2 LAITORINIK 7 - BUKUIT NE TILIL

Komweei Suriek

¹ Ak kimwa Elisha kole, Ogas okwek ng’olyotab Jehovah: kamwa Jehovah ko u ni, kole, kialdoe mutai olo bo saini kerutietab busiek che tambulul sekelit agenge, ak kealdoe kerutik aeng’ che bo sairik sekelit agenge, eng’ ormarichetab Samaria.

² Kowolji anyun kiptaiyat ne kitiiegei eunnyi laitoriat chitab Kamuktaindet, kolenji, Ogeero, ngot koyai Jehovah tirisiok eng’ kipsengwet, ko tos biit kioto? Ak kile Elisha, Keero, igeere eng’ konyeguk, ago meame tuguchoto.

³ Kimi bik ang’wanu che kitinyei mogondosik ole kibunei eng’ ormarichet: ak kilenjigei, Amu nee si ketebe yu kot kebegu?

⁴ Ngot kemwa kele, kibendi nganaset, komi rubet nganaset, ak kibegu eng’ yoto: ak ngot ketebi eng’ yu kesisye, kebegu kora. Ara anyun obwa kebe kebekyi lugetab Suriek: ngot kobagaktech, kesoptosi; ak ngot kobarech, kebegu.

⁵ Ak king’eetyo karon kota ko mirmir, ak koba nganasetab Suriek: ak kingoit tabandab nganasetab Suriek, ogeero, koma komi chi yoto.

⁶ Amu kiigochi Jehovah Suriek kogas cheetab karisiek ak cheetab mbartanyisiek, cheetab luget ne o: ak kilenjigei, Ogeero, kagogochi tuguk laitoriatab Israel laitorinikab Hitik, ak laitorinikab Misrik, si kobwa kobarech.

⁷ Komwei anyun kota komirmir, ak kobagakta emaisiekwak, ak mbartanyisiekwak, ak sigirokwak, ak kibagakta nganaset ko u kit ne ki u, ak komwei kosor sobonwekwak.

⁸ Ak kingoit bichoto kiamei mogondosik tabandab nganaset, koba emait age orit, ak kiamis, ak koeeiso, ak koib feda ak tahabu, ak ngoroik, ak koba kouny; ak koweek koba emait age, ak koib tuguk eng’ yoto agine, ak koba kouny.

⁹ Yeityo komwachigei kole, Ma kiyai kiy ne mie: betuni ko betutab logoiywek che miach, ak kesistosi: ngot kegany kot koeech, konamech biret: ara anyun obwa kebe kemwachi bikab gab laitoriat.

¹⁰ Kobwa anyun ak koguur ribindetab nganaset: ak komwachi ichek kolenji, Kagibe nganasetab Suriek, ogeero, kama komi chi yoto, anan ko twegunetab chito, ago ka ratotin mbartanyisiek, ak ko ratotin sigirok, ak ko u emaisiek kit ne ko u.

¹¹ Ak kiguur ribik; ak kimwachi bikab gab laitoriat eng’ go.

¹² Ak king’eet laitoriat kemoi, ak kolenji otwogikyik, Aboruok kit ne kogoyaiywech Suriek. Ingen kole amech rubet; koba anyun eng’ nganaset kounygei eng’ timin kole, Si ye mong’ eng’ nganaset, kenam, ak kebe nganaset.

¹³ Ak kiwol age eng’ otwogikyik kole, Asomin ale, ingoba bik alak ak mbartanyisiek mut che ta ko ng’etunotin, che mi nganaset, (ogeero, te chang’indo tugul ne bo Israel che ng’etunotin eng’ nganaset; ogeero, te chang’indo tugul ne bo Israel che kigogesgei:) ak ongiyokte bik koba kogeer.

¹⁴ Konam anyun karisiek aeng’ ak mbartanyisiek: ak kiiyokto laitoriat bik kosub lugetab Suriek kolenji, Oba ogeer.

¹⁵ Ak kiisub kot koit Jordan: ak ogeero, ki nyiitat oret ngoroik ak terenik, che kiwirtooti Suriek koruaei. Ak kiweek bichoto kiga kiyokto komwachi laitoriat.

¹⁶ Ak kimanda bik koba konam tugukab nganasetab Suriek. Kigialdae anyun kerutietab busiek che tambululen sekelit agenge, ak kigialdae kerutik aeng’ che bo sairik sekelit agenge, ko u ng’olyotab Jehovah.

¹⁷ Ak king’at laitoriat kiptaiyatab luget ne kitiiegei inendet eunnyi, korib ormarichet: ak kitiech bik inendet eng’ ormarichet, ak kime ko u ye kiga mwa chitab Kamuktaindet, ne kiga mwa ye kiga nyo laitoriat ole mi inendet.

¹⁸ Ak ye kingo kagong’alalji chitab Kamuktaindet laitoriat, kolenji, Kialdoe kerutik aeng’ che bo sairik sekelit agenge, ak kialdoe kerutiet agenge ne bo busiek che tambululen sekelit agenge mutai olo bo saini eng’ ormarichetab Samaria;

¹⁹ ak kiwolji kiptaiyandanato chitab Kamuktaindet kolenji, Keero, ngot koyai Jehovah tirisiok eng’ kipsengwet, ko tos biit kiy ne u noto? Ak kile, Igeere eng’ konyeguk, ago meame tuguchoto:

²⁰ kiyaak ko u noto eng’ inendet; amu kitiech bik inendet eng’ ormarichet, kome.