2 LAITORINIK 4 - BUKUIT NE TILIL

Kotesei Elisha mwaitab mosoget

¹ Ak kirirji Elisha kwondo age ne bo osotikab werikab maotik, kolenji, Kigome otwogindeng’ung’ manong’otiondennyu: ak ingen ile kiiywei otwogindeng’ung’ Jehovah: ak kagonyo besendoindet komachei komut lagokyuk aeng’ koba koek otwogik.

² Ak kilenji Elisha inendet, Imache ayaun nee? Mwawa; itinye nee eng’ go? Ak kile, Matinyei kiy age tugul eng’ go otwogindeng’ung’ ne chepto, kobate sotetab mwaita.

³ Kole anyun, Ui somjige terenik eng’ biguk tugul che bo kokweng’ung’, terenik che mami kiy, amat isom che ng’ering’.

⁴ Yeityo iwe go, ak igerjige go koboto weriguk, ak irong’ji mwaata terenichoto tugul; ak ne kagonyi, iiste kwo taban.

⁵ Kwo anyun eng’ ole kimi inendet, kwo kogerigei go koboto werikyik; kiipchi ichek inendet terenik ak kirong’ji.

⁶ Ak kingonyi terenik, kolenji werinnyi, Ibwa teret age. Ak kilenji inendet, Ma komi teret age, ak kisis mwaita.

⁷ Konyo anyun komwachi chitab Kamuktaindet. Ak kile chichoto, Ui alde mwanichato, si iyaaktae besendang’ung’, ak iboisie che kang’et ak weriguk.

Elisha ak Chepsunamindet

⁸ Ak kiwa Elisha Sunem betut age, ole kimi kwondo ne toogunot; ak kibirji inendet koamis. Ak betut age tugul ye kibunei yoto, ko kicham kowendi goyoto koamisiei.

⁹ Ak kilenji inendet manong’otiondennyi, Keero, ageere ale ni ko chito ne tilil ne bo Kamuktaindet, ne cham kosiirtoi eng’ olinyo kotugul.

¹⁰ Asomin ale, ngechopchi got ne ming’in kogakta gonnyo; si kindochi itogut, ak meset, ak ng’echeret, ak kit ne tebe tait; ak ye kanyo gonnyo, kotebe yoto.

¹¹ Ak kinyo yoto betut age, ak kiwa goyoto koru.

¹² Ak kilenji Elisha Geasi otwogindennyi, Kuur Chepsunamindoni. Ak kingo kagoguur, konyo kwonyoto kotonon eng’ tainnyi.

¹³ Ak kilenji otwogindennyi, Ilenji kwonyi, Keero, kaitoretech mising’ eng’ toretoni tugul te ni; imache keyaun nee? Imache kesomun kiy eng’ laitoriat, anan eng’ kiptaiyatab luget? Ak kiwolji kolenji, Amenye kwenutab bikyuk.

¹⁴ Kile anyun Elisha, Kiyachi nee anyun? Ak kiwol Geasi kole, Matinyei werit iman, ak os manong’otiondennyi.

¹⁵ Ak kile, Kuur inendet. Ak kingo kagoguur inendet, konyo kotonon eng’ kurgat.

¹⁶ Ak kile Elisha, Tun kapkora eng’ kenyit ne nyonei, itinye werit. Ak kile, Achicha, kiptaiyandennyu, inye chitab Kamuktaindet, amat imwachi lembech otwogindeng’ung’ ne chepto.

¹⁷ Ak kimanach kwonyoto, ak kisich werit eng’ betunoto, ko kait kenyit, ko u ye kiga mwachi Elisha inendet.

¹⁸ Ak kingoeet lakwanato, koba ak kwandanyi betut age ole mi bik che kesisiei.

¹⁹ Ak kilenji lakwanato kwandanyi, Metinnyu, metinnyu. Ak kilenji chichoto otwogindennyi, Imutyi kamet.

²⁰ Ak kingo kagonam inendet, ak komutyi kamet, kotiny kamet agoi kotonon asis, ak kime.

²¹ Ak kitogosta kwo komogonji inendet itogutab chitab Kamuktaindet, ak kogerji inendet go, ak komanda.

²² Ak koguur manong’otiondennyi kolenji, Asomin ale iyokwa age eng’ otwogik, ak sigiriet age, alabat ole mi chitab Kamuktaindet, si aweek.

²³ Ak kile manong’otiondennyi, Amu nee si iwe ole mi inendet ra? Ama betut ne kaleel arawet, anan ko sabato. Ak kile, Ma ya.

