2 LAITORINIK 10 - BUKUIT NE TILIL

Kobarei Jeu gotab Ahab kot kosegei, ak kobar che kisaei Baal

¹ Ak kitinyei Ahab werik tamanwogik tisab eng’ Samaria. Ak kisir Jeu baronok, ak koyokto koba Samaria, koyokyi bounikab Jesreel, che ichek ko ki boisiek, ak koyokyi ichek che kibaei werikab Ahab ko mengechen, kolenji,

² Ne bo koitu oldang’wong’ baruani, amu mi werikab kiptaiyandeng’wong’ kobotok, ak otinye karisiek ak mbartanyisiek, ak nganaset ne ng’otat, ak karik che bo luget:

³ ocheng’ ne mie, ne yamegei eng’ werikab kiptaiyandeng’wong’, ak onde inendet kotebe ng’echeretab laitornatet ne bo kwandanyi, ak oyai luget agobo gotab kiptaiyandeng’wong’.

⁴ Ago kiarogenso mising’, ak kole, Ogeero, ma tononso laitorinik aeng’u eng’ tainnyi: ketonondoi ano achek?

⁵ Ak kiiyokyi inendet ne kibou got komugul, ak inendet ne kibou nganaset, koboto boisiek agichek, ak ichek che kibaei lagochoto, koyokyi ng’olyot Jeu, kolenji, Ki otwogiguk, ak kiyae tuguk tugul che imwawech; magiyae chito age koek laitoriat: yai kit ne igeere ile mie.

⁶ Kosirji anyun ichek kogeny baruet, ne bo aeng’, kolenji, Ngot omi komostanyu, ak ngot ogase it ng’alekyuk, otil metowekab bichoto werikab kiptaiyandeng’wong’, ak obwa ole ami eng’ Jesreel, mutai koteni asis. Ak kimi werichato bo laitoriat tamanwogik tisabu koboto bik che toogunotin che bo nganaset, che kibaei ichek ko mengechen.

⁷ Ak kingoit baruet oldanywa, konam werikab laitoriat ak kobar, che ichek ko ki bik tamanwogik tisab, ak konde metowekwak kitongok, ak koyoktochi inendet eng’ Jesreel.

⁸ Ak kinyo chito ne kigiyogu, ak komwachi inendet kolenji, Kageib metowekab werikab laitoriat. Ak kile, Onde ng’ony eng’ ole kibunei kebendi nganaset, koek karurugutik aeng’, agoi karon.

⁹ Ak ki eng’ karon, komanda ak kotonon, ak kolenji bik tugul, O bo iman: ogeero, kiachaam kiptaiyandennyu ak abar inendet: ago ng’o ne kobar chu tugul?

¹⁰ Onai anyun nguno ole mabetei kiy eng’ ng’olyotab Jehovah, ne kimwa Jehovah agobo gotab Ahab: amu kagoyai Jehovah kit ne kimwa eng’ otwogindennyi Elija.

¹¹ Kobar anyun Jeu tugul che kigong’et che bo gotab Ahab eng’ Jesreel, koboto bikyik tugul che eechen, ak choronokyik che kicham ko choronoi, ak tisiikyik, kot ma ituukyi inendet chi agot agenge.

¹² Ak king’eet kwo Samaria. Ak ye kimi got ne kitile kororikab kechirek, ne bo mestowek, eng’ oret,

¹³ kotuiye Jeu che tupcho ak Aasia laitoriatab Juda; kolenji, O ng’o? Ak kiwol kole, Ki tupchosiekab Aasia: ak kichortoige kigati lagokab laitoriat ak lagokab kwondab laitoriat.

¹⁴ Ak kimwa inendet kole, Onam. Ak kinam ichek, ak kobar ichek eng’ keringet ne bo got ne kitilisie, bik artam ak aeng’; ama bagakta agot agenge eng’ ichek.

¹⁵ Ak ye kingo kakwa eng’ yoto, kotuiyo ak Jeonadab weritab Rekab kotorogu inendet: ak kiigat inendet ak kolenji, Mie muguleldang’ung’, ko u ye mie muguleldanyu eng’ muguleldang’ung’? Ak kiwol Jeonadab kole, Mie. Ngot ko u noto, igona eut. Ak kiigochi inendet eut; ak kinam inendet kwo karit orit.

¹⁶ Ak kimwa kole, Ngebe tuwai, igeer kagiilennyu ne bo ge agobo Jehovah. Kogochi anyun kobun karinnyi.

