2 LAITORINIK 9 - BUKUIT NE TILIL

Kong’eeti Jeu toiyet

¹ Ak kiguur maotiot Elisha age eng’ werikab maotik, ak kolenji inendet, Kermenge, ak iib lalani bo mwaita, ak iwe Ramot-gilead.

² Ak ye it yoto, icheng’ Jeu weritab Jeosapat weritab Nimsi, ak iwe go, ak ilenji kong’eet eng’ kwenutab tupchosiekyik, ak imut inendet kwo got ne bo orit.

³ Yeityo inemu laletab mwaita, ak irong’ji mwaita metinnyi, ak ilenji, Kamwa Jehovah ko u ni kole, Kaaiilin iegu laitoriat eng’ Israel, yeityo iyat kurget, ak imwei, amat igage.

⁴ Kwo anyun Ramot-gilead murenonoto, ne ki maotiot.

⁵ Ak kingoit, ogeero, kitebyei kiptainikab luget; ak kile, Atinye ng’olyot ne kagiyogunena, ee kiptaiyat. Ak kile Jeu, Kagiyokyi ng’o eng’ achek tugul? Ak kile, Kagiyogun, ee kiptaiyat.

⁶ Ak king’eet kwo go; ak kirong’ji mwaita metinnyi, ak kolenji inendet, Kamwa ko u ni Jehovah Kamuktaindetab Israel, kole, Kaaiilin iegu laitoriat eng’ bikab Jehovah, che icheget ko Israel.

⁷ Ak ibare gotab Ahab kiptaiyandeng’ung’, si kobiit ayaakta mugetut eng’ korotikab otwogikyuk maotik, ak eng’ korotikab otwogikab Jehovah tugul, eng’ eutab Jesebel.

⁸ Amu igesugei got komugul ne bo Ahab; ak abar werit age tugul ne bo Ahab, koboto inendet ne kerat ak inendet ne itiagat eng’ Israel.

⁹ Ak ayae gotab Ahab koigei gotab Jeroboam weritab Nebat, ak ne bo Baasa weritab Aija.

¹⁰ Ak amei sesenik Jesebel eng’ koretab Jesreel, ak mabiitu chi ne tubei inendet. Ak kiyat kurget, ak komwei.

¹¹ Konyo anyun Jeu ole kimi otwogikab kiptaiyandennyi: ak kilenji age inendet, Kalyet? Kanyonjin kibiywoni amu nee? Ak kilenji ichek, Ongen chichoto, ak kit ne ka u ng’alekyik.

¹² Ak kile ichek, Lembech; mwawech anyun nguno. Ak kile, Kang’alalwa ko u ni ak ko u ni, kole, Kamwa Jehovah ko u ni kole, Kaaiilin iegu laitoriat eng’ Israel.

¹³ Ak kichirjirenso konam chi tugul ngoriennyi, ak konde kotobon ng’ony eng’ inendet, ak eng’ baragutab long’eiywot ne bo got, ak koguut iriaget kole, Laitoriat Jeu.

Kebarei Jeoram, laitoriatab Israel, koboto Aasia

¹⁴ Kochaam anyun Jeu weritab Jeosapat weritab Nimsi, Joram. (Kiribei Joram Ramot-gilead, inendet ak Israel tugul, amu Hasael laitoriatab Suria:

¹⁵ ago kiga week laitoriat Joram kwo kinya eng’ Jesreel eng’ ng’otobosiek che kiga toor inendet Suriek, ye kibaregei ak Hasael laitoriatab Suria.) Ak kimwa Jeu kole, Ngot ko kit ne obwati ni, ko mat ongwa chi kochilil eng’ nganaset, kwo komwaita eng’ Jesreel.

¹⁶ Kolany anyun Jeu karit, kwo Jesreel; amu kiruei Joram eng’ oloto. Ak kiga chorgei Aasia laitoriatab Juda kogeer Joram.

¹⁷ Kitonon ribindet eng’ teekset ne koi ne bo Jesreel, ak kitoben Jeu ak kweanennyi kobwanei, ak kile, Ageere bik. Ak kile Joram, Nam chito ne lanyei mbartanyit, ak iyokte kotorokta, ak ingowo kolenji, Kalyet?

¹⁸ Kwo anyun chito kobun mbartanyit, kotorokta ichek, ak kolenji, Kamwa laitoriat ko u ni, kole, Kalyet? Ak kile Jeu, Image nee kalyet? Nyo ui let. Ak kimwaita ribindonoto kole, Kait chito ne kaga kiyokto ole mi ichek, ago ma week.

