2 LAITORINIK 1 - BUKUIT NE TILIL

Koguurei Elija mat kobun kipsengwet

¹ Ak kingo kagome Ahab kongelelji Moab Israel.

² Ak kirorok Aasia eng’ tirisietab gonnyi ne bo barak ne kimi Samaria, ak kimian: ak kiiyokto bik, ak kolenji, Oba, oteebe Baal-sebub kanamwetab Ekron ngo tos asob eng’ miani.

³ Ago kilenji malaikaiyatab Jehovah Elija Tisbindet, Ng’eet, ak iwe otuiye ak bik che kaiyokto laitoriatab Samaria, ak ilenji ichek, Si obe oteepse Baal-sebub kanamwetab Ekron, ko amu mami Kamuktaindet Israel?

⁴ Ara anyun, kamwa Jehovah ko u ni kole, Mechoruge eng’ itogut ne kagelany, ago imee iman. Ak kiwa Elija.

⁵ Ak kiweek bichoto koba oldanyi, ak kilenji ichek, Kalya si owege?

⁶ Ak kilenji inendet, Konyo chito kotuiyenech ak kolenjech, Oba oweege ole mi laitoriat ne kaiyokwok, ak olenji inendet, Kamwa Jehovah ko u ni kole, Si iyokte bik koba koteepse Baal-sebub kanamwetab Ekron, ko amu mami Kamuktaindet Israel? Noto anyun, ko mechoruge eng’ itogut, ago imee iman.

⁷ Ak kilenji ichek, Ka chi ne u nee chichoto katuiyenok, ak komwawok ng’alechuto?

⁸ Ak kiwolji inendet kolenji, Ka chito ne sabul, ak koratategei birenet eng’ suennyi. Ak kile, Inendet ko Elija Tisbindet.

⁹ Koyoktochi anyun laitoriat inendet kiptaiyat ne bou konom koboto bikyik konom. Ak kitogosta kwo ole mi inendet: ak ogeero, kitebyei ng’ony Elija eng’ tulwet barak. Ak kimwachi inendet kolenji, Ee, chitab Kamuktaindet, kole laitoriat, Choruge.

¹⁰ Ak kiwolji Elija kiptaiyatab bichoto konom, kolenji, Ngot ko a chitab Kamuktaindet, kochorgei mat eng’ kipsengwet, ak kobeelin koboto biguk konom. Ak kichorgei mat eng’ kipsengwet, ak kobeel inendet ak bikyik konom.

¹¹ Ak kiiyokyi inendet kogeny kiptaiyat age ne bou konom, ak bikyik konom. Ak kiwolji inendet kolenji, Ee, chitab Kamuktaindet, kamwa laitoriat ko u ni kole, Chogu choruge.

¹² Ak kiwolji Elija ichek kolenji, Ngot ko a chitab Kamuktaindet, kochorgei mat eng’ kipsengwet, ak kobeelin koboto biguk konom. Ak kichorgei matab Kamuktaindet eng’ kipsengwet, ak kobeel inendet ak bikyik konom.

¹³ Ak kiiyokto kogeny kiptaiyat ne bou konomutab somok koboto bikyik konom. Ak kitogosta kiptaiyatab somok ne bou konom, ak konyo kogutuny eng’ taitab Elija, ak kosaisai inendet, kolenji, Ee chitab Kamuktaindet, asain ale, ingobunji kamanut ne o, sobondanyu, ak sobonwekab otwogichuguk konom eng’ taing’ung’.

¹⁴ Keero, kachorgei mat eng’ kipsengwet ak kobeel kiptainichu ka bo tai aeng’ chu kabou konom ak konomusiekwak: ago ingobunji sobondanyu kamanut ne o eng’ taing’ung’ nguno.

¹⁵ Ak kilenji malaikaiyatab Jehovah Elija, Orekte tuwai ak inendet: amat iywei inendet. Ak king’eet ak kirekta tuwai ak inendet agoi ole mi laitoriat.

¹⁶ Ak kilenji inendet, Kamwa Jehovah ko u ni, kole, Ko u ye keyokte bik koba koteepse Baal-sebub kanamwetab Ekron, ko amu mami Kamuktaindet eng’ Israel ne iteepse eng’ ng’olyondennyi? Noto anyun, mechoruge eng’ itogut ne kagelany, ago imee iman.

¹⁷ Kome anyun ko u ng’olyotab Jehovah ne kiga mwa Elija. Ak kitoi kolaitoran Jeoram kogeer inendet, eng’ kenyitab aeng’ ne bo Jeoram weritab Jeosapat laitoriatab Juda; amu kima kotinyei werit.

¹⁸ Ak boisionik che ng’etunotin che bo Aasia che kiyai, ko tos ma sirotin eng’ bukuitab ateptab betusiek ne bo laitorinikab Israel?