ATEPTAP LAWIK 2 - BUKUIT NE TILIL

Kagochinetab busiek

¹ Ak ye igoitoi chi age tugul kagochinet ne bo busiek ne igochin Jehovah, ingoek kagochinennyi busiek che tambulul; ak korong’ji mwaita busiechoto, ak konde tuguk che nyamdut agichek:

² ak koipchi inendet werikab Aron tisiik: ak komugut konyi eut busiechoto tambulul, koboto mwaitanyi, koboto ubani tugul; ak ingobeel tisiindet koek kabwatet ne bo noto eng’ kaptisisiet, kagochinet ne bunei mat, nyamdutiet ne anyiny eng’ Jehovah:

³ ak kobunji Aron ak werikyik che kang’et eng’ kagochinet ne bo busiek: tilil mising’ nito kot kosiir, eng’ kagochinoik tugul che bo Jehovah, che bunei mat.

⁴ Ak ye igoitoi inye kagochinet ne bo busiek che kiwatani eng’ ma, igoitoi makatinik che ma kinde mermerek che bo busiek che tambulul che kagiburukto mwaita, anan makatinik che terteren che kagiile mwaita, che ma kinde mermerek.

⁵ Ak ngo kagochineng’ung’ ko kagochinet ne bo busiek che kagiwatan eng’ karnet ne lebel, ingoek che bo busiek che tambululen che kagiburukto mwaita, che ma kinde mermerek.

⁶ Ak itilate komengegitu, ak irong’ji mwaita: noto kagochinet ne bo busiek.

⁷ Ak ngo bo busiek kagochineng’ung’ che kagiwatan eng’ tabetab karnet, kechobei busiek che tambululen che kagiburukto mwaita.

⁸ Ak iipchi Jehovah kagochinetab busiek che kagechob eng’ tuguchuto: si keipchi tisiindet, ak koib inendet kwo kaptisisiet.

⁹ Yeityo konem tisiindet che bo kabwatet eng’ kagochinonoto bo busiek, ak kobeel noto eng’ kaptisisiet: kagochinet ne kibeelei, ne nyamdutiet ne anyiny eng’ Jehovah.

¹⁰ Ak kobunji Aron ak werikyik choto kong’et eng’ kagochinetab busiek: tilil mising’ nito kot kosiir, eng’ kagochinoik tugul che bo Jehovah che bunei mat.

¹¹ Amat onde mermerek kagochinet age tugul ne bo busiek ne ogochini Jehovah: amu mobeele mermerek, anan kumiat age tugul, koek kagochinet ne kigochin Jehovah, kobunei mat.

¹² Ogochini Jehovah, koek kagochinetab tongoanik: ago amat keib koba kaptisisiet koek nyamdutiet ne anyiny.

¹³ Ak inde munyuk kagochineng’ung’ age tugul ne bo busiek; amengorartae kagochinetab busiek munyuk che bo kayomisetab Kamuktaindeng’ung’: igoitoi munyuk koboto kagochinoiguk tugul.

¹⁴ Ak ngigochi Jehovah kagochinetab busiek che bo tongoanik, igoitoi anyun kagochinonoto bo busiek, che bo tongoaniguk, che bunu itikab bek che kaginde ma, bek che neriotin, che kagitui.

¹⁵ Ak irong’ji mwaita, ak inde tuguk che nyamdut: nito ko kagochinet ne bo busiek.

¹⁶ Ak kobeel tisiindet kabwatet ne bo noto, kebebertab bekyik che kagitui, ak kebebertab mwaitanyi, koboto ubanikyik tugul: nito kagochinet ne kigochin Jehovah kobunei mat.