2 ATEPTAP PEETUUSYEK 26 - BUKUIT NE TILIL

Laitornatetab Usia

¹ Yeityo konam bik tugul che bo Juda Usia, ne ki bo kenyisiek taman ak lo, ak koeet inendet koek laitoriat kogeer kwandanyi Amasia.

² Kiteech Elot, ak koweekyi Juda, ko kagoru laitoriat koboto kwanisiekyik.

³ Ki bo Usia kenyisiek taman ak lo ye kitau kolaitorani; ak kilaitoran kenyisiek konom ak aeng’ eng’ Jerusalem: ak kigiguure kamet Jekilia ne bo Jerusalem.

⁴ Ak kiyai ne mie eng’ taitab Jehovah, ko u tugul che kiyai kwandanyi Amasia.

⁵ Ak kiigiil muguleldanyi kocheng’ Kamuktaindet eng’ betusiekab Sekaria, ne kitinyei kaguiyet agobo ng’ang’utietab Kamuktaindet: ak eng’ betusiek tugul che kicheng’ Jehovah, ko kiiberur Kamuktaindet inendet.

⁶ Ak kiwa kobargei ak Pilistik, ak kobut irimetab Gat, ak irimetab Jabne, ak irimetab Asdod; ak kiteech nganasok eng’ Asdod, ak eng’ kwenutab Pilistik.

⁷ Ak kitoret Kamuktaindet inendet kobargei ak Pilistik, ak kobargei ak Marabuk che kimenyei Gur-baal, koboto Meunik.

⁸ Ak kiigochi Amonik Usia kagochinoik: ak kiyom kainennyi agoi ole kibunei kebendi Misri; amu kitesak kimnatennyi kot.

⁹ Kogeny, ko kiteech Usia teeksosiek che koen eng’ Jerusalem eng’ ormarichetab luita, ak eng’ ormarichetab atebwet, ak eng’ ole weegegei irimet, ak kogimit.

¹⁰ Ak kiteech teeksosiek che koen eng’ ong’atet, ak kibal keringonik che chang’ che bo beek, amu kitinyei tuga che chang’; eng’ emet ne soi agine, ak eng’ warenget: kitinyei kabatik ak che ribei logoekab sabibuk, eng’ tulonok ak eng’ mbarenik che rurtos mising’; amu kichamei kabatisiet.

¹¹ Kitinyei kogeny Usia luget ne bo bikab boriet, che kigaba baretab ge eng’ kweanaik, ko u koitenywa ne kiiti Jeiel sirindet ak Maaseia bounindet, kondochin Hanania, ne ki agenge eng’ kiptainikab laitoriat.

¹² Koitet komugul ne bo kandoikab gorikab kwanisiek, bik che kimen ak ko nyigonen, ko ki elfusiek aeng’ ak bogol lo.

¹³ Ak kimi eunekwak askarik che inetotin, elfusiek bogol somok ak tisab ak bogol mut, che kiyai luget eng’ kimnatet ne o, si kotoret laitoriat kobargei ak bunik.

¹⁴ Ak kichopchi Usia luget tugul, long’onik, ng’otwek, kutonok, karikab teget, kwangok, ak koik che kiwirtoe borowet.

¹⁵ Ak kiyai injinisiek eng’ Jerusalem, che kitoi koyai bik che ng’omen, kotebe teeksosiek che koen ak irimoik, che kimwoktoe kipchabonik, ak kiwirtoe koik che eechen. Ak kiyom ole loo kainennyi; amu kigitoret mising’, kot kogimit.

¹⁶ Ago ye kingo kagogimit, kolosgei eng’ muguleldanyi kot koyai ne ya, ak kiingelelji Jehovah Kamuktaindennyi; amu kiwa hekalutab Jehovah kobeel nyamdutik eng’ kapkorosutab nyamdutik.

¹⁷ Ak kiwa go Asaria tisiindet kosub inendet, koboto tisiik tamanwogik sisiit che bo Jehovah, che ki murenik che nyigonen:

¹⁸ Ak kigirinda Usia laitoriat, kolenji, Manyoljin, Usia, ibeelji Jehovah nyamdutik, ago nyoljin tisiik werikab Aron, che kigitaban kobeel nyamdutik: mande eng’ ole tilil; amu kengelel; maegu teegisto nito eng’ inye ne bunu Jehovah Kamuktaindet.

¹⁹ Konerech anyun Usia; ak kitinyei teret eng’ eunnyi ne kibeele nyamdutik; ak ye kinerekyin tisiik, komong’une mogondosik togennyi eng’ taitab tisiik eng’ gotab Jehovah, eng’ ye negite kapkorosutab nyamdutik.

²⁰ Ak kigeer Asaria tisiindet ne o, ak tisiik tugul, ak ogeero, kagomong’une mogondosik togennyi, ak kion inendet eng’ yoto kochokyi; ee, kichakta agine komanda, amu kiga kobir Jehovah inendet.

²¹ Ak kiam mogondosik Usia laitoriat agoi betutab meenyi, ak kimeny got ne itabanat, amu kitinyei mogondosik; amu kigiistoe inendet gotab Jehovah: ak kibou Jotam werinnyi bikab gotab laitoriat, koruokyin bikab emet.

²² Ak boisionik che ng’etunotin che bo Usia, che bo tai ak che bo let, ko kisir maotiot Isaia, weritab Amos.

²³ Koru anyun Usia ak kwanisiekyik; ak kigitub inendet ak kwanisiekyik, eng’ koretab kererisiekab laitorinik; amu kile, Tinyei mogondosik: ak kilaitoran Jotam kogeer inendet.