²⁴ Koiito anyun sigiriet, ak kolenji otwogindennyi, Kweri, kebe; mat iwe mutyo, kobate ye kamwaun.

²⁵ Kwo anyun, ak koit ole mi chitab Kamuktaindet eng’ tulwetab Karmel. Ak kingogeer chitab Kamuktaindet inendet eng’ ole loo, kolenji Geasi otwogindennyi, Keero, nin ko Chepsunamindet:

²⁶ asomin ale, labat torokte, ak ilenji, Ichamege? Chamegei manong’otiondeng’ung’? Chamegei lakwet? Ak kiwol kole, Chamegei.

²⁷ Ak kingoit ole mitei chitab Kamuktaindet eng’ tulwet, konam kelyekyik. Ak kinyo Geasi korik konyo kolen kotoorta inendet; ago kile chitab Kamuktaindet, Mete: amu tinyei ng’wanindo eng’ muguleldanyi; ak kagoung’ena Jehovah, ma mwawa.

²⁸ Yeityo komwa kole, Kigamage werit kiptaiyandennyu? Kima ale, Mat igena?

²⁹ Kolenji anyun Elisha Geasi, Kermenge, ak inam kiroktanyu eng’ eung’ung’, ak iwe: ngot ituiye chi, ko mat igat; ak ngot kogatin chi, ko mat iwolji; ak inde kiroktanyu togetab lakwet.

³⁰ Ak kile kametab lakwet, Ko u ye sobei Jehovah, ak ko u ye sobei sobondang’ung’, ko mabagaktoin. Ak king’eet Elisha, kosub inendet.

³¹ Ak kiwa Geasi kondoe ichek, ak konde kirokto togetab lakwet; ago ma biit tweguno, anan kaset. Koweek anyun kotorokta inendet, ak kolenji, Tom kong’eet lakwet.

³² Ak kingonyo go Elisha, ogeero, ko kagome lakwet, ak kaginde itogunnyi.

³³ Kwo go anyun, ak kogerjigei go ichek aeng’u, ak kosa Jehovah.

³⁴ Ak kitogosta, ak korue lakwet, ak kotiing’e kutinnyi kutitab lakwet, ak kotiing’e konyekyik konyekab lakwet, ak kotiing’e eunekyik chechiget: ak koiitoegei baragutab lakwet; ak kilalang’it bortab lakwet.

³⁵ Koweek anyun Elisha, ak kowendot eng’ go; ak kotogosta, ak koiitoegei inendet: ak kirion lakwet konyil tisab, ak kogos.

³⁶ Ak kiguur Geasi kolenji, Kuur Chepsunamindet. Koguur anyun inendet. Ak kingonyo go ole mi Elisha, kolenji Elisha, Kanab wering’ung’.

³⁷ Kwo go anyun, ak kobutyi kelyekyik ak kong’uruk kot koit ng’ony; ak kiganab werinnyi ak komanda.

Kwong’utik aeng’ che kiyai Eliisha

³⁸ Ak kiweek Elisha Gilgal, ak kimi rubet emet; ak kitebyei werikab maotik eng’ tainnyi: ak kilenji otwogindennyi, Kotkot teret ne o, ak iyochi werikab maotik sogoriek.

³⁹ Ak kiwa age mbar kwo kobut ngwek, ak kinyor ketitab motondoronik, ak kobut motondoronikab ketoto, kot konyiit ngoriet, ak konyo komurmurji teret ne mi sogoriek: amu kima nai.

⁴⁰ Koluluk anyun kobwa ng’ony koam bik. Ak ye kiamei tuguchoto, kowaach, kole, Ee chitab Kamuktaindet, mi meet teret orit. Ak mata komuch koam tuguk che kimi teronoto.

⁴¹ Ago kile inendet, Oibu busiek. Ak kirong’ji teret; ak kimwa kole, Olulugu koam bik. Ak kimata kobiit kiy ne ya eng’ teret.

⁴² Ak kinyo chito age eng’ Baal-salisa, ak kiipchi chitab Kamuktaindet makatinikab tongoanik, makatinik tiptem che bo sairik, ak mesisekab bek eng’ lolennyi. Ak kile, Igochi bik koam.

⁴³ Ak kile otwogindennyi, He! Andoi amitwogichu taitab bik bogol? Ago kile, Igochi bik koam; amu kamwa Jehovah ko u ni kole, Amei kot kotuuch.

⁴⁴ Konde anyun tainywa, ak kiamis bichoto, ak kotuuch, ko u ng’olyotab Jehovah.