2 ATEPTAP PEETUUSYEK 35 - BUKUIT NE TILIL

¹ Ak kiripchi Josia Jehovah paska eng’ Jerusalem; ak kieny aruetab paska eng’ betutab taman ak ang’wan ne bo arawet ne bo tai.

² Ak kiinde tiisik ripsosiekwak, ak kogiil ichek eng’ otisietab gotab Jehovah.

³ Ak kilenji Lawik che kiineti Israel tugul, che ki tililen eng’ Jehovah, Onde moinget ne tilil got ne kiteech Solomon weritab Daudi laitoriatab Israel; ma koegu milet ne mi tigigoikwok: oot anyun Jehovah Kamuktaindeng’wong’, ak bikyik Israel.

⁴ Ak ochopge obee gorikab kwanisiekwok ko u ripsosiekwok, ko u sirutikab Daudi laitoriatab Israel, ak sirutikab Solomon, werinnyi.

⁵ Ak otononse eng’ ole tilil ko u ole kigipcheita gorikab kwanisiek che bo tupchosiekwok lagokab bik, ak ingobunji age tugul kebebertab gotab kwanisiekab Lawik.

⁶ Ak oeny aruetab paska ak oanyinyge, ochopchji tupchosiekwok, koyai ko u ng’olyotab Jehovah ne king’at eng’ Musa.

⁷ Ak kiigochi Josia bik, che bo akwetab kechirek, arekab kechir ak che bo ng’ororek, kobunji choto tugul che bo kagochinoikab Paska, kogochi bik tugul che kimi yoto; kiek tugul elfusiek sosom, ak kirugik elfusiek somok: ki bo laitoriat chuto.

⁸ Ak kiigochi bounikyik bik ak tisiik, ak Lawik, kagochinetab chamnyet. Kiigochi Hilkia ak Sekaria ak Jehiel, che bounikab gotab Kamuktaindet, kogochi tisiik, tuga elfusiek aeng’ ak bogol lo, ak eik bogol somok koek kagochinoikab paska.

⁹ Ak kiigochi Konania, ak Semaia ak Netanel, tupchosiekyik, ak Hasabia, Jeiel, ak Josabad, che eechen eng’ Lawik, kogochi Lawik, tuga elfusiek mut, ak eik bogol mut, koek kagochinoikab paska.

¹⁰ Kochobok anyun otisiet ak kotononso tisiik eng’ komostanywa, ak Lawik eng’ ripsosiekwak, ko u ng’atutietab laitoriat.

¹¹ Ak kieny aruetab paska, ak kiisisie tisiik korotik che kitaachei eng’ eunekab Lawik, ak kieny Lawik tiseiywechoto.

¹² Ak kiisto kagochinoik che kibeelei, si kobiit kogoito, ko u ole kigipcheita gorikab kwanisiekab lagokab bik, kogochi Jehovah ko u ye sirat eng’ bukuitab Musa. Ak kiyachi ko u noto eik.

¹³ Ak kibeel aruetab paska eng’ mat ko u kayomiset: ak kiiyo kagochinoik che tililen eng’ terenik, ak saburionik, ak tabokab karik, ak koipchi lagok tugul che bo bik kochaktae.

¹⁴ Ye ibata kochopchigei ak tisiik; amu kichirjirendos tisiik werikab Aron kogoitoi kagochinoik che kibeelei ak mwanik agoi kemoi: kichopchigei anyun Lawik, ak tisiik, werikab Aron.

¹⁵ Ak kimi komostanywa tienik werikab Asap, ko u ng’atutietab Daudi, ak Asap, Heman, ak Jedutun keerindetab laitoriat; ak kimi ribik ormarichet age tugul; kima ko nyoljin kobagakta boisienywa, amu kichopjin Lawik tupchosiekwak tugul.

¹⁶ Kichobok anyun otisiet tugul ne bo Jehovah eng’ betunoto, si korib paska, ak kogoito kagochinoik che kibeelei eng’ kaptisisietab Jehovah, ko u ng’atutietab laitoriat Josia.

¹⁷ Kirib lagokab Israel che kimi yoto, paska, eng’ betusiechoto, ak korip igortab makatinik che ma kinde mermerek eng’ betusiek tisab.

¹⁸ Ak kitom kobiit paska age koboch betusiekab maotiot Samuel ne kergei ak noto kigirib eng’ Israel; ama rib age tugul eng’ laitorinikab Israel ne u noto koyai Josia, ak tisiik, ak Lawik, ak Juda tugul ak Israel che kimi yoto, ak bik che kimenyei Jerusalem.

¹⁹ Kigirib paskainoto eng’ kenyitab taman ak sisiit ne bo laitornatetab Josia.

²⁰ Kingobata choto tugul ko kagochob Josia hekalut, kotogos Neko laitoriatab Misri kobargei ak Karkemis ye negite Euprate: ak kiwa Josia kobargei ak inendet.

²¹ Ago kiiyokto Neko bik koba ole mi inendet, kolenji, Kiting’ege nee ak inye, laitoriatab Juda? Maabokyin inye, betuni, ago abokyini got ne ating’e boriet; ak kang’ata Kamuktaindet achokyi: bagakte, amegirinde Kamuktaindet ne mi kobota, si mabarin inendet.

²² Ago kima cham Josia kobagakta inendet, ago kiwalgei koek age si kobiit kobargei ak inendet, ama kas ng’alekab Neko che kibunu kutitab Kamuktaindet, ak kinyo kobargei eng’ atebwetab Megido.

²³ Ak kimwok mwogik laitoriat Josia; ak kilenji laitoriat otwogikyik, Omuta; amu kagiguotena mising’.

²⁴ Komut anyun otwogikyik inendet eng’ karit, ak konde inendet karit ne bo aeng’ ne kitinyei, ak kiimut inendet konyo Jerusalem; ak kime ak kigitupchi kererisiekab kwanisiekyik. Ak kirirji Josia Juda tugul ak Jerusalem.

²⁵ Ak kirir Jeremia agobo Josia: ak kirirji Josia tienik tugul che murenik ak gotab kor, eng’ rirekwak agoi kora; ak kiyachi ichek kayomiset eng’ Israel: ak ogeero, sirotin eng’ bukuitab rirek.

²⁶ Ak boisionik che ng’etunotin che bo Josia, ak boisionikyik che miach, ko u che sirotin eng’ bukuitab Ng’atutikab Jehovah,

²⁷ ak boisionikyik, che bo tai ak che bo let, ogeero, sirotin eng’ bukuitab laitorinikab Israel ak Juda.