2 LAITORINIK 12 - BUKUIT NE TILIL

Koteechei jaas ole kigobutok eng’ hekalut

¹ Kitoi kolaitoran Jeoas eng’ kenyitab tisab ne bo Jeu; ak kilaitoran kenyisiek artam eng’ Jerusalem: ak kainetab kamet ko ki Sibia ne bo Beer-seba.

² Ak kiyai Jeoas ne mie eng’ taitab Jehovah eng’ betusiekyik tugul koneti Jeoiada tisiindet inendet.

³ Agos kima kiisto komoswek che tororen: kita koenyei bik tiseiywek, ak kobeelei nyamdutik eng’ komoswek che tororen.

⁴ Ak kilenji Jeoas tisiik, Ingoib tisiik fedaisiek tugul che bo tuguk che itabanotin che kiibu kobwa gotab Jehovah, ak fedaisiek che kiboisie, fedaisiek che bo bik che te che yamei koitetab chi age tugul, ak fedaisiek tugul che kaibwat chi eng’ muguleldanyi kole koib kobwa gotab Jehovah,

⁵ koib tisiik choto, tisiindet age tugul eng’ chito ne ingenge: si koteech ole kigobutok eng’ got, komosta age tugul ole mi ole butot.

⁶ Ago kingoitei kenyitab tiptem ak somok ne bo laitoriat Jeoas, ko kitomo koteech tisiik ole kiga kobutok eng’ got.

⁷ Koguur anyun laitoriat Jeoas tisiindet Jeoiada, koboto tisiik alak, ak kolenji ichek, Amu nee si moteeche ole kigobutok eng’ got? Noto anyun, amata oib fedaisiek eng’ che ongenge, ogoite keyae ole kigobutok eng’ got.

⁸ Ak kiiyan tisiik kole ma koibei fedaisiek eng’ bik, ama teechei ole kigobutok eng’ got.

⁹ Ago kinam Jeoiada moinget, ak korut kereiywondennyi, ak konde taban eng’ kaptisisiet, eng’ komostab tai kebendi go eng’ gotab Jehovah: ak kiinde moingonoto tisiik che kiribei kurget, fedaisiek tugul che kigiibu kobwa gotab Jehovah.

¹⁰ Ak kingogeer kole kagochang’a fedaisiek eng’ moinget, kotogos sirindetab laitoriat ak tisiindet ne o konde lolonik ak koiit kogeer kit ne te fedaisiechoto kimi gotab Jehovah.

¹¹ Ak kiigochi fedaisiechoto kiga kigaman, bik che kiboisiei, che kiribei gotab Jehovah: ak kogochi musogik ak teegik, che kiyaei gotab Jehovah,

¹² ak bik che teekse koik, ak che waei koik, ak koalei baoinik ak koik che kwaotin che kiteege ole kiga kobutok eng’ gotab Jehovah, ak koalei tuguk tugul che kigiib keteege got.

¹³ Ago ma kiyachi gotab Jehovah kikombokab feda, anan ko magasisiek che kitile ole lalei eng’ taisiek, anan ko tabok, anan ko igondisiek, ak terenik alak tugul che bo tahabu, anan ko terenikab feda, eng’ fedaisiek che kigiib kobwa gotab Jehovah:

¹⁴ amu kiigochi choto ichek che kiyai boisiet, ak koteege gotab Jehovah.

¹⁵ Ago ma iit koboto bichoto, kiigochin fedaisiek konam si kogochi bik che yaei boisiet: amu kiboisie imanda.

¹⁶ Kima kiib fedaisiekab kagochinoikab chalwogik, ak fedaisiekab kagochinoikab tengekto, kobwa gotab Jehovah: ki bo tisiik.

¹⁷ Kotogosta anyun Hasael laitoriatab Suria kwo kobargei ak Gat, ak kinam nganasanato: ak kitokyigei Hasael Jerusalem.

¹⁸ Ak kinam Jeoas laitoriatab Juda tuguk tugul che itabanotin che kiga itaban Jeosapat, ak Jeoram, ak Aasia, kwanisiekyik, laitorinikab Juda, ak tugukyik che itabanotin, ak tahabusiek tugul che kimi konoraikab gotab Jehovah, ak che bo gotab laitoriat, ak koyokyi Hasael laitoriatab Suria: ak kiwa eng’ Jerusalem.

¹⁹ Ak boisionik che ng’etunotin che bo Joas, ak tuguk tugul che kiyai, ko tos ma sirotin eng’ bukuitab ateptab betusiek ne bo laitorinikab Juda?

²⁰ Ak king’eetyo otwogikyik kochaam inendet, ak kibar Joas eng’ gotab Milo, eng’ oret ne chortoegei Sila.

²¹ Amu kibar inendet Josakar weritab Simeat, ak Jeosabad weritab Somer otwogikyik, ak kime; ak kitub inendet koboto kwanisiekyik eng’ nganasetab Daudi: ak kilaitoran Amasia werinnyi kogeer inendet.