ATEPTAP LAWIK 1 - BUKUIT NE TILIL

Tiseiywekab kogochinoik che kibeelei

¹ Kiguur Jehovah Musa ak kong’alalji eng’ emait ne kituiyechin, kolenji,

² Mwachi lagokab Israel ilenji, Ye igoitoi chi age tugul eng’ okwek kagochinet, kogochin Jehovah, ogoitoi che bo akwotisiekwok, che bo tuga ak che bo nego.

³ Ngo kagochinennyi ko bo tiseiywot ne kibeelei ne bo tuga, kogoitoi kirgit ne libwob: ingokweri kwo emait ne kituiyechin, si kochamak eng’ taitab Jehovah.

⁴ Ak kogonoor eunnyi metitab kagochinonoto kibeelei; ak ketaach noto agobo inendet si kobiit keyachi inendet kagaigaet.

⁵ Ak koeny kirgoto eng’ taitab Jehovah: ak koib korotik tisiik, werikab Aron, ak koisote kaptisisiet komoswek tugul, ne mi ole negite kurgetab emait ne kituiyechin.

⁶ Ak koeny kagochinonoto kibeelei, yeityo kosach banyechato kobiit kebeberwekyik.

⁷ Ingonde mat kaptisisiet werikab Aron tisiindet ak kotetyi kwenik ma:

⁸ ye ibata kotet tisiik werikab Aron, banyechato kagesach, metit, ak mwanikyik, eng’ kwenik barak che mi mat ne mi kaptisisiet:

⁹ ago ingoun eng’ beek tugukab ke koboto kelyekyik: ak kobeel tisiindet kirgoto komugul eng’ kaptisisiet, koek tiseiywot ne kibeelei, kagochinet ne bunei mat, nyamdutiet ne anyiny eng’ Jehovah.

¹⁰ Ak ngo bo nego kagochinennyi, che bo kechirek, anan che bo ng’ororek, kobunji kagochinet ne kibeelei; kogoitoi mengit anan kwesta ne libwob.

¹¹ Ak ingoeny eng’ taitab Jehovah eng’ kaptisisiet ole tokyingei murot ne bo katam: ye ibata koisote korotik tisiik werikab Aron, kaptisisiet komoswek tugul.

¹² Yeityo kosach banyek, kobiit kebeberwekyik, koboto metitab artanato ak mwanikyik; ak kotet tuguchoto eng’ kwenik barak che mi mat ne mi kaptisisiet:

¹³ ago ingoun tugukab ke ak kelyek eng’ beek: ak ingogoito tisiindet banyek tugul, ak kobeel eng’ kaptisisiet: kagochinet nito ne kibeelei, kagochinet ne bunei mat, nyamdutiet ne anyiny eng’ Jehovah.

¹⁴ Ak ngo bo taritik kagochinennyi ne kigoitoi kebeel, ne igochin Jehovah, kogoitoi anyun kagochinennyi ne bo cheptugenik, anan arekab tarit.

¹⁵ Yeityo koib tisiindet konyo kaptisisiet; ak koiiny kaatinnyi kong’et metit, ak kobeel eng’ kaptisisiet; ak kochiilji korotikyik tabandab kaptisisiet:

¹⁶ ak konem kebonjorennyi ak kororikyik, kowirji kaptisisiet taban, ole tokyingei kong’asis, oldab orek:

¹⁷ ak kogerer kopcheune aeng’ kebebaikyik, amat kobesio; yeityo kobeel tisiindet choto eng’ kaptisisiet, eng’ kwenik che mi ma: nito kagochinet ne kigoitoi kebeel, kagochinet ne bunei mat, nyamdutiet ne anyiny eng’ Jehovah.