2 SAMUEL 6 - BUKUIT NE TILIL

Koibu Daudi Moinget konyo Jerusalem

¹ Ak kiiyum Daudi kogeny murenik tugul che bo Israel che kigilewen, elfusiek sosom.

² Ak king’eet Daudi, kwo koboto bik tugul che kimi ak inendet, eng’ Baale Juda, koba koib moingetab Kamuktaindet, ne kigimwaitae Kainet, kainetab Jehovah ne bo lugosiek, ne tebe kerubisiek.

³ Ak kiinde moingetab Kamuktaindet karit ne leel, ak kiib konyo eng’ gotab Abinadab ne kimi tulwet: ak kikweri werikab Abinadab, Usa ak Ahio, karinato leel.

⁴ Ak kiib konyo eng’ gotab Abinadab ne kimi tulwet, koboto moingetab Kamuktaindet: ak kiindoe Ahio moingonoto.

⁵ Ak kibut Daudi ak got tugul ne bo Israel eng’ taitab Jehovah, kibugandisiek che kigiyae ketikab biribiriet, koboto ketubosiek, ak kibugandinik, ak eng’ sugutisiek che mengechen, ak eng’ ndurerusiek, ak eng’ sanisiek che cheeitos.

⁶ Ak kingoit ichek ruanyut ne kiborse ne bo Nakon, koyogoito Usa eunnyi kotokyi moingetab Kamuktaindet, ak kinam; amu kiterteriot eik.

⁷ Ak kilalyo neregekab Jehovah agobo Usa; ak kibir Kamuktaindet inendet eng’ yoto amu lelutiennyi; ak kimechi yoto kimi moingetab Kamuktaindet.

⁸ Ak kima cham Daudi, amu kibar Jehovah Usa: ak kiguure yoto Peres-usa, agoi ra.

⁹ Ak kiiywei Daudi Jehovah betunoto: ak kimwa kole, Imuktoi ano moingetab Jehovah konyo ole ami?

¹⁰ Ma cham Daudi anyun koib moingetab Jehovah konyo ole mi inendet eng’ nganasetab Daudi; ago kiib Daudi kwo taban kwo gotab Obed-edom Getindet.

¹¹ Ak kitebe moingetab Jehovah gotab Obed-edom Getindet arawek somok: ak kiiberur Jehovah Obed-edom, ak gonnyi tugul.

¹² Ak kigimwachi Daudi kelenji, Kigoberur Jehovah gotab Obed-edom, ak tugukyik tugul, amu moingetab Kamuktaindet. Ak kiwa Daudi koib moingetab Kamuktaindet eng’ boiboiyet eng’ gotab Obed-edom kotogos konyo nganasetab Daudi.

¹³ Ak kingo kagoba kakwautik lo icheget che kiibei moingetab Jehovah, koeny eito ne bungus ak age ne akwai.

¹⁴ Ak kiureren Daudi eng’ taitab Jehovah eng’ kimnatennyi tugul; ak kigermenegei Daudi epod ne bo katanit.

¹⁵ Kiib anyun Daudi ak got tugul ne bo Israel moingetab Jehovah, kotienonu ak koguutonu iriagok.

¹⁶ Ak kingoit moingetab Jehovah nganasetab Daudi, koiit Mikal cheptab Saul eng’ tirisiet, ak kogeer laitoriat Daudi kotorombeni kourereni eng’ taitab Jehovah; ak kisas inendet eng’ muguleldanyi.

¹⁷ Ak kiib moingetab Jehovah konyo go, ak konde yetanyi, eng’ kwenutab emait ne kiga koteekyi Daudi: ak kiigoito Daudi kagochinoik che kibeelei ak kagochinoikab kalyet eng’ taitab Jehovah.

¹⁸ Ak kingo kagoges Daudi kagoitoetab kagochinet ne kibeelei ak kagochinoikab kalyet, koberur bik eng’ kainetab Jehovah ne bo lugosiek.

¹⁹ Ak kipchechi bik tugul eng’ tuiyet tugul ne bo Israel, murenik ak kwonyik, kogochi chi age tugul makatiat, ak bendo, ak makatiatab sabibuk che yaamnyotin. Kiba anyun bik tugul kwo chi tugul gonnyi.

²⁰ Yeityo koweek Daudi koberur bikab gonnyi. Ak kinyo sang’ Mikal cheptab Saul kotorok Daudi, ak kole, Ka itororot ne tia, laitoriatab Israel rani, ne kang’anygei rani eng’ taitab otwogikyik che tibik che bo otwogikyik, ko u age eng’ kiptangoinik che ng’anyegei ama iliani!

²¹ Ak kilenji Daudi Mikal, Kagaureren eng’ taitab Jehovah, ne kilewena asiir kwandang’ung’, ak asiir gonnyi tugul, kondea aek bounindet eng’ bikab Jehovah, aboi Israel: noto anyun, aurereni eng’ taitab Jehovah.

²² Ak ta kesasa kosiir nito, ak ageerege aegu ne ming’in: ago agobo tibicho otwogik che kemwa, koteecha icheget.

²³ Ak ma sich Mikal cheptab Saul lakwa agoi betutab meennyi.