2 ATEPTAP PEETUUSYEK 7 - BUKUIT NE TILIL

Tiseiywekab Solomon ak kayomisutikab Jehovah

¹ Ak kingoges Solomon saet, kochorgei mat eng’ kipsengwet, ak kobeel kagochinet ne kibeelei ak korosek; ak kinyi got lilindab Jehovah.

² Ak kima imuch tisiik koba gotab Jehovah, amu kiganyi lilindab Jehovah gotab Jehovah.

³ Ak kigeerei lagok tugul che bo Israel ye kichorugei mat, ak kitebe lilindab Jehovah baragutab got; ak kiing’urugis kot koit ng’ony togochikwak, eng’ ye kigitetyi koik, ak kolos, ak komwachi kongoi Jehovah, kole, Amu mie inendet; amu bo koigeny rirenennyi.

⁴ Kogoito anyun laitoriat, koboto bik tugul, tiseiywek eng’ taitab Jehovah.

⁵ Ak kiigoito laitoriat Solomon tiseiywek che bo eik elfusiek tiptem ak aeng’, ak kechirek elfusiek bogol ak tiptem. Kotaban anyun laitoriat ak bik tugul gotab Kamuktaindet.

⁶ Ak kitononso tisiik kobee boisionikwak; koboto Lawik che kitinyei kibungandinikab tienwogik che bo Jehovah, che kiga koyai Daudi laitoriat che kimwachine kongoi Jehovah, amu bo koigeny rirenennyi, ye kiilosu Daudi eng’ otisienywa: ak kiguutei iriagok tisiik eng’ tainywa; ak kitononso Israel tugul.

⁷ Kogeny kiitilil Solomon kwenutab seremut ne kimi taitab gotab Jehovah; amu kiigoito eng’ yoto kagochinoik che kibeelei, ak mwanik che bo kagochinoikab kalyet: amu kima koyamei kaptisisietab sugunwet, ne kiga koyai Solomon, kagochinet ne kibeelei, ak kagochinet ne bo busiek, ak mwanik.

⁸ Kiyai anyun Solomon igorta eng’ betusiechoto, betusiek tisab, koboto Israel tugul, tuiyet ne o mising’, kong’eete ye kibunei kebendi Hamat agoi ainetab Misri.

⁹ Ak kiyai eng’ betutab sisiit tuiyetab kaming’inetab ge; amu kiyai katabanetab kaptisisiet eng’ betusiek tisab, kiyai anyun igorta betusiek tisab.

¹⁰ Ak kimwachi bik koba emaisiekwak eng’ betutab tiptem ak somok ne bo arawetab tisab, eng’ boiboiyet ak kagasetab ge ne bo muguleldo amu mieindo ne kiyachi Jehovah Daudi ak Solomon, ak Israel bikyik.

¹¹ Koges anyun Solomon gotab Jehovah, ak gotab laitoriat: ak kiyai Solomon eng’ aiyebindo tuguk tugul che kiibwat inendet eng’ muguleldanyi, koyai eng’ gotab Jehovah, ak eng’ gonnyi.

¹² Ak kimong’ji Jehovah Solomon kemoi, ak kolenji inendet, Kaagas saeng’ung’, ak kaalewenjige yuto koek gotab tiseiywek.

¹³ Ngot ager kipsengwet si marobon, anan ngot ang’at chereng’endet koam emet, anan ayokyi koroito bikyuk;

¹⁴ ngot koming’ingei bikyuk, che kemwaitoe kainennyu, ak kosa, ak kocheng’a, ak kolakta ortinwekwak che bo yaitiet; agas anyun eng’ kipsengwet, ak anyochi kaat eng’ tengektanywa, ak asoob emenywa.

¹⁵ Kogeer anyun konyekyuk, ak kogas itikyuk, saet ne kisaei eng’ yuto.

¹⁶ Amu kaalewen goi ak ataban, si kobiit kotebe kainennyu oloto koigeny: ak tebe yuto konyekyuk kotugul ak muguleldanyun.

¹⁷ Ak ngot iwendote inye tainnyu ko u ye kiwendote Daudi kwandang’ung’, ak iyai ko u tuguk tugul che kaang’atin, ak irib ng’atutikyuk ak kiruogutikyuk;

¹⁸ agimit anyun ng’echeretab laitornatet ne bo bounateng’ung’, ko u ye kiayai arorutiet ak Daudi kwandang’ung’, alenji, Mabetenen chito ne egu bounindet eng’ Israel.

¹⁹ Ago ngot omaste, ak olakte konetisiosiekyuk ak ng’atutikyuk che kiande taing’wong’, ak obe oot kanamonik, ak ogutung’ji:

²⁰ atutu anyun ichek eng’ emennyu ne kiagochi; ak awirte goi eng’ tainnyu, ne kiatabanji kainennyu, ak ayai koek kalewenet ak atindiot eng’ bororiosiek tugul.

²¹ Ak kwong’ei age tugul ne siirei yuto, agobo goi o te ni, ak kole, Amu nee si koyachi Jehovah ko u ni emoni ak goi?

²² Ak kowol kole, Amu kimeto ichek Jehovah, Kamuktaindetab kwanisiekwak, ne kiimut ichek komong’ eng’ emetab Misri, ak konamgei ak kanamonik, ak kogutung’ji, ak koot: noto anyun kiipchi inendet ichek yaitioni tugul.