2 ATEPTAP PEETUUSYEK 29 - BUKUIT NE TILIL

Laitornatetab Hesekia

¹ Kitau Hesekia kolaitorani ko bo kenyisiek tiptem ak mut; ak kilaitoran kenyisiek tiptem ak sogol eng’ Jerusalem: ak kigiguure kamennyi Abija cheptab Sekaria.

² Ak kiyai ne mie eng’ taitab Jehovah, ko u tugul che kiyai Daudi kwandanyi.

³ Kiyat kurgotikab gotab Jehovah, eng’ kenyit ne bo tai ne bo laitornatennyi, eng’ arawet ne bo tai, ak koteech kogeny ole kiga kobutok.

⁴ Ak kiimut tisiik ak Lawik kobwa go, ak koyumji ichek komosta ne baraa eng’ kong’asis,

⁵ ak kolenji, Ogas, okwek Lawik; oanyinyge, ak oanyiny gotab Jehovah, Kamuktaindetab kwanisiekyok, ak omaande tugukab simdo eng’ ole tilil.

⁶ Amu kigochiliil kwanisiekyok, ak koyai ne ya eng’ taitab Jehovah Kamuktaindennyo, ak kigometo inendet, ak kowelelgei kometo ole menyei Jehovah, ak kotuktochi batai.

⁷ Kigoger kurgotikab keterut, ak komis taisiek, mata kobeel nyamdutik anan kogoito tiseiywek che kibeelei eng’ ole tilil, kogochi Kamuktaindetab Israel.

⁸ Kinyonji anyun neregekab Jehovah Juda ak Jerusalem, ak kiigoito ichek ketoortaat koba komosi ak komosi, koek kwong’utiet, ak koek che kirenyei ko u ye ogeere eng’ konyekwok.

⁹ Amu, ogeero, kigebar kwanisiekyok eng’ rotokab chok, ak kigeluul werikyok ak tibikyok ak osotikyok amu nito.

¹⁰ Ara anyun, mi muguleldanyu kiyomisge ak Jehovah Kamuktaindetab Israel, si keistoenech neregekyik che koromen.

¹¹ Werikyuk, amata oegu che maigiilegei: amu kilewenok Jehovah otonone tainnyi, oboisiechi inendet, ak oegu kiboitinikyik, ak obeel nyamdutik.

¹² King’eetyo anyun Lawik, Mahat weritab Amasai, ak Joel weritab Asaria, eng’ werikab Kohatik: ak eng’ werikab Merari, Kis weritab Abdi, ak Asaria weritab Jealelel: ak eng’ Gersonik, Joa weritab Sima, ak Eden weritab Joa:

¹³ ak eng’ werikab Elisapan, Simri ak Jeuel: ak eng’ werikab Asap, Sekaria ak Matania:

¹⁴ ak eng’ werikab Heman, Jehuel ak Simei: ak eng’ werikab Jedutun, Semaia ak Usiel.

¹⁵ Ak kiiyum tupchosiekwak, ak koanyinygei, ak koba go, ko u ng’atutietab laitoriat eng’ ng’alekab Jehovah, kotilil gotab Jehovah.

¹⁶ Ak kiba tisiik komosta ne bo orit mising’ eng’ gotab Jehovah, koba kotilil, ak komaanda tugul che bo simdo che kiganyorji hekalutab Jehovah, ak koib koba seremutab gotab Jehovah. Ak kinam Lawik, ak koib koba timin, kowirji kererutab Kidron.

¹⁷ Kitoi anyun koanyinyis eng’ betut ne bo tai ne bo arawet ne bo tai, ak kibwa eng’ betut ne bo sisiit ne bo arawet, keterutab Jehovah; ak kiianyiny gotab Jehovah betusiek sisiit: ak kiiges eng’ betutab taman ak lo eng’ arawanato bo tai.

¹⁸ Kiba anyun ole mi Hesekia laitoriat eng’ go, ak kolenji, Kagitilil got tugul ne bo Jehovah, ak kaptisisiet ne bo kagochinoik che kibeelei, koboto terenikyik tugul, ak mesetab makatinikab kabartaet, koboto tugukyik tugul.

