2 KORINTOEK 7 - BUKUIT NE TILIL

¹ Amu kitinye arorutichu anyun, chamanichu, ongitililge, keiste simdo tugul ne bo borto ak ne bo tamirmiriet, si keityi tililindo eng’ kaiyweisietab Jehovah.

Kererwekab met. Kagaigaet amu nyonunetab Tito

² Oyatwech mugulelwekwok: ma kiyachi chi age tugul kiy ne ya, ma king’em chi age tugul, ma kiibe chi age tugul kiy.

³ Mamwae nito ale aruokwok: amu kisib amwa, ale omi eng’ mugulelwekyok kebegu tugul ak kesopche tugul.

⁴ O nyiganatet ne ang’alalunenok, o katororennyu bo ge agobo okwek: kanyiia kagaigaet, kanyiia boiboiyet kot kong’irtagei eng’ bichiinwekyok tugul.

⁵ Amu agot ye kingeitu Makedonia, ko manyor borwekyok kamuung’et, ago kiginyalilech eng’ komosta age tugul; kimi sang’ boriosiek, ak kimi orit kaiyweisiosiek.

⁶ Ago Jehovah ne igoigoi che nyerotin, ko kiigaigaech eng’ nyonunetab Tito;

⁷ ak, ma eng’ nyonunennyi kityo, ago eng’ kagaigaet ne kiogaigai inendet, ye kingomwawech emostong’wong’, ak rirekwok, ak kagiileng’wong’ bo ge agobo ane; kot abaibaitu mising’ kosiir.

⁸ Amu agot ngo kiagonok oarogense eng’ baruennyu, ko ma ageer ko ya, nganda kita ageer ko ya; amu ageere ale kigonok baruanato oarogense, nganda ki bo betusiek che matia.

⁹ Abaibai nguno, ma amu kigigonok oarogense, ago abaibai amu kigigonok oarogense agoi sigunet: amu kigigonok oarogense eng’ arogenet ne tokyingei Jehovah, si mabetwok kiy age tugul amu achek.

¹⁰ Amu arogenet ne tokyingei Jehovah koyaei sigunet agoi yetunet, ne matinyei ndara: ago arogenet ne bo ng’onyuni koibu meet.

¹¹ Amu ogeero, ng’olyondonito ne kigonok arogenet ne tokyingei Jehovah, ko kiyai kagiilet ne u nee eng’ okwek; ee, sorunetab ge, ee, nereknatet; ee, kaiyweisiet; ee, emosto; ee, kagiiletab ge; ee, yaaktaetab mugetut! Eng’ kiy age tugul ko kiobartege ole o tililen eng’ ng’olyondonito.

¹² Ko anyun, nganda kiasirwak, ko kima asirwak agobo ng’olyondetab inendet ne kiyai ne ya, anan amu ng’olyondetab inendet ne kigiyachi ne ya, ago si kong’ang’ak eng’ okwek kagiileng’wong’ bo ge agobo achek eng’ taitab Jehovah.

¹³ Noto anyun kigigaigaech: ak eng’ kagaigaennyo ko kigiboiboitu mising’ ne siirei amu boiboiyetab Tito, amu kiogochi okwek tugul tamirmiriennyi komuuny.

¹⁴ Ak ngo kiamwachi inendet kiy age tugul eng’ losetab ge agobo okwek, ko kima kigona alilan; ago ko u ye kigemwawok tuguk tugul eng’ iman, ko u noto kalosunennyo agine, ne kiamwa eng’ taitab Tito, ko kiek iman.

¹⁵ Ak o mising’ ne siirtoot chamnyennyi ne bo orit agobo okwek, kobwati kasetab it neng’wong’ tugul, ko u ye kiotaach inendet eng’ kaiyweisiet ak botanet.

¹⁶ Abaibai anyun amu ating’enok kamang’unet eng’ kiy age tugul.