¹⁷ Ak kingoit Samaria, kobar bik tugul che kiga ng’etyi Ahab eng’ Samaria, agoi koges inendet ko u ng’olyotab Jehovah, ne kimwachi Elija.

¹⁸ Ak kiiyum Jeu bik tugul, ak kolenji, Kiot Ahab Baal kitigin; ago otei Jeu mising’.

¹⁹ Oguurwa anyun maotik tugul che bo Baal, bik tugul che saei inendet, ak tisiikyik tugul, amongong’et agot agenge: amu atinye tiseiywot ne o ne aeng’jini Baal; chi age tugul ne ng’etu, ko masobei. Ago kiyai Jeu ko u noto kong’alsei, komachei kobar bik che saei Baal.

²⁰ Ak kile Jeu, Ong’at tuiyetab Baal ne bo kaming’inetab ge.

²¹ Ak kiiyokto Jeu bik koba Israel tugul: ak kibwa bik tugul che saei Baal, kot ko ma ng’et chi ne ma nyo. Ak kibwa gotab Baal; ak kinyi bik gotab Baal, kong’eete komosi kot koit komosin.

²² Ak kilenji chito ne ribei ole kigonore ngoroik, Inemji ngoroik bik tugul che saei Baal. Ak kiinemji ichek ngoroik.

²³ Kiba gotab Baal, Jeu ak Jeonadab weritab Rekab; ak kolenji Jeu bik che kisaei Baal, Ocheng’ ogeer ngo mi yu kobotok chi age tugul eng’ otwogikab Jehovah, kobate bik che saei Baal ichegei.

²⁴ Ak kiba go kogoito tiseiywek ak kagochinoik che kibeelei. Ak kiga kochob Jeu bik tamanwogik sisiit eng’ sang’, ak kolenji, Ngot kochilil chi age tugul ne amutu konyo eunekwok, ko inendet ne kaunda kochilil, kogeeri sobondanyi inendet.

²⁵ Kingoges eng’ yoto kagoitoetab kagochinet ne kibeelei, kolenji Jeu ribik ak kiptainikab luget, Oba go, ak obar; amongochilil agot agenge. Ak kibar eng’ rotwetab chok; ak kiwir ribik ak kiptainikab luget ichek komong’, ak koba nganasetab gotab Baal.

²⁶ Ak kiib tolochik che kimi gotab Baal, komong’, ak kobeel.

²⁷ Ak kiiluul toloitab Baal, ak kobut gotab Baal, ak koyai koek got ne kimasyin, agoi ra.

²⁸ Kobut anyun Jeu Baal eng’ Israel.

²⁹ Agos ma istoegei Jeu kasubetab tengekwogikab Jeroboam weritab Nebat, ne kiigochi Israel koyai tengekto, che ki moekab tahabu che kimi Bet-el ak che kimi Dan.

³⁰ Ak kilenji Jehovah Jeu, Amu kiiyai ne mie eng’ yaetab imanda ne mie eng’ tainnyu, ak iyachi gotab Ahab ko u tuguk tugul che kimi muguleldanyu, tebe anyun weriguk ng’echeretab laitornatet ne bo Israel, agoi ibindab ang’wan.

³¹ Ago ma mage kiy Jeu kowendote ng’atutikab Jehovah, Kamuktaindetab Israel, eng’ muguleldanyi tugul: ma istoegei tengekwogikab Jeroboam, che kiibeete Israel si koyai tengekto.

³² Kitoi Jehovah eng’ betusiechoto kotil Israel kong’ering’itu: ak kibar Hasael ichek eng’ kiwotosiek tugul che bo Israel;

³³ kong’eete Jordan komostab kong’asis, emet tugul ne bo Gilead, ne bo Gadik, ak ne bo Reubenik, ak ne bo Manasik, kong’eete Aroer ne mi ole bo atebwetab Arnon, choto ko Gilead ak Basan.

³⁴ Ak boisionik che ng’etunotin che bo Jeu, ak tuguk tugul che kiyai, ak kimnatennyi tugul, ko ma sirotin eng’ bukuitab ateptab betusiek ne bo laitorinikab Israel?

³⁵ Ak kiru Jeu ak kwanisiekyik: ak kigitub inendet eng’ Samaria. Ak kilaitoran Jeoahas werinnyi kogeer inendet.

³⁶ Ak kenyisiek che kilaitoran Jeu koboi Israel eng’ Samaria ko ki kenyisiek tiptem ak sisiit.