2 LAITORINIK 5 - BUKUIT NE TILIL

Kisoobi Naaman eng’ miandab mogondos

¹ Ak ki chito ne o Naaman, kiptaiyatab luget ne ki bo laitoriatab Suria, eng’ taitab kiptaiyandennyi, ak ki konyitot, amu kiga kogochi Jehovah Suria katerteret eng’ inendet: ki chito inendet kogeny ne kim ak ko nyigan, ago kitinyei mogondosik.

² Ak kiset Suriek emetab Israel kobee kweanaik, ak kiluul chepto ne ming’in; ak kiboisiechin cheboto kwondab Naaman.

³ Ak kilenji lakwanato kwonyoto, Nda mi kiptaiyandennyu ole mi maotiot ne mi Samaria, ta kagosoob inendet eng’ mogondosikyik.

⁴ Ak kiwa chito age go ak komwachi kiptaiyandennyi, kolenji, Kamwa ko u ni cheboto bo emetab Israel.

⁵ Ak kile laitoriatab Suria, Ara, ui oloto, si ayokyi baruet laitoriatab Israel. Ak kiwa ak koib talentaisiek taman che bo feda, ak tahabusiek elfusiek lo, ak ngoroik taman che kiwalawali.

⁶ Ak kiipchi baruet laitoriatab Israel, kolenji, Ye it oldang’ung’ baruani, ko keero, kaayogu Naaman otwogindennyu, si kobiit isoob inendet eng’ mogondosikyik.

⁷ Ak kingo kagosoman baruanato laitoriatab Israel, kogerer ngoroikyik, ak kole, Tos a Kamuktaindet, ne abare ak asoobi, si koyokwa chichi chito konyo asoob eng’ mogondosikyik? Ago asomin ale ibwat ak igeer ole cheng’doi suriet eng’ ane.

⁸ Ak kingogas Elisha chitab Kamuktaindet, kole kagerer laitoriatab Israel ngoroikyik, koyokto chito kwo oldab laitoriat kolenji, Amu nee si igerer ngoroiguk? Ingonyo oli ami si konai kole mi maotiot Israel.

⁹ Konyo anyun Naaman ak mbartanyisiekyik ak karisiekyik, inyo kotonon eng’ kurgetab gotab Elisha.

¹⁰ Ak kiiyokto Elisha chito kwo ole mi inendet, kwo kolenji, Ui iunge eng’ Jordan konyil tisab, ak weekyiningei kogeny bortang’ung’, ak itililitu.

¹¹ Ago kinerech Naaman, ak kwo ak kole, Keero, kalen, Mong’u sang’ iman ole ami, ak kotonon, ak koguur kainetab Jehovah Kamuktaindennyi, ak kosapsabe eunnyi ole ama, ak kosoob mogondosik.

¹² Tos ma koigoi Abana ak Parpar, ainosiekab Damasko, kosiir beek tugul che bo Israel? Ko ma ko ta amuchi aunege choto ak atililitu? Koweek anyun, ak kwo konerechi mising’.

¹³ Ak kibwa otwogikyik korik, ak kong’alalji, kolenji, Baba, nda kaga lenjin maotiot iyai kit age ne o, ta kama iyae? Ko kamieit ne tia ngo lenjin, Iunge si itililitu?

¹⁴ Kochortagei anyun kwo kochut beek konyil tisab eng’ Jordan, ko u mwaetab chitab Kamuktaindet: ak kiweek bortanyi kowalak koigei bortab lakwet ne ming’in, ak kitililit.

¹⁵ Ak kiweek kwo ole mi chitab Kamuktaindet, inendet ak bikyik tugul che kimi ak inendet, ak kinyo ak kotonon eng’ tainnyi: ak kole, Keer anyun nguno, kaanai ale mami Kamuktaindet eng’ ng’ony tugul, kobate mi eng’ Israel: ara asain nguno anyun ale, taach konunet eng’ otwogindeng’ung’.

¹⁶ Ago kimwa kole, Ko u ye sobei Jehovah, ne atonone tainnyi, ko mataache kiy. Ago kibirji inendet koib; ago kiesio.

¹⁷ Ak kimwa Naaman kole, Ngot ko mata icham, asain ale ngigochi otwogindeng’ung’ ng’ung’unyek che yamei kola nyumbusiek aeng’u; amu koboch nguno ko ma kogochin otwogindeng’ung’ kagochinet ne kibeelei, anan ko tiseiywot, kanamonik, koek Jehovah inegei.

¹⁸ Ingonyochi kaat Jehovah otwogindeng’ung’ eng’ kii: ye wendi kiptaiyandennyu gotab Rimon kosaei eng’ yoto, kotiiegei eunnyu, ak ang’uruge eng’ gotab Rimon, ye ang’uruge eng’ gotab Rimon, ko ingoyochi kaat Jehovah otwogindeng’ung’ eng’ kiito.

¹⁹ Ak kilenji inendet, Ui eng’ kalyet. Kwo anyun eng’ ye kimi inendet ne ma looit.

²⁰ Ago kile Geasi otwogindetab Elisha chitab Kamuktaindet, Keero, kabagakyi kiptaiyandennyu Naaman Suriaindet, amataach eng’ eunnyi tuguk che kaibu: ko u ye sobei Jehovah, alabati asubi inendet, ak aibe inendet tuguk alak.

²¹ Kosub anyun Geasi Naaman. Ak kingogeer Naaman chito kolabatu kosubu inendet, kochorgei eng’ karit kotorokta inendet, ak kolenji, Kalyet?

²² Ak kile, Kalyet. Kaiyokwa kiptaiyandennyu, kole, Keero, kagoit oldanyu murenik aeng’u che bo werikab maotik, che bunu emetab tulonok ne bo Epraim; asomin ale, igochi ichek talentait agenge ne bo feda, ak ngoroik aeng’ che kiwalawali.

²³ Ak kile Naaman, Iyan iib talentaisiek aeng’, ak kibirji inendet, ak koratyi talentaisiek aeng’ che bo feda eng’ lolonik aeng’, ak ngoroik aeng’ che kiwalawali, ak kogochi otwogikyik aeng’ koipchi; ak kiib kondoe inendet.

²⁴ Ak kingoit tulwet, konam inendet tuguchoto eng’ eunekab otwogichoto, ak kwo kogonor eng’ go: ak kimwachi bichoto koba, ak kiba.

²⁵ Ago kiwa inendet go, ak kotonon eng’ taitab kiptaiyandennyi. Ak kilenji Elisha inendet, Ibunu ano, Geasi? Ak kile, Kama wa ui otwogindeng’ung’.

²⁶ Ak kilenji inendet, Kama obe ak muguleldanyu ye kaweeksei chichigai eng’ karinnyi kotorogun? Tos betusiechu ko che kitaage feda, ak ketaage ngoroik, ak mbarenikab emitik, ak mbarenikab sabibuk, ak kechirek ak tuga, ak otwogik che murenik ak che tibik?

²⁷ Namin anyun mogondosikab Naaman ak iyoteng’ung’ koigeny. Ak kimanda eng’ ye kimi inendet ko kagonam mogondosik, koleelit ko u teluchi.