2 ATEPTAP PEETUUSYEK 20 - BUKUIT NE TILIL

¹ Ak kingobata nito, kobok lagokab Moab, ak lagokab Amon, ak kimi koboto ichek Amonik alak kobwa kobargei ak Jeosapat.

² Ak kibwa bik alak komwachi Jeosapat, kolenji, Ibokyinin tuiyet ne o ne bunu nyanjet bitonin eng’ Suria; ak ogeero, mi Hasason-tamar (noto ko Engedi).

³ Koiywei Jeosapat, ak kogiilgei kocheng’ Jehovah; ak komwaita karugutetab ge eng’ Juda tugul.

⁴ Ak kiiyumgei Juda tugul kocheng’ toretet eng’ Jehovah: kibwa eng’ nganasok tugul che bo Juda kocheng’ Jehovah.

⁵ Ak kitonon Jeosapat eng’ tuiyetab Juda ak ne bo Israel, eng’ gotab Jehovah, eng’ taitab seremut ne leel;

⁶ ak kile, Ee Jehovah, Kamuktaindetab kwanisiekyok, tos ma i Kamuktaindet eng’ kipsengwet? Ak tos ma i bounindet ne bou bounatosiek tugul che bo bororiosiek? Ak mi eung’ung’ kimnatet ak kamuktaet, ne mami ne imuchi kogirinden.

⁷ Tos ma ion inye, ee Kamuktaindennyo, bik che kimenyei emoni eng’ taitab biguk Israel, ak igochi kobunji iyotetab Abraham chorueng’ung’ koigeny?

⁸ Ak kimeny olito, ak kigoteegun ole tilil agobo kaineng’ung’, kolen,

⁹ Ngot konyonjech yaitiet, rotwetab chok, kiruoget, anan koroito, anan rubet, ketononie eng’ taitab goi, ak eng’ taing’ung’, (amu mi kaineng’ung’ goi,) ak kerirjin eng’ nyalilwogikyok, ak igasech ak isoruech.

¹⁰ Keer nguno anyun-o, lagokab Amon, ak Moab, ak che bo tulwetab Seir, che kima ichamji Israel kobokyi, kingobwanei komong’u eng’ emetab Misri, ago kirob taban, ama bar;

¹¹ keer anyun-o, ole kagogeerundawech, kobwa komaandech eng’ boroteng’ung’, ne kiigonech kobunjech.

¹² Ee Kamuktaindennyo, meruokyini? Amu magitinye kamuget kebarge ak tuiyoni o kagobokyech; ama kingen kit ne kiyaei: ago inyalin konyekyok.

¹³ Ak kitononso Juda tugul eng’ taitab Jehovah, koboto manyurunikwak ak osotikwak ak lagokwak.

¹⁴ Kinyonji anyun Tamirmirietab Jehovah Jaasiel weritab Sekaria, weritab Benaia, weritab Jeiel, weritab Matania, Lawindet, ne bo werikab Asap, eng’ kwenutab tuiyet;

¹⁵ ak kile, Oeb it okwek tugul gab Juda, ak che omenye Jerusalem, koboten inye laitoriat Jeosapat: kamwawok Jehovah ko u ni, kole, Amoiywei, anan oarogense amu lugoni o; amu ma neng’wong’ luget, bo Kamuktaindet.

¹⁶ Orekte mutai obarge ak ichek: ogeero, togosu ichek eng’ tegeiyetab Sis; ak onyorjini ye igesunegei atebwet, taitab ong’atetab Jeruel.

¹⁷ Ma okwek che oyae lugoni: otetge, otononse, si ogeer yetunetab Jehovah ne mi kobotok, ee Juda ak Jerusalem: amoiyweisie, anan oarogense: oba obokyi mutai; amu mi Jehovah kobotok.

¹⁸ Ak kiing’uruk Jeosapat kot kotiiny toget ng’ony: ak kiibutyi taitab Jehovah gab Juda tugul ak bikab Jerusalem ak kolos Jehovah.

¹⁹ Ak kitononso Lawik ak che bo lagokab Kohatik, ak che bo lagokab Koraik, kolos Jehovah, Kamuktaindetab Israel, eng’ kutit ne o mising’.

