2 ATEPTAP PEETUUSYEK 24 - BUKUIT NE TILIL1 Ki bo Joas kenyisiek tisab ye kitau kolaitorani; ak kilaitoran kenyisiek artam eng’ Jerusalem: ak kigiguure kamet Sibia, ne bo Beer-seba. 2 Ak kiyai Joas ne mie eng’ taitab Jehovah eng’ betusiek tugul che bo Jeoiada tisiindet. 3 Ak kiitunji Jeoiada inendet osotik aeng’; ak kisich werik ak tibik. 4 Ak kingobata choto komach Joas koteech gotab Jehovah ole kiga kobutok. 5 Kiiyum tisiik ak Lawik, ak kolenji, Oba nganasokab Juda, oyumate Israel tugul fedaisiek che kiteege kogeny gotab Kamuktaindeng’wong’ eng’ kenyit age tugul, ak ochaktae ng’olyondonito. Ago ma chaktae Lawik. 6 Koguur anyun laitoriat Jeoiada, ne o eng’ ichek, ak kolenji, Amu nee si memwachi Lawik koyumat eng’ Juda ak Jerusalem aisurut ne king’at Musa otwogindetab Jehovah, ak tuiyetab Israel, agobo emaitab baornatet? 7 Amu kigobut gotab Kamuktaindet werikab Atalia, kwonyoto sogoran: ak kigogochi Baalik tuguk tugul che kiga kitabanji gotab Jehovah. 8 Kong’at anyun laitoriat, ak kiyai moinget, ak konde kurget sang’ ne bo gotab Jehovah. 9 Ak kimwaita eng’ Juda ak Jerusalem, keipchi Jehovah aisurut ne king’at Musa otwogindetab Kamuktaindet eng’ ong’atet agobo Israel. 10 Ak kiboiboitu bounik tugul koboto bik, ak kiib aisurunoto konde moinget, agoi kowong’. 11 Ak kingo kagoib Lawik moinget konyo gotab laitoriat, ko ngo keer kole chang’ fedaisiek eng’ orit, konyo sirindetab laitoriat, ak kiboitiotab tisiindet ne o, ak koib fedaisiek eng’ moinget, ak korong’ fedaisiek eng’ moinget, ak koib, koweekta moinget kwo ye kami. Kiyai ko u noto betut age tugul, ak kiiyum fedaisiek che chang’. 12 Ak kiigochi laitoriat ak Jeoiada bik che kiyai boisietab gotab Jehovah fedaisiechoto; ak kisir bik che bo melekto, musogikab koik ak che bo baoinik, si koteech kogeny gotab Jehovah, ole kiga kobutok, ak kiigochi kogeny kitang’ikab karik ak che bo sugunonik, si kogetyi kogeny gotab Jehovah. 13 Kobois anyun kiboitinik, ak kiyai boisionoto kosulda, ak kilumda gotab Kamuktaindet ko u ye ki u, ak kogimit. 14 Ak kingo kagoges, koipchi laitoriat ak Jeoiada fedaisiek che kiga ng’et; che kiga kiyae tuguk che bo gotab Jehovah, che choto ko ki tuguk che kigiotisie, ak che kigigoitoisie, ak kechigosiek, ak tuguk che bo tahabu ak che bo feda. Ak kiigoitoi kotugul kagochinoik che kibeelei eng’ gotab Jehovah eng’ betusiek tugul che bo Jeoiada. 15 Ak kiosit Jeoiada, kiga kochang’a betusiekyik, ak kiilil; kiga kotar kenyisiek bogol ak sosom ye kingomeei. 16 Ak kigitupchi inendet nganasetab Daudi koboto laitorinik, amu kiyai ne mie eng’ Israel, ak eng’ Kamuktaindet ak gonnyi. 17 Kingo kagome Jeoiada kobwa bounikab Juda, ak kogetung’ji laitoriat. Kogasyi anyun laitoriat ng’alekwak. 18 Kometo anyun gotab Jehovah, Kamuktaindetab kwanisiekwak, ak koot Aserik ak kanamonik: ak kinyonji neregek Juda ak Jerusalem agobo ng’ogiswechuchuak. 19 Agos kiiyokyi ichek maotik, komut ichek koweekyi Jehovah; ak kibaorian kogirinda ichek: ago ma cham kogas. 20 Kinyonji Tamirmirietab Jehovah Sekaria weritab Jeoiada tisiindet; ak kitonon eng’ ole toror, ak kolenji bik, Kale Kamuktaindet, Amu nee si obistoe ng’atutikab Jehovah, si mobor? Amu kiomete Jehovah, kagometok ak okwek. 21 Ak kichaam inendet, ak kolage koik eng’ ng’atutietab laitoriat eng’ seremutab gotab Jehovah. 22 Noto anyun, ma ibwat laitoriat Joas mieindo ne kiga koyachi Jeoiada kwandanyi, ago kibar werinnyi. Ak kingomeei, komwa kole, Ingogeer Jehovah kioto, ak koyaakta. 23 Ak kingogesgei kenyit, kotogos lugetab Suriek kobokyi inendet: ak kiit J uda ak Jerusalem, ak kibar bounik tugul che bo bik, che kimi ak bichoto, ak koyokyi barunenik laitoriatab Damasko. 24 Amu kinyo lugetab Suriek komut kweanet ne ming’in; ak kiinde Jehovah eunekwak luget ne o mising’, amu kiga kometo Jehovah, Kamuktaindetab kwanisiekwak. Kiiruokyi anyun Joas. 25 Ak kingoba eng’ ole mi inendet, (amu kibagach inendet kotinyei mianwek che chang’,) kochaam inendet otwogikyik amu korotikab werikab Jeoiada tisiindet, ak kibarji itogunnyi: ak kotupchi inendet nganasetab Daudi, ago ma tupchi inendet kererisiekab laitorinik. 26 Ak chu ko ichek che kichaam inendet: Sabad weritab Simeat Jebamonindet, ak Jeosabad weritab Simirit Jemoabindet. 27 Ogeero, kigisir agobo werikyik, ak oindab milosiek che kigigesenji inendet, ak teeksetab gotab Kamuktaindet, eng’ ng’alekab bukuitab laitorinik. Ak kilaitoran Amasia werinnyi kogeer inendet. |