2 LAITORINIK 16 - BUKUIT NE TILIL

Ahas, laitoriatab Juda

¹ Kitoi kolaitoran Ahas weritab Jotam laitoriatab Juda eng’ kenyitab taman ak tisab ne bo Peka weritab Remalia.

² Ki bo kenyisiek tiptem Ahas ye kitau kolaitorani; ak kilaitoran kenyisiek taman ak lo eng’ Jerusalem: kima yai ne mie eng’ taitab Jehovah Kamuktaindennyi, ko u ye kiyai Daudi kwandanyi.

³ Ago kiwendote ortinwekab laitorinikab Israel, ee, ak kogoito werinnyi kobun mat, ko u tuguk che kiwechei che bo bororiosiek, che kion Jehovah koba eng’ taitab lagokab Israel.

⁴ Ak kienyei inendet tiseiywek ak kobeelei nyamdutik eng’ komoswek che tororen, ak eng’ tulonok, ak eng’ kelutab ketit age tugul ne tuon.

⁵ Konyo anyun Jerusalem Resin laitoriatab Suria koboto Peka weritab Remalia laitoriatab Israel, kobargei: ago kiyiem Ahas, ago kima imuch koterter inendet.

⁶ Eng’ betusiechoto koweekyi Resin laitoriatab Suria, Elat, Suria, ak koon Yahudik eng’ Elat: ak kibwa Suriek Elat, ak komeny oloto agoi rani.

⁷ Koyokto anyun Ahas bik koba oldab Tiglat-peleser laitoriatab Asuria, kolenji, A otwogindeng’ung’ ak ko a wering’ung’; togosu, sorua eng’ eutab laitoriatab Suria, ak eng’ eutab laitoriatab Israel, che machei kobokya.

⁸ Ak kinam Ahas feda ak tahabu che kimi gotab Jehovah, ak che kimi konoraikab gotab laitoriat, ak koyokyi laitoriatab Asuria koek kagochinet.

⁹ Ak kigasyi inendet laitoriatab Asuria: ak kitogosta laitoriatab Asuria kobokyi Damasko, ak konam, ak koluul bikab yoto komut koba Kir, ak kobar Resin.

¹⁰ Ak kiwa laitoriat Ahas Damasko kotorokto Tiglat-peleser laitoriatab Asuria, ak kigeer kaptisisiet ne kimi Damasko: ak kiiyokyi laitoriat Ahas Urija tisiindet kit ne u kaptisisionoto, ak kergeindanyi, ko u musognatennyi tugul.

¹¹ Ak kiteech Urija tisiindet kaptisisiet, ko u tugul che kiga koyokyi laitoriat Ahas eng’ Damasko; kisib koteech anyun ko u noto tisiindet Urija, kotom koit laitoriat Ahas eng’ Damasko.

¹² Ak kingoit laitoriat kobunu Damasko, kogeer kaptisisiet: ak korikyi laitoriat kaptisisionoto, ak kogoite kagochinoik.

¹³ Ak kibeel kagochinennyi ne kibeelei ak kagochinennyi ne bo busiek, ak korong’ji kagochinennyi ne kieei, ak koise kaptisisiet korotikab kagochinoikyik che bo kalyet.

¹⁴ Ak kiib kaptisisietab sugunwet ne kimi taitab Jehovah konyo eng’ taitab got, komong’ eng’ kwenutab kaptisisiennyi ak gotab Jehovah, ak konde komostab murot ne bo katam ne bo kaptisisiennyi.

¹⁵ Ak king’at laitoriat Ahas Urija tisiindet, kolenji, Beel kagochinet ne kibeelei ne bo karon eng’ kaptisisiet ne o, ak kagochinet ne bo koskoleny ne bo busiek, ak kagochinet ne kibeelei ne bo laitoriat, ak kagochinennyi ne bo busiek, koboto kagochinenywa ne kibeelei ne bo bik tugul che bo emet, ak kagochinoikwak che bo busiek, ak kagochinoikwak che kieei, ak iise kaptisisionoto korotik tugul che bo kagochinenywa ne kibeelei, ak korotik tugul che bo tiseiywek: kobate kaptisisietab sugunwet, kobunjina, noto ateepse.

¹⁶ Kiyai ko u noto Urija tisiindet, ko u tugul che king’at laitoriat Ahas.

¹⁷ Ak kitil laitoriat Ahas tabanwekab ng’echerok, ak koisto tabet ne o eng’ kwenutab tuguchoto; ak konem nyanjet ne kimi baragutab eikab sugunonik, konyo ng’ony, ak konde baragutab koik che kigitet.

¹⁸ Ak kiwal oret ne kerat ne bo sabato ne kiga kiyai eng’ go, ak ole mandoe laitoriat eng’ ole bo sang’, kiiweech kotokyi gotab Jehovah amu laitoriatab Asuria.

¹⁹ Ak boisionik che ng’etunotin che kiyai Ahas, tos ma sirotin eng’ bukuitab ateptab betusiek ne bo laitorinikab Juda?

²⁰ Ak kiru Ahas koboto kwanisiekyik, ak kigitub koboto kwanisiekyik eng’ nganasetab Daudi: ak kilaitoran Hesekia werinnyi kogeer inendet.