2 SAMUEL 19 - BUKUIT NE TILILKoweeksei Daudi Jerusalem 1 Ak kigimwachi Joab kelenji, Keero, rirei laitoriat, ak kotei agobo Absalom. 2 Ak kiwalak katerterisiet eng’ betunoto koek kateiyet eng’ bik tugul: amu kigas bik kemwaei betunoto kele, Arogeni laitoriat agobo werinnyi. 3 Ak kiba bik nganaset betunoto koung’ategei, ko u ye ung’otegei bik che ililandos, ye mwei eng’ luget. 4 Ak kituch laitoriat togennyi, ak kiite laitoriat eng’ kutit ne o kole, Ooi werinnyu Absalom, ooi Absalom, werinnyu, werinnyu! 5 Ak kinyo Joab go, ole mi laitoriat ak kolenji, Kegochi togochikab otwogiguk tugul eng’ betuni kolilanso, che kasor sobondang’ung’ rani, ak sobonwekab weriguk ak tibiguk, ak sobonwekab osotiguk, ak sobonwekab chebaigeiniguk; 6 amu ichame ichek che wechin, ak iweche ichek che chamin. Amu kebarte rani ile, ma kiy eng’ inye bounik ak otwogik: amu kaageer rani, ale nda kagosob Absalom, ak kebegu achek tugul rani, ko kata iboiboin mising’. 7 Ng’eet anyun, mande, ak ing’alalji otwogiguk, igaigai: amu ayostosi eng’ Jehovah ale, ngot ko memande ko mang’etun chi kemouni: ak yaitu noto eng’ inye kosiir yaitiet tugul ne kigonyonjin koboch ming’inateng’ung’ agoi nguno. 8 Kong’eet anyun laitoriat ak kotebe ormarichet. Ak kigimwachi bik tugul kelenji, Ogeero, tebyei ng’ony laitoriat eng’ ormarich: ak kibwa bik tugul taitab laitoriat. Kiga komwei Israel, kwo chi tugul emainnyi. 9 Ak kibiit suriet eng’ bik tugul eng’ bororiosiek tugul che bo Israel, kole, Kisoruech laitoriat eng’ bunikyok, ak kisoruech eng’ eunekab Pilistik; ak nguno ko kigomwei inendet eng’ emet komwee Absalom. 10 Ak kogome eng’ luget Absalom ne kiga kiil koboiywech. Ara anyun amu nee si momwa kimut laitoriat koweek? 11 Kiiyokto anyun laitoriat Daudi ng’alek koba oldab Sadok ak Abiatar, che ki tisiik, kelenji, Omwachi boisiekab Juda olenji, Amu nee si oegu che bo let eng’ kamutunetab laitoriat koweek konyo gonnyi? Amu kogobwanji laitoriat ng’alekab Israel tugul, kele, kimut inendet konyo gonnyi. 12 O tupchosiekyuk, o kowekyuk ak banyekyuk: amu nee anyun si oegu che bo let eng’ kamutunetab laitoriat koweek? 13 Ak olenji Amasa, Tos ma i kowekyuk ak banyekyuk? Ingoyaiywa Kamuktaindet ko u noto, ak kotes, ngot ko meegu kiptaiyatab luget eng’ tainnyu kotugul igeer Joab. 14 Ak kiwelel mugulelwekab bik tugul che bo Juda, ko u ne bo chito agenge; kot koyokto kemwachi laitoriat, kolenji, Mie iweeige koboto otwogiguk tugul. 15 Kiweek anyun laitoriat, konyo Jordan. Ak kinyo Juda Gilgal, kotorok laitoriat, komut kolong’une Jordan. 16 Ak kichok Simei, weritab Gera, Benjaminindet, ne ki bo Baurim, kochorgei koboto bikab Juda kotorok laitoriat Daudi. 17 Ak kimi koboto inendet bik elfut agenge che bo Benjamin, ak Siba otwogindetab gotab Saul, ak werikyik taman ak mut, ak otwogikyik tiptem; ak kilandae Jordan eng’ taitab laitoriat. 18 Ak kilanda moinget ne ming’in kwo komut bikab gotab laitoriat kolong’, ak koyai kit ne kigeerei kole mie. Ak kiibutyi ng’ony Simei weritab Gera, eng’ taitab laitoriat, ko kagolong’ eng’ Jordan. 19 Ak kilenji laitoriat, Amat koiitya tengekto kiptaiyandennyu, anan ibwat kii kiga yai otwogindeng’ung’ komaasak, eng’ betuni kimandoi kiptaiyandennyu laitoriat eng’ Jerusalem, ale amanam laitoriat kioto eng’ muguleldanyi. 20 Amu ingen otwogindeng’ung’ kole kigoyai tengekto: noto anyun keero, kanyo rani andou eng’ bik tugul che bo gotab Josep, achoruge atorogu kiptaiyandennyu laitoriat. 21 Ago kiwol Abisai weritab Seruia, kole, Tos magibarei Simei agobo kiito, amu kichub ne iilat ne bo Jehovah? 