2 ATEPTAP PEETUUSYEK 27 - BUKUIT NE TILIL

Laitornatetab Jotam

¹ Ki bo Jotam kenyisiek tiptem ak mut ye kitau kolaitorani; ak kilaitoran kenyisiek taman ak lo eng’ Jerusalem: ak kigiguure kamennyi Jerusa cheptab Sadak.

² Ak kiyai ne mie eng’ taitab Jehovah, ko u tugul che kiga yai kwandanyi Usia: ago kimawa hekalutab Jehovah. Ak kita koyaei bik yaitwogik kora.

³ Kiteech kurget ne bo meto eng’ gortab Jehovah, ak kiteekso mising’ eng’ inatutab Opel.

⁴ Ak kiteech kogeny nganasok eng’ emetab tulonok che bo Juda, ak kiteech irimoik ak teeksosiek che koen eng’ osnosiek.

⁵ Kibargei kogeny ak laitoriatab lagokab Amon, ak koterter ichek. Ak kiigochi lagokab Amon inendet eng’ kenyinoto talentaisiek bogol che bo feda, ak kerutik elfusiek taman che bo nganok, ak kerutik elfusiek taman che bo sairik. Kiigochi ko u noto lagokab Amon inendet, eng’ kenyit ne bo aeng’ kogeny, ak ne bo somok.

⁶ Kigimit anyun Jotam, amu kichob ortinwekyik eng’ taitab Jehovah Kamuktaindennyi.

⁷ Ak boisionik che ng’etunotin che bo Jotam, ak lugosiekyik tugul, ak ortinwekyik tugul, ogeero, sirotin eng’ bukuitab laitorinikab Israel ak che bo Juda.

⁸ Ki bo kenyisiek tiptem ak mut ye kitau kolaitorani, ak kilaitoran kenyisiek taman ak lo eng’ Jerusalem.

⁹ Ak kiru Jotam ak kwanisiekyik, ak kigitupchi nganasetab Daudi: ak kilaitoran Ahas werinnyi kogeer inendet.