2 LAITORINIK 18 - BUKUIT NE TILIL

Hesekia, laitoriatab Juda

¹ Kitoi kolaitoran Hesekia weritab Ahas laitoriatab Juda eng’ kenyitab somok ne bo Hosea weritab Ela laitoriatab Israel.

² Ki bo kenyisiek tiptem ak mut ye kitau kolaitorani; ak kilaitoran kenyisiek tiptem ak sogol eng’ Jerusalem: kainetab kamennyi ko ki Abi cheptab Sekaria.

³ Ak kiyai ne mie eng’ taitab Jehovah, ko u tugul che kiga yai Daudi kwandanyi.

⁴ Kiisto komoswek che tororen, ak kobut tolochik, ak koluul Asera: ak kitui erenetab sugunwet ne kiyaei Musa; amu kibeeljin nyamdutik lagokab Israel agoi betusiechoto; ak kiguure Nehustan.

⁵ Kiimang’ Jehovah Kamuktaindetab Israel; ne mata kobiit age kogeny eng’ laitorinik tugul che bo Juda ne kergei ak inendet, anan ko eng’ che ki bo tai eng’ inendet.

⁶ Amu kinamgei ak Jehovah, ma masta eng’ kasubetab Jehovah, ago kirib ng’atutikyik, che king’at Jehovah Musa.

⁷ Ak kimi Jehovah koboto inendet; kibor eng’ komosta age tugul ne kiwa: ak kiingelelji laitoriatab Asuria, ma ot inendet.

⁸ Kibar Pilistik kot koit Gasa ak kiwotosiekyik, koboch teekset ne koi ne bo ribik agoi nganaset ne ng’otat.

⁹ Ak eng’ kenyit ne bo ang’wan ne bo Hesekia, ne ki kenyitab tisab ne bo Hosea weritab Ela, laitoriatab Israel, kotogos Salmaneser laitoriatab Asuria, kobokyi Samaria, ak koyiem.

¹⁰ Ak kingobata kenyisiek somogu, konam nganasanato: kiginam Samaria eng’ kenyitab lo ne bo Hesekia, ne ki kenyitab sogol ne bo Hosea laitoriatab Israel.

¹¹ Ak kiimut laitoriatab Asuria Israel koba Asuria, ak kiwa konde Hala ak Habor, ainetab Gosan, ak nganasokab Medek:

¹² amu kima kas it kutitab Jehovah Kamuktaindenywa, ago kibistoe kayomisennyi, choto tugul kiga ng’at Musa otwogindetab Jehovah, ma cham kogas, anan koyai.

Kobokyin Senakerib ne bo Suria, Juda

¹³ Ak kitogos Senakerib laitoriatab Asuria eng’ kenyitab taman ak ang’wan ne bo laitoriat Hesekia, kobar nganasok tugul che ng’ototin che bo Juda ak konam.

¹⁴ Ak kiiyokto Hesekia laitoriatab Juda chito kwo oldab laitoriatab Asuria eng’ Lakis, kolenji, Kialel; ui weektege eng’ oldanyu: kit age tugul ne igesenwa, alae. Ak king’atyi laitoriatab Asuria Hesekia, laitoriatab Juda talentaisiek bogol somok che bo feda ak talentaisiek sosom che bo tahabu.

¹⁵ Ak kiigochi Hesekia inendet fedaisiek tugul che kimi eng’ gotab Jehovah, ak eng’ konoraikab gotab laitoriat.

¹⁶ Kiinem Hesekia eng’ betusiechoto tahabu eng’ kereiywekab kurgotik che bo gotab Jehovah, ak eng’ tolochik che kiga koliige Hesekia, laitoriatab Juda, tahabu, ak kogochi laitoriatab Asuria.

¹⁷ Ak kiiyokto laitoriatab Asuria Tartan ak Rab-saris ak Rabsake eng’ Lakis koboto luget ne o, koba oldab laitoriat Hesekia eng’ Jerusalem. Ak kitogosta ak koit Jerusalem. Ak kingoit, koba kotononie kererjetab tamboiyot ne bo meto, ne mi oret ne o ne bo koretab mwetindet.

¹⁸ Ak kingoguur laitoriat, komong Eliakim weritab Hilkia, konyo ole mi bichoto, ne kibou got, koboto Sebna sirindet, ak Joa weritab Asap sirindetab tuguk che biitu.