22 Ak kile Daudi, Kiting’ege nee ak okwek werikab Seruia, kot oegu bunik eng’ ane rani? Kibarei chi rani eng’ Israel? Mangen ale, a laitoriat rani ne bou Israel? 23 Ak kilenji laitoriat Simei, Memee. Ak kiiyosiechi laitoriat inendet. 24 Ak kichorgei Mepiboset weritab Saul kotorok laitoriat; kimata kotil siokab kelyekyik, anan kocher tamnennyi, anan komwet ngoroikyik, koboch betut ne kiga wa laitoriat agoi betut ne kiweeksei ga eng’ kalyet. 25 Ak kingonyo Jerusalem kogat laitoriat, kolenji inendet, Amu nee-o, Mepiboset, si mecham kebe tuwai? 26 Ak kiwol kole, Kiptaiyandennyu, ee laitoriat, kiiberbera otwogindennyu: amu kiale ane otwogindeng’ung’, Aiitoi sigiriet, si kobiit alany, kebe ak laitoriat; amu ing’wali otwogindeng’ung’. 27 Ak king’acha ane otwogindeng’ung’ eng’ kiptaiyandennyu laitoriat: ago u kiptaiyandennyu laitoriat malaikaiyatab Kamuktaindet: yai anyun kit ne igeere ile mie. 28 Amu ki u got tugul ne bo kwandanyu, bik che kigobek eng’ taitab kiptaiyandennyu laitoriat: ago kiinde otwogindeng’ung’ kwenutab icheget che amisie meseng’ung’. Atinye imanda nee anyun kot kota arirji laitoriat? 29 Ak kilenji laitoriat inendet, Amu nee si kota ing’alale tuguguk? Kale, Opchei emet ak Siba. 30 Ak kilenji Mepiboset laitoriat, Ingoib inendet tugul, amu kigoweek kiptaiyandennyu laitoriat eng’ kalyet konyo gonnyi. 31 Ak kichortagei Barsilai Gileadindet eng’ Rogelim; kwo kolandae Jordan koboto laitoriat, komut inendet kolandae Jordan. 32 Kiga koosit mising’ Barsilai, ki bo kenyisiek tamanwogik sisiit: kichopchin laitoriat amitwogik ye kimi Maanaim; amu ki chito ne toogunot. 33 Ak kilenji laitoriat Barsilai, Ngelande kebe keamisie tuwai eng’ Jerusalem. 34 Ak kilenji Barsilai laitoriat, Ata betusiekab kenyisiekab sobondanyu kot ketogoste ak laitoriat kebe Jerusalem? 35 A bo rani kenyisiek tamanwogik sisiit: ta amuchi abesio ne mie ak ne ya? Ta komuchi otwogindeng’ung’ kogas kit ne chamu tuguk che aame anan ko che aee? Ta amuchi agas cheetab murenik che tiendos, ak kwonyik che tiendos? Amu nee anyun si ko ta koek milet otwogindeng’ung’ kogeny, eng’ kiptaiyandennyu laitoriat? 36 Landoi otwogindeng’ung’ eng’ Jordan kityo, koboto laitoriat: ak amu nee si koyookwa laitoriat melekto ne u noto? 37 Asomin ale, ngaweek ane otwogindeng’ung’ kogeny, awa amechi nganasennyu, ye negite kereritab kwandanyu ak kamennyu. Ago keero otwogindeng’ung’, Kimham; ingolanda koboto kiptaiyandennyu laitoriat; ak iyachi kit ne igeere ile mie eng’ inye. 38 Ak kiwol laitoriat kole, Kilandoi ak Kimham, ak ayachi kit ne igeere ile mie eng’ inye: ak kit age tugul ne imagena, ayaun kioto. 39 Ak kilandae bik tugul Jordan, ak kilanda laitoriat: ak king’utut laitoriat Barsilai, ak koberur; ak kiweektagei kwo oldanyi. 40 Kilanda anyun laitoriat kwo Gilgal, ak kilanda Kimham ak inendet: ak kiimut bik tugul che bo Juda laitoriat kolong’, ak kebebertab bikab Israel. 41 Ak ogeero, kibwanji laitoriat bik tugul che bo Israel, ak kolenji laitoriat, Amu nee si kochorin tupchosiekyok bikab Juda, ak komut laitoriat, koboto gonnyi, kolong’une Jordan, koboto bik tugul che bo Daudi? 42 Ak kiwolji bik tugul che bo Juda bikab Israel, kolenji, Amu chitab oret ne negit laitoriat eng’ achek: ko amu nee anyun si onerech agobo ng’olyondonoto? Tos kigiam tugukab laitoriat? Anan kigonech konunet age tugul? 43 Ak kiwolji bikab Israel bikab Juda, kolenji, Kitinye kebeberwek taman eng’ laitoriat, amu kitinye kebeberta ne o eng’ Daudi kosiirok: ko amu nee anyun si osasech, si moteebenech kotom omutu laitoriandennyo? Ak kigoromitu ng’alekab bikab Juda kosiir ng’alekab bikab Israel. |