2 LAITORINIK 2 - BUKUIT NE TILIL

Kotogostoi Elija: konamei Elisha boisietab Elija

¹ Ak ye kimachei Jehovah komut Elija eng’ kipchurjuriet kwo kipsengwet, koba Elija ak Elisha eng’ Gilgal.

² Ak kilenji Elija Elisha, Asomin ale, tebi eng’ yu; amu kagoyokta Jehovah awa agoi Bet-el. Ak kile Elisha, Ko u ye sobei Jehovah, ak ko u ye sobei sobondang’ung’, ko mametoin. Kochortagei anyun Bet-el.

³ Ak kimong’ werikab maotik che kimi Bet-el, kobwa ole mi Elisha, ak kolenji inendet, Ingen ile imuti ra Jehovah kiptaiyandeng’ung’ si ma ko kiptaiyandeng’ung’? Ak kile, Ee, angen; osisye okwek.

⁴ Ak kilenji Elija inendet, Elisha, asomin ale tebi eng’ yu; amu kagoyokta Jehovah awa Jeriko. Ak kile, Ko u ye sobei Jehovah, ak ko u ye sobei sobondang’ung’, ko mametoin. Koit anyun Jeriko tuwai.

⁵ Ak kibwa korik ole mi Elisha, werikab maotik che kimi Jeriko, ak kolenji inendet, Ingen ile imuti ra Jehovah kiptaiyandeng’ung’ si ma ko kiptaiyandeng’ung’? Ak kiwol kole, Ee, angen; osisye okwek.

⁶ Ak kilenji Elija inendet, Asomin ale, tebi eng’ yu; amu kagoyokta Jehovah awa Jordan. Ak kile, Ko u ye sobei Jehovah, ak ko u ye sobei sogondang’ung’, ko mametoin. Ak kiba tuwai.

⁷ Ak kiba murenik konomu che bo werikab maotik, ak kotononso eng’ ole loo kotokyigei ichek: ak kitononso ichek aeng’u eng’ ye negite Jordan.

⁸ Ak kiireek Elija ngoriennyi ak kotaa, ak kokwere beek, ak kipcheiyo beek, koba komosi ak komosi, ak kilanda tuwai eng’ ole yaamat.

⁹ Ak kingolanda, kolenji Elija Elisha, Som kit ne imache ayaun, kotomo kimuta eng’ ole imi. Ak kile Elisha, Asomin ale, ingotebena kebebertab tamirmirieng’ung’ konyil aeng’.

¹⁰ Ak kile, Kesom kit ne uui: ago ngigeera ye kimuta awa eng’ ole imi, kobiitu ko u noto eng’ inye; ago ngot ko ma u noto, ko mabiitu noto.

¹¹ Ak ye kita kobendi, ak kong’alaloti, ogeero, karit ne bo mat, ak mbartanyisiek che bo mat, che kiibesio ichek tuwai; ak kiwa Elija kipsengwet eng’ kipchurjuriet.

¹² Ak kigeer Elisha, ak kowaach kole, Baba, baba, karisiekab Israel ak bik che lanyei mbartanyisiechato! Ak kimata kogeer inendet kogeny: ak kinam ngoroikyik, ak kogerer kopcheune aeng’.

¹³ Ak kinam kogeny ngorietab Elija ne kiibute inendet, ak koweektagei kwo kotonone ngegutab Jordan.

¹⁴ Ak kinam ngorietab Elija ne kiibute inendet, ak kokwere beek, ak kole, Mi ano Jehovah, Kamuktaindetab Elija? Ak kingo kagokwer beek, kopcheiyo, koba komosi ak komosi: ak kilanda Elisha.

¹⁵ Ak kingogeer werikab maotik che kimi Jeriko ko katokyigei inendet, kole, Tebe tamirmirietab Elija Elisha. Ak kiba kotorokta inendet, ak kong’uruk kot koit ng’ony eng’ tainnyi.

¹⁶ Ak kilenji ichek inendet, Keero, mi koboto otwogiguk bik konomu che kimen; kisomin kele, ingoba kocheng’ kiptaiyandeng’ung’: tamangab ko kagomut inendet tamirmirietab Jehovah kotogosta, ak kokwirji tulonok barak, anan ko atebwosiek. Ak kile, Amat oyokte.

¹⁷ Ak kingosimji inendet agoi kolilan, komwa kole, Oyokte. Koyokta anyun murenik konom; ak kicheng’at eng’ betusiek somok, ama nyor inendet.

¹⁸ Ak kiweek ole mi inendet, ye kita kotebyei eng’ Jeriko; ak kilenji inendet ichek, Kimamwawok alenjok, Amat obe?

¹⁹ Ak kilenji bikab nganaset Elisha, Keero, kararan ole mi nganasani, ko u ye keerei kiptaiyandennyu: ago yaachen beek, ama rurtos tuguk eng’ emet.

²⁰ Ak kile, Oibwa sotet ne leel, ak onde orit munyuk. Ak kiipchi inendet.

²¹ Ak kimanda kwo kondametutab beek, ak kowirji orit munyuk, ak kole, Kamwa Jehovah ko u ni kole, Kaasoob beechu; ma kobiitu meet anan osunatet eng’ oloto.

²² Kigisoob anyun beechoto agoi ra, ko u ng’olyotab Elisha ne kimwa.

²³ Ak kitogosta eng’ oloto kwo Bet-el: ak ye kita kotogostoi eng’ oret, komong’ werik che mengechen eng’ nganaset, ak kowit inendet, kolenji, Togoste inye kipchurmet, togoste, inye kipchurmet.

²⁴ Ak kigusgong’ ak kogeer ichek, ak kochub ichek eng’ kainetab Jehovah. Ak kimong’ kogonik aeng’ che bo tiong’ik che kergei ak keerit eng’ osnet, ak koton artam ak aeng’ eng’ werjoto.

²⁵ Ak kiwa eng’ yoto agoi tulwetab Karmel, ak koweek eng’ yoto kwo Samaria.