2 SAMUEL 20 - BUKUIT NE TILIL

Kong’eeti Seba boriet, ago kiiterter Joab inendet

¹ Ak kibiit eng’ yoto chi ne bo Belial, ne kainennyi ko ki Sheba, weritab Bikri, Benjaminindet: ak kiguut iriaget, ak kole, Magitinye kebeberta eng’ Daudi, ama kitinye borotet eng’ weritab Jesii: ingwo chi tugul emaisiekyik, ee Israel.

² Kotogosta anyun bik tugul che bo Israel, mata kosub Daudi, kiisub Sheba weritab Bikri: ago kinamgei bikab Juda ak laitoriandenywa, koboch Jordan agoi Jerusalem.

³ Ak kinyo Daudi gonnyi eng’ Jerusalem; ak kinam laitoriat kwonyichugiche taman, chebaigeinikyik, chu kiga bagakta korib got, ak konde got orit, korat, ak kobai, ago mata kwo ole mi ichek. Kigirat anyun agoi betutab meenywa, koteb koek mosogik.

⁴ Kilenji anyun laitoriat Amasa, Kuurwa murenikab Juda koyumgei eng’ betusiek somok, ak inyo aginye.

⁵ Kwo anyun Amasa koguur bikab Juda kotuiyo: ago kiigagei kosiir che kiga ng’at laitoriat inendet.

⁶ Ak kilenji Daudi Abisai, Yaiywech yaitiet Sheba weritab Bikri nguno kosiir ne kiyai Absalom: imut anyun otwogikab kiptaiyandeng’ung’, ak isub inendet, si manamjigei nganasok che ng’ototin, ak kochilil si mata kegeer.

⁷ Ak kiisub inendet bikab Joab, ak Keretik ak Peletik, ak bik tugul che nyigonen: ak kiba eng’ Jerusalem, kosub Sheba weritab Bikri.

⁸ Ak kingorikyi koita ne o ne mi Gibeon, konyo Amasa kotorok ichek. Ak kiga rat Joab karikyik che bo luget, che kiga ilaach, ak kitinyei birenet ak rotwetab chok ne kiga ratyi suennyi komi choget; ak ye kiwendi, kochun rotwet.

⁹ Ak kilenji Joab Amasa, Tos ichamege, tupchennyu? Ak kinam Joab tamnetab Amasa eng’ eunnyi ne bo tai, ko u ne machei kong’utut inendet.

¹⁰ Ago ma keer Amasa rotwetab chok ne kitinyei Joab eng’ eunnyi: kotoor anyun moet eng’ rotwonoto, ak kitumda agutanikyik koba ng’ony, amata kotoor inendet kogeny; ak kime. Ak kiisub Joab ak Abisai ng’etab kamet, Sheba weritab Bikri.

¹¹ Ak kitonon eng’ ye negite inendet age eng’ murenikab Joab, ak kole, Inendet ne chamei Joab, ak inendet ne bo Daudi, kosub Joab.

¹² Ak kimildoegei Amasa korotikyik eng’ kwenutab oret ne o. Ak kingogeer chichoto kole katononso bik tugul, kola Amasa koistogei eng’ oranato o kwo kewet, ak kotuge ngoriet, ye kingogeer kole ngo it chi tugul yoto, kotonon.

¹³ Kingo kageisto eng’ oranato o, koba bik tugul kosub Joab, kosub Sheba weritab Bikri.

¹⁴ Ak kibun bororiosiek tugul che bo Israel agoi koit Abel, ak Bet-maaka, ak ole mi Berik tugul: ak kiga iyumgei, ak kiba agichek kosub inendet.

¹⁵ Ak kibwa koyiem inendet eng’ Abel ne bo Bet-maaka, ak kiiyum ng’ung’unyek koek tulwo konamgei ak nganaset, ak kitonon konamgei ak irimet: ak kirieb irimet bik tugul che kimi ak Joab, koluul kwo ng’ony.

¹⁶ Kowaach anyun kwondo age ne ng’om eng’ nganasanato, kole, Ogaso, ogaso, asomok ale olenji Joab konyo korik yu, si kobiit ang’alalji.

¹⁷ Ak kinyo ye mi kwonyoto, ak kimwa kwonyoto, kole, I Joab? Ak kiwolji kolenji, A inendet. Kolenji anyun inendet, Kas ng’alekab cheptang’ung’ ne otwogindet. Ak kiwol kole, Agase.

¹⁸ Yeityo komwa kole, Kicham kemwaei keny, kele, Kiteebe iman ng’omnatet eng’ Abel: koges anyun ng’alechato.

¹⁹ A bo ichek che bo kalyet ak che bo iman eng’ Israel: icheng’e ibar nganaset ak ko kamet eng’ Israel: amu nee si imache ilugui borotetab Jehovah?

²⁰ Ak kiwol Joab kole, Ingolooit, ingolooit eng’ ane, si malugui anan abar.

²¹ Ma u noto ng’olyondonoto: kimach Sheba weritab Bikri, chito ne bo emetab tulonokab Epraim, kobar laitoriat, inendet Daudi: ogonu inendet inegei, si awa eng’ nganaset. Ak kilenji kwonyoto Joab, Keero, kiwirun metinnyi kosiir irimet.

²² Kwo anyun kwonyoto eng’ ng’omnatennyi ole mi bik tugul. Ak kitil ichek metitab Sheba weritab Bikri, ak kowir konyo sang’ ole mi Joab. Ak kiguut anyun Joab iriaget, ak koba eng’ nganaset, kwo chi tugul emainnyi. Ak kiweek Joab kwo Jerusalem ole mi laitoriat.

²³ Ak koboi Joab luget tugul ne bo Israel: ak kiboi Benaia weritab Jeoiada Keretik ak Peletik:

²⁴ ak kiboi Adoram aisurut: ki sirindetab tuguk che biitu Jeosapat weritab Ailud:

²⁵ ak ki sirindet Seva: ak ki tisiik Sadok ak Abiatar:

²⁶ ak ki tisiindetab Daudi agine Ira Jairindet.