2 LAITORINIK 8 - BUKUIT NE TILIL

Elisha ak Chepsunemindet

¹ Kiga ng’alalji Elisha kwonyi kiga ing’eetyi werinnyi, kolenji, Ng’eet ak obe ak bikab gong’ung’, ak obe omeny oldo tugul ole ochame: amu kagoguur Jehovah rubet: ak nyonei rubet emet kenyisiek tisab.

² Ak king’eet kwonyoto, ak koyai ko u ng’olyotab chitab Kamuktaindet: ak kiba ak gonnyi, ak komeny emetab Pilistik kenyisiek tisab.

³ Ak kingogesgei kenyisiek tisab, koweek kwonyoto eng’ emetab Pilistik: ak kiwa korirji laitoriat agobo gonnyi ak korennyi.

⁴ King’alalji laitoriat Geasi otwogindetab chitab Kamuktaindet, kolenji, Asomin ale, mwawa tuguk tugul che eechen che kigoyai Elisha.

⁵ Ak kingota komwachin inendet laitoriat ole kiisoopto kogeny lakwet ne kiga kome, ogeero, korirji laitoriat kwonyi kiging’eetyin werinnyi agobo gonnyi ak korennyi. Ak kile Geasi, Kiptaiyandennyu, ee laitoriat, kwonyoto ni, ak werinnyi ni, ne kiing’eeti Elisha.

⁶ Ak kingoteebe laitoriat kwonyoto, komwachi inendet. Kong’atyi anyun laitoriat inendet kiptaiyat, kolenji, Ui weekyi inendet tuguk tugul che ki chechik, ak logoek tugul che bo mbaret koboch betut ne kiwendi eng’ emoni, agoi ra.

Koegu Hasael laitoriatab Suria

⁷ Ak kinyo Elisha Damasko; ak kimiani Ben-hadad laitoriatab Suria; ak kigimwachi kelenji, Konyo oli chitab Kamuktaindet.

⁸ Ak kilenji laitoriat Hasael, Ib kagochinet eng’ eung’ung’, ak iwe itorokte chitab Kamuktaindet, ak iteepse Jehovah eng’ inendet, ilenji, Asobe eng’ miani?

⁹ Kwo anyun Hasael, kotorokta inendet, ak koib kagochinet ne bo kit age tugul ne mie ne bo Damasko, che yamei kola tambesik artamu, ak konyo kotonon eng’ tainnyi, ak kole, Kagoyokwa wering’ung’ Ben-hadad laitoriatab Suria, anyo oldang’ung’, kole, Tos asob eng’ miani?

¹⁰ Ak kilenji Elisha inendet, Ui ilenji inendet, Isobe iman; nganda kagoborua Jehovah kole meei inendet iman.

¹¹ Ak kitokyi inendet togennyi konjurur inne, kot kolilan inendet; ak korir chitab Kamuktaindet.

¹² Ak kile Hasael, Amu nee si irir, kiptaiyandennyu? Ak kiwol kole, Amu angen yaitiet ne tun iyachini lagokab Israel: ibeele irimoikwak che kimen, ak ibare werikwak eng’ rotokab chok, ak ibirte manyurunikwak, kotonak, ak igerer kwonyikwak che tamonosiek.

¹³ Ak kile Hasael, Nee otwogindeng’ung’, ne seset kityo, kot koyai kii o? Ak kiwol Elisha kole, Kigoborua Jehovah kole, iegu laitoriat eng’ Suria.

¹⁴ Kwo anyun eng’ ole kimi Elisha, ak koit oldab kiptaiyandennyi; ne kiteebe inendet kolenji, Kalenjin nee Elisha? Ak kimwachi kolenji, Kalenja isobe iman.

¹⁵ Ak ki eng’ karon, konem anget ne kiitoi eng’ itogut barak, ak korookto beek, ak kotuge togennyi ak kome: ak kiliatoran Hasael kogeer inendet.

Jeoram ak Aasia, laitorinikab Juda

¹⁶ Ak eng’ kenyitab mut ne bo Joram weritab Ahab laitoriatab Israel, ye ki Jeosapat laitoriat ne bo Juda, kotoi kolaitoran Jeoram weritab Jeosapat laitoriatab Juda.

¹⁷ Ki bo kenyisiek sosom ak aeng’ inendet ye kingotau kolaitorani; ak kilaitoran kenyisiek sisiit eng’ Jerusalem.

¹⁸ Ak kiwendote ortinwekab laitorinikab Israel, koyai ko u gotab Ahab: amu ki cheptab Ahab osotiondennyi: ak kiyai yaitiet eng’ taitab Jehovah.

¹⁹ Ago ma cham Jehovah kobar Juda, amu otwogindennyi Daudi, ko u ye kiiarorji kogochi inendet tait ne bo lagokyik betusiek tugul.

²⁰ Kingelelji Edom Juda eng’ betusiekyik, ak kilewenjigei Edom laitoriat ne bou ichek.

²¹ Kilanda anyun Joram kwo Sair, koboto karisiekyik tugul: ak king’eet kemoi, ak kobar Edomik che kiga yiem inendet, koboto kiptainikab karisiek: ak kimwei bik koba emaisiekwak.

²² Kongelelji anyun Edom Juda agoi ra. Ak kingelel agine Libna eng’ betusiechoto.

²³ Ak boisionik che ng’etunotin che bo Joram, ak tuguk tugul che kiyai, ko ma sirotin eng’ bukuitab ateptab betusiek ne bo laitorinikab Juda?

²⁴ Ak kiru Joram ak kwanisiekyik, ak kigitub koboto kwanisiekyik eng’ nganasetab Daudi: ak kilaitoran Aasia werinnyi kogeer inendet.

²⁵ Eng’ kenyitab taman ak aeng’ ne bo Joram weritab Ahab laitoriatab Israel, kotoi kolaitoran Aasia weritab Jeoram laitoriatab Juda.

²⁶ Ki bo kenyisiek tiptem ak aeng’ Aasia ye kitau kolaitorani; ak kilaitoran kenyit agenge eng’ Jerusalem. Ak kainetab kamet ko ki Atalia cheptab Omri laitoriatab Israel.

²⁷ Ak kiwendote ortinwekab gotab Ahab, ak koyai yaitiet eng’ taitab Jehovah, ko u ye kiga yai gotab Ahab: amu ki sandetab gab Ahab.

²⁸ Ak kiba ak Joram weritab Ahab kobargei ak Hasael laitoriatab Suria eng’ Ramot-gilead: ak kiiguoten Suriek Joram.

²⁹ Ak kiweek laitoriat Joram konyo kinya eng’ Jesreel eng’ ng’otobosiek che kitoor Suriek inendet eng’ Rama, ye kibaregei ak Hasael laitoriatab Suria. Ak kichortagei Aasia weritab Jeoram laitoriatab Juda kwo kogeer Joram weritab Ahab eng’ Jesreel, amu kimiani.