²⁰ Ak king’eetyo karon mising’, komusta ong’atetab Tekoa; ak ye kingota kobendi, kotonon Jeosapat ak kole, Ogasa, ee Juda, ak che omenye Jerusalem; oyan Jehovah Kamuktaindeng’wong’, si kobiit ogimegitu; oyan maotikyik, si obor.

²¹ Ak kingo kagong’alal ak bik, kolewen che tienjin Jehovah, ak kolosu kororonindab tililindo, komandoi kondoe luget, kolen, Oweekyi Jehovah kongoi; amu bo koigeny rirenennyi.

²² Ak kingotoi kotienso ak kolosu, konde Jehovah bik che ribistos si kobargei ak lagokab Amon, ak Moab, ak tulwetab Seir, che kigobwanji Juda; ak kigibar.

²³ Amu kitononso lagokab Amon ak Moab kobargei ak che kimenyei tulwetab Seir, kobar koges ak kong’em: ak ye kingo kagoges che kimenyei Seir, kotoret chi tugul kobar chito ne kami tuwai.

²⁴ Ak kingoit Judaik teekset ne koi ne kiripse, eng’ ong’atet, kotoben bik che chang’; ak ogeero, kiga kobutyo koek muswek, ak kima komi agot agenge ne kichilil.

²⁵ Ak kingonyo Jeosapat koboto bikyik konam tuguk, konyor eng’ kwenunywa tuguk ng’isiat che bo magornatet ak ngoroik, ak tuguk che bo kamanutik che eechen, che kibut eng’ bichoto koipchigei, che kitemene kola: kitar betutab somok koibei barunenichoto, ki chang’ kot.

²⁶ Ak kiiyumjigei atebwetab Beraka eng’ betutab ang’wan; amu kiilos Jehovah eng’ oloto: kigiguure anyun kainetab yoto Atebwetab Beraka, agoi ra.

²⁷ Koweek chi tugul ne bo Juda ak Jerusalem, kondoe Jeosapat, kobendi Jerusalem eng’ boiboiyet; am kiigochi Jehovah ichek koboiboitu amu bunikwak.

²⁸ Ak kibwa Jerusalem kobutonu kibugandinik ak ketubosiek, ak koguutonu iriagok kot koit gotab Jehovah.

²⁹ Ak kinam bounatosiek tugul che bo emotinwek, kaiyweisiet ne iywei Kamuktaindet, ye kingogas kole kibar Jehovah bunikab Israel.

³⁰ Kiimuuny anyun bounatetab Jeosapat: amu kiigochi Kamuktaindennyi kamuung’et eng’ tabanwek tugul.

³¹ Kilaitoran Jeosapat eng’ Juda; ki bo kenyisiek sosom ak mut ye kitau kolaitorani; ak kilaitoran kenyisiek tiptem ak mut eng’ Jerusalem: ak kainetab kamennyi ko ki Asuba cheptab Sili.

³² Ak kiwendote ortinwekab kwandanyi Asa, ma masta kometo, kiyai ne mie eng’ taitab Jehovah.

³³ Ago ma kiisto komoswek che tororen; ago kitomo kogiil bik mugulelwekwak kotokyi Kamuktaindetab kwanisiekwak.

³⁴ Ak boisionikab Jeosapat che ng’etunotin, che bo tai ak che bo let, ogeero, kigisirji ng’alekab Jeu weritab Hanani, che kigimwa eng’ bukuitab laitorinikab Israel.

³⁵ Ak kingobata nito konamgei Jeosapat laitoriatab Juda ak Aasia laitoriatab Israel; kiyai Aasia ne ya mising’:

³⁶ ak kinamgei ak inendet si kobiit koteech melisiek koba Tarsis: ak kiteech melisiechoto eng’ Esion-geber.

³⁷ Kimaoten Elieser weritab Dodabahu ne bo Maresa agobo Jeosapat, kole, Amu koonamge ak Aasia, ko kagong’em Jehovah boisioniguk. Kobutok anyun melisiek, ne mata komuch koba Tarsis.