¹⁹ Ak kilenji Rabsake ichek, Olenji Hesekia, Kamwa ko u ni laitoriat ne o, laitoriatab Asuria, kole, Nee kamang’unoni imang’u?

²⁰ Ing’alali, ago ng’alekab buch, ile, Mi kiruoget ak kimnatetab luget. Ara ng’o ne imang’u, si ingelelja?

²¹ Keero, imang’u kiroktab tegandani chisot, noto ko Misri: ne ngo tiiegei chi, kotoorei eunnyi, kwo orit: u noto Parao laitoriatab Misri eng’ ichek tugul che imang’u inendet.

²² Ago ngot olenja, Kimang’u Jehovah Kamuktaindennyo: ko ma inendet, ne kiisto Hesekia komoswekyik che tororen ak kapkorosusiekyik, ak kolenji Juda ak Jerusalem, Osae eng’ taitab kaptisisioni eng’ Jerusalem?

²³ Ara asomin anyun nguno ale, igochi kiptaiyandennyu laitoriatab Asuria kit ne iboru kayosiet, si agonin mbartanyisiek elfusiek aeng’, ngot imuchi eng’ komostang’ung’ inde bik che lanyei mbartanyisiechato.

²⁴ Imuktoi ano anyun iweech togetab kiptaiyat agenge ne ming’in eng’ otwogik tugul che bo kiptaiyandennyu, ak imang’u Misri amu karisiek ak bik che lanyei mbartanyisiek?

²⁵ Ara anyun, kanyo ko magimi ak Jehovah anyo abar oli, ang’em? Kolenja Jehovah, Togoste bar emoni, ak ing’em.

²⁶ Kolenji anyun Eliakim weritab Hilkia, ak Sebna, ak Joa, Rabsake, Asomin ale, ng’alalji otwogiguk eng’ kutitab Suria; amu kigase: mat ing’alalwech eng’ kutitab Yahudik, kogasei bik che mi irimet barak.

²⁷ Ago kilenji Rabsake ichek, Kagoyokwa kiptaiyandennyu anyo oldab kiptaiyandeng’ung’, ak oldang’ung’, si kobiit amwa ng’alechu? Tos ma iyokwa anyo oldab bichu iburi eng’ irimet barak, si koam ng’atatekwak, ak koee beekwak kobotok?

²⁸ Yeityo kotonon Rabsake ak komwa eng’ kutit ne o eng’ kutitab Yahudik ak kong’alal kole, Ogas okwek ng’olyotab laitoriat ne o, laitoriatab Asuria.

²⁹ Kamwa laitoriat ko u ni kole, Amongoberberak Hesekia; amu maimuchi kosoruok eng’ eunnyi.

³⁰ Amongogonok Hesekia omang’u Jehovah, kole, Soruech Jehovah iman, ak magigochin nganasanio laitoriatab Asuria.

³¹ Amat ogas ng’alekab Hesekia: amu kamwa ko u ni laitoriatab Asuria, kole, Oyai kalyet kobota, ak omong’u obwa ole ami; ak koam chi tugul che bo sabibukyik, ak koam chi tugul che bo mogoiywennyi, ak koee chi tugul che bo beekab keringennyi;

³² agoi anyo amutak obe emet ne kergei ak emeng’wong’, emetab beek ak divaik, emetab amitwogik ak mbarenikab sabibuk, emetab mwanikab emitik ak kumik, si kobiit osopche, amobegu: amogas Hesekia, ye igoigook, kole, Soruech Jehovah.

³³ Tos kigobiit eng’ cheptalelisiekab bororiosiek ne kisor emennyi eng’ eutab laitoriatab Asuria?

³⁴ Mi ano cheptalelisiekab Hamat, ak che bo Arpad? Mi ano cheptalelisiekab Separbaim, ak Hena ak Iba? Tos kisor choto Samarik eng’ eunnyu?

³⁵ Ng’o eng’ cheptalelisiek tugul che bo emotinwek, che kigosor emenywa eng’ eunnyu, kot kosor Jehovah Jerusalem eng’ eunnyu?

³⁶ Ago kisisyo bik, ma wolji inendet ng’olyo: amu kiga ng’at laitoriat kole, Amat owolji kiy.

³⁷ Konyo anyun Eliakim weritab Hilkia, ne kibou got, ak Sebna, sirindet, ak Joa weritab Asap sirindetab tuguk che biitu, ole mi Hesekia ko kagogerer ngoroikwak, kobwa komwachi inendet ng’alekab Rabsake.