2 KORINTOEK 5 - BUKUIT NE TILIL

¹ Amu kingen kele ngobutok got ne bo ng’onyuni ne borwekyok, ketinye teekset ne bunu Jehovah, got ne kima kiteech eng’ eunek, bo koigeny, eng’ kipsengwet.

² Amu iman kitigendosi eng’ ni, kimache mising’ kilaakwech meng’otennyo ne bunu kipsengwet:

³ ye tun kagilaakwech ko ma kemi ach ngor.

⁴ Iman, achek che kimi eng’ borito, ketigendosi, ketinye laiset; ma kele kimache kereegunenech, ago kimache kilaakwech, si kobiit kolugui sobondo noto meei.

⁵ Ara anyun, ne kiyaech agobo nito, ko Jehovah, ne kigonech Tamirmiriet, koek tangoaniatab tuguk che bwanei.

⁶ Eng’ noto anyun ki nyigonen kotugul, ak kingen kele, ye ta kemi eng’ borto, ko kagimi koboto Kiptaiyat

⁷ (amu kibendoti eng’ kayanet, ma eng’ keeret);

⁸ amwae ale, ki nyigonen, ak kemache kele, kaigai kemande eng’ borto, ak ketebi koboto Kiptaiyat.

⁹ Noto anyun ko kit ne kitokyinige, ngemi eng’ bori, anan ngo magimi, keegu che iboiboi inendet.

¹⁰ Amu kanyol kibartech achek tugul eng’ taitab ng’echeretab kiruoget ne bo Kristo; si kobiit kotaach chi age tugul tuguk che te che kiyai eng’ borto, ngo miach anan ngo yaach.

Ichiichech chamnyetab Kristo, ne inendet kimnatennyo

¹¹ Amu kingen anyun kaiyweisietab Kiptaiyat, kichuutu bik, ago kibortaech eng’ taitab Jehovah; ak amang’u ale kibortoech eng’ taitab kabwateng’wong’.

¹² Magimwauge kogeny eng’ taing’wong’, ago kigonok boroindo si kobiit olosuge amu achek, si kobiit onyoru kit ne kowoljini icheget che ilosugei eng’ tuguk che toogu, ama eng’ muguleldo.

¹³ Agot ngo kogobetech met, ko eng’ Jehovah; anan ngo litit ng’omnatennyo, ko amu okwek.

¹⁴ Amu ichiichech chamnyetab Kristo; amu kigeere ko u ni, kele kimechi chito agenge tugul, noto anyun kibek tugul;

¹⁵ ak kimechi inendet tugul, si ma kosoptos agobo ge icheget che soptos, ago agobo inendet ne kimechi ak kong’eet kogeny.

Sobondo ne leel eng’ Kristo

¹⁶ Noto anyun koboch nguno ko magingen chi age tugul eng’ borto: ago ngot kigingen Kristo eng’ borto, ko magingen inendet nguno ko u noto kogeny.

¹⁷ Noto anyun, ngo mi chi age tugul eng’ Kristo, ko kigeyai inendet koek chito ne leel: kagosiirto tuguk che bo keny; ogeero, kagoek che leelach.

¹⁸ Ago bo tuguk tugul Jehovah ne kiituiyenech ge eng’ Kristo, ak kigonech achek boisiet ne bo katuiyet;

¹⁹ kele kimi Jehovah eng’ Kristo kotuitos ng’ony ak inendet, ko maiityin ichek yaitwogikwak, ko kagogonech ng’olyotab katuiyet.

Ng’olyotab katuiyet

²⁰ Noto anyun ki tononjinik agobo Kristo, ko u ye igoigook Jehovah eng’ achek; kigoigook agobo Kristo, kele otuiyege ak Jehovah.

²¹ Inendet ne kima kongen tengek, ko kiyai inendet koek tengek amu achek; si kobiit keegu imanda ne bo Jehovah eng’ inendet.