiborji inendet tengektanyi ne koyai koget anyun ng’ororiet koek kagochinennyi, iyuoget ne libwob, kobunji tengektanyi ne koyai.

²⁹ Ak kogonoor eunnyi metitab kagochinonoto bo tengekto, ak koeny kagochinonoto bo tengekto eng’ oldab kagochinoik che kibeelei.

³⁰ Ak konam tisiindet korotikab artanato eng’ mornennyi, ak koiilate kuinoikab kaptisisiet ne bo kagochinoik che kibeelei, ak korong’ji korotik tugul che bo artanato, kelutab kaptisisiet.

³¹ Ak kobut mwanikyik tugul, ko u ye kibutei mwanikab tiseiywot ne bo kagochinoikab kalyet; yeityo kobeel tisiindet eng’ kaptisisiet koek nyamdutiet ne anyiny eng’ Jehovah; ak koyai tisiindet kagaigaet agobo inendet, ak kenyochi kaat.

³² Ngo kagochinennyi ne bo tengekto ko kechiriet, koget subendo ne libwob.

³³ Ak kogonoor eunnyi metitab kagochinonoto bo tengekto, ak koeny koek kagochinetab tengekto eng’ ole kieng’e kagochinoik che kibeelei.

³⁴ Ak konam tisiindet korotichoto bo kagochinetab tengekto, eng’ mornennyi, ak koiilate kuinoikab kaptisisiet ne bo kagochinoik che kibeelei, ak korong’ji korotikyik tugul, kelutab kaptisisiet;

³⁵ ak kobut mwanikyik tugul, ko u ye kibutei mwanikab kechiriet ne bo tiseiywotab kagochinoikab kalyet; ak ingobeel tisiindet choto eng’ kaptisisiet, konde baragutab kagochinoikab Jehovah, che bunei mat; ak koyai tisiindet kagaigaet agobo inendet amu tengektanyi ne koyai, ak kenyochi kaat.