2 LAITORINIK 11 - BUKUIT NE TILIL

Korebei Atalia laitornatet. Kieeti Joas koek laitoriat eng’ Juda

¹ Ak kingogeer Atalia kametab Aasia kole kagome werinnyi, kong’eet ak kobar anyun iyotet tugul ne bo gab laitoriat.

² Ago kichor Jeoseba cheptab laitoriat Joram, chepkametab Aasia, Joas weritab Aasia, ak komut inendet ak cheblakwet eng’ ole mi werikab laitoriat che kigibarei, kwo koung’e ichek got orit ne kirue, si manyor Atalia, ak kobar.

³ Ak kitebi ak inendet, kounyegei eng’ gotab Jehovah kenyisiek lo: ak kilaitoran Atalia koboi emet.

⁴ Ak kiiyokto Jeoiada chito eng’ kenyitab tisab kwo koguur kiptainik che bou bogolwogikab Karitik, ak che bo ribik, koguur ichek kobwa ole mi inendet eng’ gotab Jehovah; ak kiiyomisgei koboto ichek, ak kolenji koyosio eng’ gotab Jehovah, ak koborji ichek weritab laitoriat.

⁵ Ak king’at ichek kolenji, Ni kit ne oyae: Egu kebeberta agenge eng’ somok eng’ okwek, che obwane sabato, ribikab ripset eng’ gotab laitoriat;

⁶ ak tebe kebeberta agenge eng’ somok, ormarichetab Sur; ak kotebe kebeberta agenge eng’ somok batetab ribik: oribe anyun ripsetab got ko u noto, ak oegu ng’otwet.

⁷ Ak ripsei kweanaik aeng’u eng’ okwek, tugul che omandoi eng’ sabato, eng’ ripsetab gotab Jehovah, koyiemei laitoriat.

⁸ Ak oyieme laitoriat, kotinyei chi tugul karikyik eng’ eunnyi; ak inendet ne nyonei ole mi bichoto, kebarei: ak obe ak laitoriat ye wendi komandoi sang’, ak ye nyonei go.

⁹ Ak kiyai kiptainik che bou bogolwogik ko u tuguk tugul che king’at Jeoiada tisiindet: ak kiimut chi age tugul bikyik, che kibwanei eng’ sabato, koboto che kimandoi eng’ sabato, ak kobwa ole mi Jeoiada tisiindet.

¹⁰ Ak kiigochi tisiindet kiptainik che bou bogolwogik, ng’otwek ak long’onik che ki bo laitoriat Daudi, che kimi gotab Jehovah.

¹¹ Ak kitonondos ribik, kotinyei chi tugul karik eng’ eunnyi, kong’eete komostab tai ne bo got agoi komostab katam, kobun ole negite kaptisisiet ak ole negite got, koyiem laitoriat.

¹² Komut anyun weritab laitoriat komong’, ak kolaakyi narietab laitornatet, ak kogochi baornatet; ak koyai inendet koek laitoriat, ak koiil inendet; ak koraprab eunekwak, ak kole, Ingosob laitoriat.

¹³ Ak kingogas Atalia bolatetab ribik ak bik, konyo ole kimi bik eng’ gotab Jehovah:

¹⁴ ak kigeer, ak ogeero, kitononi laitoriat eng’ ye negite toloita, ko u ye ki biteet, ak kimi kiptainik ak bik che kuutei iriagok ole negite laitoriat; ak kiboiboitu bik tugul che bo emet, ak koguut iriagok. Kogerer anyun Atalia ngoroikyik, ak kowaach kole, Chaamset, chaamset.

¹⁵ Ak king’at Jeoiada tisiindet kiptainikab bogolwogik che bou luget, kolenji, Omaande inendet kobun kwenutab bik; ak kibarei eng’ rotwetab chok, chito ne isubi inendet: amu kimwa tisiindonoto kole, Amat kebar inendet eng’ gotab Jehovah.

¹⁶ Koistochigei anyun inendet; ak kibun Atalia oret ne bunei mbartanyisiek kobendi gotab laitoriat: ak kigibarji inendet yoto.

¹⁷ Ak kiyai Jeoiada arorutiet eng’ kwenutab Jehovah ak laitoriat ak bik kole egu ichek bikab Jehovah; ak eng’ kwenutab laitoriat agine ak bik.

¹⁸ Ak kiba bik tugul che bo emet gotab Baal, ak kobut kolul; kibut kapkorosusiekyik ak kanamonikyik kotonaton inne, ak kobar Matan tisiindetab Baal eng’ taitab kapkorosusiek. Ak kilewen tisiindet bounik korib gotab Jehovah.

¹⁹ Ak kiimut kiptainik che bo bogolwogik, ak Karitik, ak ribik, koboto bik tugul che bo emet, ak kiimut laitoriat kochorgei eng’ gotab Jehovah, kobun oretab ormarichetab ribik agoi gotab laitoriat. Ak kitebe ng’echeretab laitornatet ne bo laitorinik.

²⁰ Koboiboitu anyun bik tugul che bo emet, ak kisis nganaset: ak kibar Atalia eng’ rotwetab chok eng’ gotab laitoriat.

²¹ Kitoi kolaitoran Jeoas ko bo kenyisiek tisab.