2 ATEPTAP PEETUUSYEK 28 - BUKUIT NE TILIL

Laitortetab Ahas

¹ Ki bo Ahas kenyisiek tiptem ye kitau kolaitorani; ak kilaitoran kenyisiek taman ak lo eng’ Jerusalem: ak kima yai ne mie eng’ taitab Jehovah, ko u Daudi kwandanyi:

² Ago kiwendote ortinwekab laitorinikab Israel, ak kiitang’ji kogeny Baalik kanamonik.

³ Kibeel kogeny nyamdutik eng’ atebwetab weritab Hinom, ak kobeel lagokyik eng’ mat, ko u tuguk che kiwechei che bo bororiosiek, che kiga on Jehovah eng’ taitab lagokab Israel.

⁴ Ak kieny tiseiywek ak kobeel nyamdutik eng’ komoswek che tororen, ak eng’ tulonok, ak eng’ kelutab ketit age tugul ne tuon.

⁵ Kiinde anyun Jehovah Kamuktaindennyi eutab laitoriatab Suria; ak kibar, ak komut tuiyet ne o ne bo bikyik koek luulenik, ak komut koba Damasko. Ak kiginde inendet kogeny eunekab laitoriatab Israel, ne kibar inendet eng’ baret ne o.

⁶ Amu kibar Peka weritab Remalia bik eng’ Juda elfusiek bogol agenge ak tiptem eng’ betut agenge, che ki bik che nyigonen choto tugul, amu kimeto Jehovah Kamuktaindetab kwanisiekwak.

⁷ Ak kibar Sikri, chito ne kim, ne bo Epraim, Maaseia weritab laitoriat, ak Asrikam bounindetab got, ak Elkana ne kirubei laitoriat.

⁸ Ak kiluul lagokab Israel tupchosiekwak elfusiek bogol aeng’, kwonyik, werik, ak tibik, ak kiib barunenik che chang’ eng’ ichek koba Samaria.

⁹ Ago kimi maotiotab Jehovah oloto, ne kigiguure Oded: ak kiwa kotorokta luget ne kinyonei Samaria, ak kolenji ichek, Ogeero, amu kinerekyi Jehovah Kamuktaindetab kwanisiekwok Juda, ko no koinde ichek eunekwok, ak kaobar ichek eng’ neregek che ng’wonen che kagoit kipsengwet.

¹⁰ Ak nguno omache oyai lagokab Juda ak Jerusalem koek otwogikwok che murenik ak che kwonyik: ago motinye okwek kachiliilutik che kiochiliilji Jehovah Kamuktaindeng’wong’?

¹¹ Ogasa anyun, oweech luulenik che kaoluul eng’ tupchosiekwok: amu mi baragung’wong’ neregek che ng’wonen che bo Jehovah.

¹² Yeityo kotononso alak eng’ kandoikab lagokab Epraim, Asaria weritab Johanan, Berekia weritab Mesilemot, Jeisikia weritab Salum, ak Amasa weritab Hadlai, kogirinda bichoto kibunu luget,

¹³ ak kolenji ichek, Momuchi omutu luulenik kobwa olito: amu omache oyai kit ne ibwech kachiliilutiet eng’ Jehovah, si kobiit otes tengekwogikyok ak kachiliilutik: amu eechen kachiliilutikyok, ak mitei neregek che ng’wonen agobo Israel.

¹⁴ Kobagakta anyun murenik che kiilaachi karik, luulenik ak barunenik eng’ taitab bounik ak tuiyet tugul.

¹⁵ Kong’eetyo anyun bik che kigimwa kainaikwak, ak komut luulenik, ak kinam tuguk che kibaru, ak kolaaksechine bik tugul che kimi ach ngor, ak kolaaksechi ichek, ak kolaakyi kweonik, ak kobai, ak konaga koee, ak koiil ichek, ak komute tugul che nyalulyotin sigirok, komut kobwa Jeriko, nganasetab tironik, agoi ole mi tupchosiekwak: koweek anyun koba Samaria.

¹⁶ Kiiyokto eng’ betusiechoto laitoriat Ahas bik koba oldab laitorinikab Asuria kotoret inendet.

¹⁷ Amu kigabwa kogeny Edomik, ak komut luulenik.

¹⁸ Kiga kobokyi agichek Pilistik nganasok che bo atebwet, ak che bo Juda Murot ne bo Tai, ak kiga nam Bet-semes, Aijalon, Gederot, Soko koboto nganasokyik ak Timna koboto nganasokyik: Gimso agine koboto nganasokyik: ak kimeny oloto.

¹⁹ Amu kiiming’in Jehovah Juda agobo Ahas laitoriatab Israel; amu kiyai atebosiekab tewernatet eng’ Juda, ak kongelelji Jehovah mising’.

²⁰ Ak kinyonji inendet Tilgat-pilneser laitoriatab Asuria, ak konyalil inendet, ma igimit.

²¹ Amu kiisto Ahas kebeberta ne kimi gotab Jehovah, ak ne kimi gotab laitoriat, ak ne bo bounik, ak kogochi laitoriatab Asuria: ago ma toret noto inendet.

²² Ak kites kosiir kongelelji Jehovah eng’ betusiekab nyalildanyi, laitoriandanito Ahas.

²³ Amu kieng’ji tiseiywek cheptalelisiekab Damasko, che kibar inendet; ak kile, Amu toreti cheptalelisiekab laitorinikab Suria ichek, aeng’jini anyun agane ichek, si kobiit kotoreta. Ago kiek choto che king’em inendet ak Israel tugul.

²⁴ Ak kiiyum Ahas terenikab gotab Kamuktaindet, ak kotui terenichoto bo gotab Kamuktaindet, ak koger kurgotikab gotab Jehovah; ak kiyachigei kapkorosusiek eng’ luita age tugul ne bo Jerusalem.

²⁵ Ak kiyai komoswek che tororen eng’ nganaset age tugul ne bo Juda, si kobeeljine nyamdutik cheptalelisiek, ak kotach Jehovah, Kamuktaindetab kwanisiekyik, konerech.

²⁶ Ak boisionikyik che ng’etunotin, ak ortinwekyik tugul, che bo tai ak che bo let, ogeero, sirotin eng’ bukuitab laitorinikab Juda ak Israel.

²⁷ Ak kiru Ahas koboto kwanisiekyik, ak kigitupchi nganaset, noto ko Jerusalem, amu ma kisut kwo kererisiekab laitorinikab Israel: ak kilaitoran Hesekia werinnyi kogeer inendet.