¹⁹ Kogeny, kogechob tuguk tugul che kiga wirta laitoriat Ahas eng’ laitornatennyi, ye kiga kobistoe, ak kianyiny; keero, mi taitab kaptisisietab Jehovah.

²⁰ King’eet anyun Hesekia laitoriat karon inne, ak koyum bounikab nganaset, ak kotogosta gotab Jehovah.

²¹ Ak kiget kirugik tisab, ak mengichik tisab, ak arekab kechir tisab, ak kwesik tisab koek kagochinetab tengekto ne bo bounatet ak ne bo ole tilil ak ne bo Juda. Ak king’at tisiik werikab Aron kogoito choto eng’ kaptisisietab Jehovah.

²² Kieny anyun kirugik, ak kotaach tisiik korotik, ak koise kaptisisiet; ak kieny mengichik, ak koise korotik kaptisisiet; ak kieny arekab kechir, ak koise korotik kaptisisiet.

²³ Ak kiget kwesikab kagochinetab tengekto korik taitab laitoriat ak tuiyet; ak kiigonoor eunekwak baragunywa:

²⁴ ak kieny tisiik, ak kiigoito korotikwak eng’ kaptisisiet koek kagochinetab tengekto, si koyai kagaigaet agobo Israel tugul: amu king’at laitoriat kole kigoito kagochinet ne kibeelei ak kagochinetab tengekto agobo Israel tugul.

²⁵ Ak kiinde Lawik gotab Jehovah, kotinyei sanisiekab sugunonik che kibirei, ak kibugandinik ak ketubosiek, ko u ng’atutietab Daudi, ak ne bo Gad keerindetab laitoriat, ak maotiot Natan: amu kibunu ng’atutionoto Jehovah eng’ maotikyik.

²⁶ Ak kitononso Lawik kotinyei kibugandinikab Daudi, kotinyei tisiik iriagok.

²⁷ Ak king’at Hesekia kigoito kagochinet ne kibeelei eng’ kaptisisiet. Ak kingetoi kigoito kagochinet ne kibeelei, ketoi tiendab Jehovah agine, ak iriagok koboto kibugandinikab Daudi laitoriatab Israel.

²⁸ Ak kiing’urukso tuiyet tugul, ak kotienso tienik, ak koguut iriagok bik che kuutei; kiyai ko u noto agoi kogesgei kagochinet ne kigibeelei.

²⁹ Ak kingo kagoges kagoitoet tugul, kong’uruk laitoriat koboto tugul che kimi ak inendet, ak kolos.

³⁰ King’at kogeny laitoriat Hesekia ak bounik, Lawik kotienji Jehovah kalosunoik eng’ ng’alekab Daudi, ak che bo Asap keerindet. Ak kitien kalosunoik eng’ kagasetab ge, ak kiing’urukso ak kolos.

³¹ Yeityo kowol Hesekia kole, Amu kaotabanjige Jehovah, origu oibu tiseiywek ak kagochinoikab kongoi kobwa gotab Jehovah. Ak kiib tuiyet tiseiywek ak kagochinoikab kongoi; ak kiib tugul che kichamei eng’ mugulelwekwak, kagochinoik che kibeelei.

³² Ak kiek koitetab kagochinoik che kibeelei, che kiget tuiyet, kirugik tamanwogik tisab, ak mengichik bogol, ak arekab kechir bogol aeng’: ki bo choto tugul kagochinoik che kibeeljin Jehovah.

³³ Ak kiek tuguk che kigitaban eik bogol lo ak kechirek elfusiek somok.

³⁴ Ago ki ng’ering’ tisiik, kot ko ma imuch koeny kagochinoik tugul che kibeelei: kotoret anyun Lawik tupchosiekwak, kot kogesgei boisionoto, ak agoi koanyinygei tisiik: amu ki lititen mugulelwekab Lawik che kichamei koanyinygei kosiir tisiik.

³⁵ Ak ki chang’ kogeny kagochinoik che kibeelei, koboto mwanikab kagochinoikab kalyet, koboto kagochinoikab tuguk che kieei che bo kagochinet age tugul ne kibeelei. Kigitet anyun otisiet eng’ gotab Jehovah.

³⁶ Ak kibaibait Hesekia, koboto bik tugul, amu otisionoto kiga chopchi Kamuktaindet bik: amu kiyaak ng’olyondonoto eng’ yoto.