ATEPTAP LAWIK 3 - BUKUIT NE TILIL

Kagochinoikab kalyet

¹ Ak ngo kagochinennyi ko tiseiywotab kalyet; ingogoitoi ne bo tuga, ngo kirgit anan ko roriat, kogoitoi ne libwob eng’ taitab Jehovah.

² Ye ibata kogonoor eunnyi metitab kagochinennyi, ak koeny eng’ kurgetab emait ne kituiyechin: ak koisot tisiik werikab Aron kaptisisiet komoswek tugul eng’ korotik.

³ Ak igoitoi inendet eng’ tiseiywotab kalyet kagochinet ne kigochin Jehovah kobunei mat; mwanik che kiilaach moet, ak sunetik tugul che bo mo,

⁴ ak soromokyik tuwai koboto mwanikwak, che mi ole negite sugulumdo, ak kwambeleliet ne mitei koet, koboto soromok, ingoisto choto.

⁵ Ak kobeel werikab Aron choto eng’ kaptisisiet konde baragutab tiseiywot ne kibeelei, ne mi kwenik che mi ma: nito kagochinet ne bunei mat, nyamdutiet ne anyiny eng’ Jehovah.

⁶ Ak ngo bo nego kagochinennyi ne bo tiseiywotab kalyet ne ipchin Jehovah; ngo mengit anan kwesta, anan ko subendo, kogoitoi ne libwob.

⁷ Ak ngogoitoi mengit koek kagochinennyi, kogoitoi eng’ taitab Jehovah;

⁸ ak kogonoor eunnyi metitab kagochinennyi, ak koeny eng’ taitab emait ne kituiyechin: ak koisot werikab Aron kaptisisiet komoswek tugul eng’ korotik.

⁹ Ak kogoito che bo tiseiywotab kalyet koek kagochinet ne bunei mat ne kigochin Jehovah; mwanikyik, ak saruriennyi komugul, ingotil koges eng’ kipkitit; ak mwanik che kiilaach moet, ak sunetik tugul che bo mo,

¹⁰ ak soromok tuwai, ak mwanik che kiilaach soromochoto, che mi ole negite kipkitit, ak kwambeleliet ne mitei koet, koboto soromok, ingonem choto.

¹¹ Ak kobeel tisiindet choto eng’ kaptisisiet: choto amitwogikab kagochinet ne kigochin Jehovah kobunei mat.

¹² Ak ngo bo ng’ororiet kagochinennyi, kogoitoi anyun eng’ taitab Jehovah;

¹³ ak kogonoor eunnyi metitab ng’ororianato, yeityo koeny eng’ taitab emait ne kituiyechin: ak koisote werikab Aron kaptisisiet korotik komoswek tugul.

¹⁴ Ak igochin inendet Jehovah eng’ choto kagochinet ne bunei mat; mwanik che kiilaach moet, ak sunetik tugul che bo mo,

¹⁵ ak soromok tuwai, ak mwanik che kiilaach soromochoto; che mi ole negite kipkitit, ak kwambeleliet ne mitei koet, koboto soromok, ingonem choto.

¹⁶ Ak kobeel tisiindet choto eng’ kaptisisiet; amitwogikab kagochinet chuto, che bunei mat, koek nyamdutiet ne anyiny: bo Jehovah mwanik tugul.

¹⁷ Egu nito ng’atutiet ne bo agoi eng’ ibinwekwok tugul eng’ meng’otosiekwok tugul, ale amat oam mwanik ak korotik.