¹⁹ Ak kiiyokto chitab aeng’ kobun mbartanyit, ne kiit ye kimi ichek, ak komwachi kolenji, Kamwa laitoriat ko u ni kole, Kalyet? Ak kiwol Jeu kole, Image nee kalyet? Nyo ui let.

²⁰ Ak kimwaita ribindet kole, Kait ole mi ichek, ago ma week: ak kergei kweriennyi ak kwerietab Jeu weritab Nimsi; amu kweriei eng’ koromnatet.

²¹ Ak kile Joram, Ochoboge. Kochob anyun karinnyi. Ak kimanda Joram laitoriatab Israel ak Aasia laitoriatab Juda, komi chi tugul karinnyi, ak kiba kotorokta Jeu, ak kinyorji inendet koretab Nabot Jesreelindet.

²² Ak kingogeer Joram Jeu, komwa kole, Kalyet-o Jeu? Ak kiwol kole, Kalyet ne bo nee, kota ko o ibetab ge ne bo komet Jesebel ak bonisiosiekyik?

²³ Ak kiweech Joram eunekyik, ak komwei, ak kolenji Aasia, Mi ng’wektaet, wee Aasia.

²⁴ Ak king’i Jeu kwangennyi eng’ kimnatennyi tugul, ak komwok Joram kokwer kwenutab tigigoikyik, ak kiisore kipchabet muguleldanyi, ak kiibutyi karinnyi.

²⁵ Kolenji anyun Jeu Bidka kiptaiyatab lugennyi, Sut ak iwirji koretab Nabot Jesreelindet: amu ibwat ile, ye kigibendi tuwai kisubi Ahab kwandanyi, ko kiinde Jehovah milani inendet;

²⁶ koageer iman amut korotikab Nabot, ak korotikab werikyik, mwaei Jehovah; ak ayaagun eng’ mbarani, mwaei Jehovah. Ara anyun wirji inendet mbaranato; ko u ng’olyotab Jehovah.

²⁷ Ago kingogeer Aasia laitoriatab Juda kioto, komwei kobun oret ne wendi got ne mi mbar (Bet-hagan). Ak kion Jeu inendet, ak kole, Obar inendet agine eng’ karit: ak kigibar inendet eng’ ole kitogostoe eng’ Gur ye negite Ibleam. Ak kimwechi Megido, ak komechi yoto.

²⁸ Ak kisut inendet otwogikyik eng’ karit kwo Jerusalem, ak kotub inendet eng’ kererinnyi koboto kwanisiekyik eng’ nganasetab Daudi.

²⁹ Ak kitoi kolaitoran Aasia eng’ Juda eng’ kenyitab taman ak agenge ne bo Joram weritab Ahab.

Meetab Jesebel

³⁰ Ak kingoit Jeu Jesreel, kogas Jesebel; kosal konyekyik, ak kolelesonji metinnyi, ak koitito eng’ tirisiet.

³¹ Ak ye kinyonei Jeu eng’ ormarich, kole, Kalyet, inye Simri, rumindetab kiptaiyandeng’ung’?

³² Ak kiinyal Jeu tirisiet, ak kole, Ng’o ne mi komostanyu? Ng’o? Ak kigeerei inendet bik aeng’u anan somok che ki kiptainik.

³³ Ak kile Jeu, Owiru. Kowir anyun inendet konyo ng’ony, ak kiiseegei korotikyik inatut, ak mbartanyisiek: ak kitiechatiech inendet eng’ kelyekyik.

³⁴ Ak ye kingonyo go, koamis ak koeeiso; yeityo kole, Orib kwonyito chubot, si otub inendet: amu inendet ko cheptab laitoriat.

³⁵ Ak kiba kolen kotub inendet: ago kima nyor inendet kobate terta, ak kelyekyik, ak rubeiywekab eunekyik.

³⁶ Kobwa go anyun kogeny ak komwachi inendet. Ak kile, Ng’olyotab Jehovah noto, ne kimwa eng’ otwogindennyi Elija Tisbindet, kole, Amei sesenik bortab Jesebel eng’ koretab Jesreel:

³⁷ ak kergeitu ak ng’atatek mustab Jesebel eng’ mbaret eng’ koretab Jesreel; kot ko ma komwaei bik kole, Jesebel ni.