2 LAITORINIK 6 - BUKUIT NE TILIL

Kotogosu aiywet eng’ beek

¹ Ak kilenji werikab maotik Elisha, Yu kimenye eng’ taing’ung’ ko mariich mising’ eng’ achek.

² Kisome kele chamwech kebe Jordan, ak koib chi age tugul ketit, keteekyige yeto eng’ yoto ole kimenye. Ak kiwol kole, Oba.

³ Ak kile chito age, Asomin ale, iyan oba ak otwogiguk. Ak kiwol kole, Kibendi.

⁴ Koba anyun koboto ichek. Ak kingoit Jordan, koeb ketik.

⁵ Ago ye kingota koluuli age ketit, korarach aiywet kobutyi beek: ak kiwaach kole, Bwa kiptaiyandennyu! Amu kogisomei.

⁶ Ak kile chitab Kamuktaindet, Karorokyi ano? Ak kiiborji ye karorokyi. Ak kieb ketit ak kowirji yoto ak kiigochi ketoto aiywet kotogos.

⁷ Ak kilenji, Inemu. Koyogoito anyun eunnyi ak konem.

Komi Elisha ak Suriek Dotan

⁸ Ak kibargei laitoriatab Suria ak Israel; ak kiiruoch ak otwogikyik kole, Egu nganasennyu yegile ak yugile.

⁹ Ak kiiyokto chitab Kamuktaindet chito kwo oldab laitoriatab Israel, kolenji, Ripge, mebun korono; amu bwanei yoto Suriek.

¹⁰ Ak kiiyokto laitoriatab Israel bik koba ole kiga mwachi inendet chitab Kamuktaindet ak koteechi agobo yoto; ak kisorgei, ma wa yoto, ma konyil agenge anan ko aeng’.

¹¹ Ak kiimak mising’ muguleldab laitoriatab Suria agobo kioto; ak kiguur otwogikyik, ak kolenji, Ochame omwawa chito eng’ achek ne bo laitoriatab Israel?

¹² Ak kile age eng’ otwogikyik, Achicha, kiptaiyandennyu, ee laitoriat: mwachin Elisha maotiot ne mi Israel laitoriatab Israel ng’alek che imwae eng’ gong’ung’ orit ne irue.

¹³ Ak kile, Oba ogeer ole mi inendet, si ayokto chito komut inendet. Ak kigimwachi inendet kelenji, Keero, mi inendet Dotan.

¹⁴ Koyokto anyun inendet mbartanyisiek, ak karisiek, ak luget ne o koba oloto: ak kiit kemoi ak koyiem nganaset.

¹⁵ Ak kingong’eet otwogindetab chitab Kamuktaindet karon inne, komanda, ogeero, kimi luget ne boto mbartanyisiek ak karisiek ne kiga yiem nganaset. Ak kilenji otwogindennyi inendet, Bwa kiptaiyandennyu! Kiyae nee?

¹⁶ Ak kiwol kole, Ameiywei: amu chang’ che mi kobotech kosiir che mi ak icheget.

¹⁷ Ak kisa Elisha kole, Jehovah, asain ale, yat konyekyik, si kogeer. Ak kiyat Jehovah konyekab nerananato; ak kigeer: ak ogeero, ki nyiitat tulwet mbartanyisiek ak karisiek che bo mat che kiga yiem Elisha.

¹⁸ Ak kingochorgei ole mi inendet, kosa Elisha Jehovah kole, Asain ale bire bichu koratet. Ak kibire ichek koratet ko u ng’olyotab Elisha.

¹⁹ Ak kilenji Elisha ichek, Ma oret ni, ama nganasanato: osubwa, si amutak ole mi chito ne ocheng’e. Ak kiimut ichek koba Samaria.

²⁰ Ak kingoit Samaria, kole Elisha, Jehovah, yat konyekab bichu, si kobiit kogeer. Ak kiyat Jehovah konyekwak, ak kigeer, ak ogeero, kimi kwenutab Samaria.

²¹ Ak kilenji laitoriatab Israel Elisha, ye kingogeer bichoto, Baba, abar? Abar?

²² Ak kiwol kole, Mat ibar: ibare che kailuul eng’ rotweng’ung’ ne bo chok ak kwangeng’ung’? Igochi amitwogik ak beek, si koamis ak koeeiso, ak koba oldab kiptaiyandenywa.

²³ Ak kichopchi ichek amitwogik che chang’: ak ye kingo kagoamis ak koeeiso, kochunda koba, ak kiba oldab kiptaiyandenywa. Ak matagai kobwa lugosiekab Suria kogeny emetab Israel.

Koyiemei bunik Samaria

²⁴ Ak kingobata choto, koyum Ben-hadad laitoriatab Suria lugennyi tugul, ak kotogosta koyiem Samaria.

²⁵ Ak kibiit rubet ne o eng’ Samaria: ak ogeero, kiyiem nganasanato, kot kealdae metitab sigiriet fedaisiek tamanwogik sisiit, ak kealdae kebeberta agenge eng’ ang’wan ne bo kibabet ne bo soroekab cheptugenik, fedaisiek mut.

²⁶ Ak ye kisiirtoi laitoriatab Israel eng’ inatut barak, korikyi inendet kwondo age kolenji, Toreta, kiptaiyandennyu, ee laitoriat.

²⁷ Ak kile, Ngot ko matoretin Jehovah, atoretitoin ano? Eng’ ole kiborse, anan ole kitue sabibuk?

²⁸ Ak kilenji laitoriat inendet, Amin nee? Ak kiwol kole, Kolenja kwonyi, Konu wering’ung’ keam ra, si keam werinnyu mutai.

²⁹ Kiiyo anyun, ak keam: ak kialenji inendet eng’ betutab aeng’, Konu wering’ung’, keam: kouny werinnyi.

³⁰ Ak kingogas laitoriat ng’alekab kwonyoto, kogerer ngoroikyik; (ak kiwendote irimet barak;) ak kigeer bik, ogeero, kiilaagoti kuniok.

³¹ Yeityo komwa kole, Ingoyaiywa Kamuktaindet ko u noto ak kotes, ngot kotebi metitab Elisha weritab Sapat rani.

³² Ago kitebyei Elisha eng’ gonnyi, koboto boisiek; ak kiiyokto laitoriat chito kwo: ago kingo tom koit chito ne kagiyok, ole mi inendet, kolenji boisiek, Ogeere ole kagoyok weri bo rumindet chito konyo kotil metinnyu? Ogeero, ye it chito ne kagiyok, oger kurget, ak onam kereiywot kouuiit: tos mongen ole isubu kiptaiyandennyi inendet?

³³ Ak ye kita kong’alali ak icheget, ogeero, koit ole mi inendet chito ne kagiyok: ak kimwa kole, Keero, bo yaitioni Jehovah; ko ta agen Jehovah kolya?